ندْر پہ پِدائی شھید سلمان ھمّل ءِ نام ءَ – زِرگْوات بلوچ

ترا جیڑاں زھیرے بُنگِران بیت
گیابیں زِرد ءِ دمکاں آژنائیں
کپوتی کُوکُویے زِید ءِ چنالاں
پہ زیمر تْران کنت اھوالے سر کنت
بھارمیچ ءِ گُلیں پیگام ءَ سنجیں
نبشتہ کنت نِھنگ ءِ تْراولیں ڈِیل
ھیالے چَول جنت ءُ گال شِنگ اَنت
سِد اَنت گُپتار ءُ ڈکّیں کَول شنز اَنت
شپ ءِ مھکانیں تاس ءَ لیکہ ءِ شل
سما ءِ گریشگ ءَ اھدے نویس اِیت
چِڑکّایے پد ءَ بْرمش اِیت چِراگاں
لگُوش اے گردو ءَ لیگار ءُ چِلّیں
بُہ بوج زمزیلّاں زِرد ءِ واھشانی
بِہ پیچ نوں پتّر ءَ نیادانی شھدیں
بُہ پُروش نوں کدّہ ءَ شیر ءُ پنیر ءِ
گُلاٹ نوں کُچلّیں زھراں مُدیمی
ترا مندوستی ءِ مجلِس نہ براہ اِیت
ترا گْوانک اِنت گُلیں ھمسنتی ءِ پِڑ
کہ جنگجاہ ءَ سرانی رُون ءُ موش اِنت
بِہ چنڈّ کٹمّیں دِل ءِ جوھان ءَ پلگار
پہ تو جوھار پد ءَ واتر نیا اَنت
پہ تو جوھار پد ءَ واتر نیا اَنت