عوامی نیشنل پارٹی نے بلوچ لاپتہ افرادکا مسئلہ وزیراعظم پاکستان کے سامنے ر کھنے کا فیصلہ کیا ہے۔
عوامی نیشنل پارٹی بلوچستان کے سینئر نائب صدر اور سینیٹر نوابزادہ ارباب عمر فاروق کاسی نے کوئٹہ میں بلوچ لاپتہ افراد کے لواحقین کی جانب سے جاری احتجاجی دھرنے میں ایک وفد کے ساتھ شرکت کی۔
وفد میں آغا زبیر شاہ اور دیگر بھی تھے۔
سینیٹر نوابزادہ ارباب عمر فاروق کاسی کا کہنا تھا کہ عوامی نیشنل پارٹی بلوچ لاپتہ افراد کے لواحقین کیساتھ کھڑی ہے، اس مسئلے پر میں بذات خود وزیر اعظم سے بات کروں گا۔
انہوں نے لواحقین سے گفتگو کرتے ہوئے کہا کہ حکومت وقت اس وقت بارش اور سیلابی پانی سے پریشان ہے، لیکن انہوں نے ان کیلئے بھی کچھ نہیں کیا، بلکہ اسی طرح اسی بارش میں یہاں بلوچ لاپتہ افراد کے لواحقین اپنے پیاروں کی بازیابی کیلئے بیٹھے ہوئے ہیں اور اس حکومت کو ان کی بھی کوئی فکر نہیں ہے جس طرح ہونا چاہیے۔
نوابزادہ کاسی نے مزید کہا کہ میں نے ان سب کی باتیں سنی ہیں، ان میں ایسی کوئی غلط بات نہیں ہے جو آئین اور قانون کیخلاف ہو، ان سب کے مطالبات آئین اور قانون کے دائرے میں اور حکومتی اختیار میں ہیں لیکن اس کے باوجود آخر وہ کونسی مجبوریاں ہیں جو ارباب اختیار کو ان سے بات کرنے سے روک رہی ہیں۔ وزیراعلیٰ بلوچستان، سیکورٹی اداروں اور ایجنسیز کو بھی چاہیے کہ وہ آئیں ان کے ساتھ بات کریں اور ان کے مسائل حل کریں۔
انہوں نے مزید کہا کہ میں بحیثیت سینیٹر اس دفعہ جاکر وزیراعظم شہباز شریف، وزیر خارجہ بلاول بھٹو زرداری، وزیر داخلہ رانا ثنا اللہ ان سب سے بات چیت کرکے بلوچ لاپتہ افراد کے لواحقین کیلئے کوئی نہ کوئی راہ نکالیں گے۔
انہوں نے لواحقین کو مخاطب کرتے ہوئے کہا کہ ہماری پارٹی عوامی نیشنل پارٹی بلوچ لاپتہ افراد کے لواحقین کے ساتھ ہر فورم پر کھڑی رہے گی اور اس مسئلے کو حل کرنے کیلئے ہر ممکن کوشش کریں گے۔
