بلوچستان ھما سرڈگار اِنت کہ دُگنیا ءِ تہ ءَ باز کم ڈیھ ءُ ڈگار بلوچستان ءِ وڑ ءَ سیراپ بِہ بیت، بزاں اے ھما سرڈگار اِنت کہ اِیشی ءِ تہ ءَ کیمتی گوھر، سُھر ءُ تِلاہ، کرومائیٹ، آسِن، گوکرت، تیل ءُ گیس ءَ ابید دِگہ بازیں کیمتی ئیں مڈّی ساڑی اَنت، بلے پہ ھمے راجی ھزانگ ءِ لُٹّ ء پُل ءِ واستا گْوستگیں ھپتاد ءُ چار سال ءِ تہ ءَ کبزہ گیریں پاکستان گوں دری ڈیھاں ھوار بلوچ سرڈگار ءِ کُلیں مڈّیانی سودا کُرتگ، بلے اے گُلزمین ءِ ھُدابُندیں بلوچ اے کُلیں گنجانی تہ ءَ پہ یک بیلے ءِ نگن ءَ مُھتاجی اِنت۔
دُژمِن بلوچ راج ءَ ھر ھال ءَ زیردست کنگ لوٹ اِیت دانکہ بلوچ راج پہ دائِمی گُلام بِہ بیت ءُ سر چِست کنگ ءِ بود ءُ لائکی مدار اِیت۔
بلے پہ یک راجے ءَ زِندگ بِوَگ ءِ ھاتِر ءَ ھژدری اِنت کہ آ وتی سرڈگار، راجی آکبت، لجّ ءُ ننگ ءِ دیمپانی ءَ ھر وڑیں دیمونی ءِ دَیَگ ءَ چک ءُ پد مہ بیت، چی ءَ کہ راجی باندات ءِ واستا سرانی دیمونی دَیَگ اَلمی اِنت۔
بیست ء یکمی کرن ءِ بِندات ءَ بلوچ راج ءِ بامردیں ورناھاں، ونندہ گل ءُ اے دِگہ آجوئی لوٹوکیں گلانی سروک ءُ باسکاں دُگینا ءِ تہ ءَ یک نوکیں دْروشمے ءَ راجی جُنز ءِ کلوہ ءَ کُنڈ کُنڈ ءَ سر کنگ ءَ سوبین بوتگ اَنت۔
اے جُھد ءِ بِندات ءَ بِہ گِر تہ روچ ء مروچی لکّانی کِساس ءَ بلوچ ورناھاں ھوار پیر ءُ کماش، بلوچ زالبُولانی یک مزنین لڑے ھوار اِنت کہ پہ بلوچ راجی آجوئی ءُ ابدمانیں باندات ءِ موکگ ءَ کبزہ گیریں ڈیھ پاکستان ءِ آزارجاھاں بندیگ اَنت، بلے دُژمِن ء زُوراکیاں ابید گوں تمرد ءُ مُھکمی ءَ دُژمِن ءِ زُلم ءُ زُورانسریانی دیمپانی ءَ کنگ ءَ اَنت۔
پہ وتی راج ءِ بندگیں بچّ ءُ جِنکّاں ھوار اے دِگہ گار ءُ بیگواھیں مردُمانی آجو کنگ ءِ واستا سارت ءُ گرم، سوچوکیں لِوار ءَ دگانی سر ءَ نِشتگ اَنت ءُ انگت دُژمِن آیاں پہ ایمنی نِندگ ءَ نیل اِیت، مُدام وتی راجی جُھد ءِ کاراں گوں ھمکوپگ اَنت۔
ھمے رنگ ءَ گودی شاری بلوچ ءِ داتگیں دیمونی ءَ دُگنیا ءِ تہ ءَ بلوچ ءِ جُھد ءَ را یک نوکیں دْورشمے بکشات ءُ دُژمِن ءَ را سِرین پُروش کُرت، چہ اے اُرش ءَ پد دُژمِن ءَ بلوچ مات ءُ گْوھارانی برگ بِندات کُرت، بلے اے اَمَل پہ بلوچ راج ءَ نوکیں ھبرے نہ اِنت۔ دہ سال ءَ پیش بانُک زرینہ مری اے دُژمِن ءَ گار ءُ بیگواہ کُرتگ ءُ انگت بیگواہ اِنت، اے ھما دُژمِن اِنت کہ کم ءُ گیش سئے لکّ بنگالی زالبُولانی گوم ءَ بدکاری کنگ ءَ ھوار بنگالیانی ژانگولیں لاشاں پہ کپن ءُ کلّ کنگ ءَ ھم نیل اِیت، بلے بنگالی راج کہ زُوراکیانی دیم ءَ میلانک بیت، گُڑا سوبین بیت ءُ مرچی پہ آجوئی زِند گْوازینگ ءَ اِنت، ھمیش اِنت دیمونی ءِ مُزّ۔۔۔۔۔
مرچی چہ بلوچ جُھدکارانی داتگیں دیمونیاں بلوچ سرڈگار ھونین اِنت، پرے ھاتِر ءَ گْوش اَنت ” ھونے کہ پہ ھکّ رِچ اِیت، ھاک ءِ تہ ءَ بیگواہ نہ بیت”۔
دِلجماں! سرڈگار ءِ دامُن ءَ اے رِتکگیں ھون الم یکروچے رنگ کار اَنت ءُ بلوچ راج وتی راجی شھیدانی رِتکگیں ھونانی ھر تْرمپ ءِ سر ءَ پھر بند اِیت ءُ پہ شان اے گپّ ءَ گْوش اِیت کہ مئے شھیدانی داتگیں دیمونیانی مُزّ ایردستیں سرڈگار ءِ آجوئی اِنت۔
اے درگت ءَ بلوچ راج ءِ ھر پُسّگ ءِ راجی پرز اِنت کہ آ راجی زِمہ واری ءِ کُوپگ ءُ پیلو کنگ ءَ پدکِنِز مہ بیت۔ چی ءَ کہ پہ بلوچ راج ءَ ابید ء آجوئی ءَ دِگہ ھِچّ وڑیں راہ ءُ دگے پشت نہ کپتگ کہ آ پہ دائِمی اِیمن ءُ وشھال بِہ بیت۔
چوش کہ دُژمِن ءَ مروچی مئے راج ءِ لجّ ءُ ننگ ءِ سر ءَ وتی دست دور داتگ، بائِد اِنت نوں بلوچ چہ گْراں وابی ءَ جھ بِجنت ءُ وتی ماتیں سرڈگار ءِ آجو کنگ ءِ واستا آجوئی لوٹوکیں جھدکار ءُ ملّ مِڑوکیں سرمچاراں گوں ھوار بِہ بیت ءُ اے لگوریں دُژمِن ءَ چہ وتی گُلزمین ءَ چو کیچ ءِ ھار ءَ پتار بِہ دنت، اگاں نا اے دُژمِن پہ مئے پتار دَیَگ ءَ لانکبند اِنت۔۔۔۔۔۔۔۔
***
