بلوچستان کے مختلف علاقوں میں بارش اور برفباری کا سلسلہ جاری ہے ۔کوئٹہ میں کچے مکان کی چھت گرنے سے 2 افراد ہلاک ہوگئے جبکہ ٹریفک حادثات میں 23 افراد زخمی ہوگئے۔~بلوچستان کے 18 اضلاع میں 2 روز سے بارش اور برفباری کا سلسلہ جاری ہے۔
بارش اور برفباری کے دوران ٹریفک حادثات میں 23 افراد زخمی ہوگئے۔
حکومت کےکنٹرول روم کے مطابق زیارت میں برفباری میں پھنسنے والی گاڑی سے سیاحوں کو نکال کر ریسٹ ہاؤس منتقل کیا گیا۔
لیویز کے مطابق بولان میں این65 شاہراہ پرپھسلن کے باعث کار اور ٹرک میں ٹکر ہوگئی جس کے باعث7 افراد زخمی ہوئے۔کان مہتر زئی، خانوزئی اور بوستان میں قومی شاہراہوں پر پھسلن سےکئی گاڑیاں ٹکرا گئیں۔کوژک ٹاپ این 25 پرگاڑیاں ٹکرانے سے 5 افراد زخمی ہوگئے۔ رحمان کہول روڈ پر خستہ حال دیوار گرگئی جس کے باعث 10 سالہ بچہ جاں بحق ہوگیا۔
محکمہ موسمیات کے مطابق منگل کو کوئٹہ، زیارت، چمن، پشین، قلعہ عبداللہ، قلعہ سیف اللہ اور چاغی میں مزید بارش اور ہلکی برفباری کی پیش گوئی کی گئی ہے، اس صورتحال میں عوام سے غیر ضروری سفر سےگریز کرنے کی ہدایت کی گئی ہے۔
دوسری طرف کوئٹہ میں پشتون آباد علاقے میں کچے مکان کی چھت گرنے سے میاں بیوی ہلاک ہوگئے۔
اہل علاقہ کے مطابق شدید بارشوں کی وجہ سے مکان کی چھت ٹوٹ کر گر گئی، جس کے نتیجے میں دونوں افراد ہلاک ہو گئے۔
