بلوچ یکجہتی کمیٹی کے سربراہ ڈاکٹر ماہ رنگ بلوچ نے خضدار سے گذشتہ شب ریاستی ڈیتھ اسکواڈ کے ہاتھوں اغوا ہونے والے خاتون کے حوالے سے اپنا ردعمل دیتے ہوئے کہا کہ بلوچستان میں ریاستی ڈیتھ اسکواڈ کے اہلکاروں نے گزشتہ رات خضدار سے عاصمہ بلوچ نامی ایک بلوچ خاتون کو ان کے گھر سے اغوا کر لیا۔
ان کا کہنا تھا کہ عاصمہ کے لواحقین نے خضدار میں دو مقامات پر دھرنا دے رکھا ہے، جہاں ان کی والدہ قرآن ہاتھ میں لیے بیٹھی ہیں۔
ڈاکٹر ماہ رنگ بلوچ نے کہا کہ ریاستی سرپرستی میں چلنے والے ڈیتھ اسکواڈ نے بلوچستان میں شہریوں کی زندگی اجیرن بنا رکھی ہے۔ فوج اور خفیہ اداروں کی سرپرستی میں یہ عناصر کسی بھی گھر میں گھس کر سفید پوش شہریوں کی عزتِ نفس کو پامال کرتے ہیں۔
بی وائی سی رہنما کا کہنا تھا کہ میں خضدار کے عوام سے اپیل کرتی ہوں کہ وہ اس جبر کے خلاف آواز بلند کریں اور عاصمہ کے خاندان کے دھرنے میں شرکت کرکے ان کا ساتھ دیں۔
