بلوچستان کے ضلع کیچ کے مرکزی شہر تربت کے علاقے کوشقلات میں بلوچی زبان کے معروف گلوکار استاد عارف بلوچ کی رہائش گاہ پر نامعلوم مسلح افراد نے فائرنگ کی اور فرار ہوگئے۔
استاد عارف بلوچ نے فائرنگ کے واقعہ کی تصدیق کرتے ہوئے بتایا کہ نماز عشا کے بعد گاڑی پر سوار مسلح افراد نے کچھ کہے بنا ان کی رہائش گاہ پر فائرنگ کی اور واپس گاڑی پر سوار ہو کر فرار ہوگئے۔
علاقائی ذرائع کے مطابق مسلح افراد نشہ کی حالت میں تھے جنہوں نے استاد کی گھر کے سامنے آکر مغلظات بکے اور اس کے بعد فائرنگ کی جس سے محلہ میں خوف وہراس پھیل گیا۔
استاد عارف گذشتہ کئی سالوں سے بلوچی میوزک کے ایک قد آور نام کے طور جانے جاتے ہیں۔ انہیں بلوچستان سمیت مغربی بلوچستان اور خلیجی ممالک کے علاوہ دنیا بھر میں جہاں بلوچ آباد ہیں شوق سے سنا اور پسند کیا جاتا ہے۔
استاد عارف اپنی موسیقی کے ابتدائی ایام سے لے کر آج تک مسلسل سننے والوں میں اپنی مقبولیت برقرار رکھے ہوئے ہیں جو اعزاز ہے۔
