پاکستانی اینکر پرسن ارشد شریف کی کینیا میں موت کے بعد اس معاملے کی تحقیقات کا مطالبہ کیا جا رہا ہے۔
ارشد شریف کی اہلیہ جویریہ صدیق کا کینیا کی پولیس کے حوالے سے کہنا ہے کہ ارشد کو گولی مار کر ہلاک کیا گیا تاہم پاکستان کے مقامی ذرائع ابلاغ پر دعویٰ کیا گیا کہ وہ ایک حادثے کے نتیجے میں ہلاک ہوئے ہیں۔
تاحال کینیا یا پاکستان کے حکام کی جانب سے اس پر کوئی بیان جاری نہیں کیا گیا۔
یاد رہے کہ رواں سال اپریل میں سابق وزیر اعظم پاکستان عمران خان کے خلاف تحریک عدم اعتماد کے بعد ارشد شریف نے یہ دعویٰ کیا تھا کہ انھیں وفاقی تحقیقاتی ادارے (ایف آئی اے) کی جانب سے ہراسانی کا سامنا ہے۔ خود ساختہ جلا وطنی کے دوران وہ دبئی اور لندن میں مقیم رہے تھے۔
ارشد کی موت کی تصدیق ان کی اہلیہ نے پیر کی صبح کی۔ جویریہ صدیق نے ٹوئٹر پر لکھا کہ ’آج میں نے اپنا دوست، شوہر اور پسندیدہ صحافی کھو دیا۔ جویریہ صدیق نے کہا کہ ’پولیس نے انھیں بتایا ہے کہ ارشد شریف کو کینیا میں مار دیا گیا۔‘
جویریہ نے یہ بھی اپیل کی ہے کہ ارشد شریف کی کینیا کے مقامی ہسپتال میں لی جانے والی آخری تصویر کو شیئر نہ کیا جائے۔
اب تک ارشد شریف کی موت کے محرکات سامنے نہیں آسکے۔
