چارمی ءُ گڈی بہر
ھمے وڈ وھد گْوست دوھزار پانزدہ ءَ کہ پاکستانی لشکر بالگتر کیلکؤر ءَ اتک میجر باسد کہ بی آر اے ءَ کمانڈراَت گوں رُمبے سنگت ءَ شُت سَلاھے چگل دات اَنت گُڈا اے دؤران ءَ دو نام گوں ناپاک لشکر ءَ دیم پہ دیم ات شہید رھمین ءُ میجر گُھرام چوکہ کیلکؤر بالگتر ءَ چہ سی پیک اوں گْوزگ ءَ اِنت ءُ پدا آواران ءُ کولواہ اوں, ھوشاپ ءُ بلیدہ اوں, گچک ءُ گوارگو اوں گوں بالگتر کیلکور ءَ دپ دئینت پمیشکہ کیلکؤر بالگتر مرچی جنگ ءِ نیام ءَ ءُ مجگ ءَ اِنت پاکستانی لشکر ھنچو کہ ایندگے دمگاں زوراکی کنگ ءَ اِنت ھمے وڈ کیلکور بالگتر ءَ ھمُک روچ زوراکی برجاھِنت بلئے ھردیں کہ لشکر ھلکاں تاراج کنان بیت شہید رھمین جان ءُ شہید میجر گہرام مِک بنت اے جنگ روان اِنت بلئے وھدے کہ سلاہ بند ھلکاں پُتراَنت مات ءُ گھارانی دلترکی بندات بیت کہ باریں کئی آواراجنئگ یا کشئگ ءُ گسانی ماندارگ ءِ باریگ اِنت مروچی۔۔۔۔۔ برے برے مھلوک یکبرے دلترک بیت پدا کہ چمّاں چِست کنت تاں اے مئے جندئے وتی میجر گُھرام اِنت گُڈا مات ءُ گھار پنچ ملٹ ءِ توک ءَ دہ مردُم ءِ ناناں تیار کن اَنت مردُم زان اَنت کہ میجر گھُرام اتکگ ھلکے ءَ گُڈا الّم سنگت گُژنگ اَنت۔۔۔۔۔
وھدے کہ جنگ زور ءَ چہ زور تِر بوھان کنت رھمین ءُ میجر گُھرام گیشتر مُھکم بوھان بنت نوں کہ دَری لشکر کؤر پہ کؤر چکّریت پیش ءُ درچکاں مان داریت آ مردُماں چہ یکے گندگ نہ بیت کہ وتی سینگ اش ٹَپّ اَتنت کہ اے کؤر مئے پت ءُ پیرُکانی اَنت کس زرانکے نہ جنت بلئے رھمین ءُ گُھرام گوں وتی سنگتاں ھر گام ھرساہ پہ وتی سنگ سنگ ءِ پہریزگ ءَ وتی دلبنداں پراھ کن اَنت ڈیھ ءَ وتی چمّاں داراَنت تاں رھمین جان سلامت ات دُژمن ءَ واب ھرام اَت کُجا نہ کُجا ناپاکے دُرشت ءُ لیٹ دات اَنت تاں 2021 ,ءَ رھمین جان شہید بوت نوں سرجمیں بار ءُ مھلوک ءِ ھوست میجر گُھرام اَت ,بہارجان ءَ وتی پنّام گُھرام کُتگ اَت بلئے میجر بلوچ مھلوک ءَ پِر کُت کہ ھردیں بمب ءُ ٹوپاں توار کُت گُڈا مھلوک دل ءَ جم بوتگ اَت کہ میجر گُھرام انت ناپاکیں لشکر ءَ دُرشگ ءَ اِنت پاکستانی لشکر میجر گھرام ءِ ھاندان ءَ چہ ھروڈ مردم آوار جت ھرچوں, رکُو ,ھَسا, بُولا, پیری, شہید کُت اَنت بلئے میجر گُہرام ءَ گَشت ادئے میجر مَناں من ءَ بلوچ مھلوک ءَ وتی میجر کُتگ اے کوہ ءُ کؤراں, درچک ءُ داراں من ءَ وتی میجر کُتگ من پنجابی ناپاکیں میجراں چون بِلّان کہ ادا منی پیر ءُ کماشاں , زھگ ءُ زالبولاں آوار بہ جن اَنت ءُ منی بہشتیں وتن ءَ وتی ناپاکیں پاداں پَلیت بکن انت۔
میجر گُھرام ءَ اے گپ ھچ دل ءَ نہ کُتگ ات کہ من بَرواریں ھانوئی بچّاں من ءَ چینچو بَرا لڈینگ بوتگ انا آ وتن دیوانگے اَت بس ناپاکیں لشکر چد ءَ چہ در کنئگی اِنت میجر گُھرام پہ نان ھچبر کیلکور ءِ ماتاں شُدی نہ کُت نوں دُرستیں ھلک میجر گُھرام ءِ ھلک اَتنت دُرستیں ماس ءُ گھارانی تاپگ پہ شانے میجر گُھرام ءِ سنگتانی واستہ ساڈی اَتنت پہ میجر ءُ کرنل بوھگ ءَ چہ پاکستانی اسکولاں سَنَد گِرگ ءِ زلورت نہ اِنت دل ءُ جگر, اکل ءُ ھوش ءِ زلورت اِنت میجر گُھرام ءَ اسکولاں ھچ نہ ونتگ گوں ھمے وانگ ءِ گپ ءَ من ءَ میجر گُھرام ءِ یاتے اَتک منی ھیال ءَ 2016 ء ات۔
مئے میتگ لشکر ءَ گپتگ ات من گونی ے کتاب زُرت شُتاں آلی ریک ءَ یک کُڈُکے ءَ نشتاں دل ءَ گُشت ماھے کپے ایوک بو کتاب بوان گُڈا میجر گُھرام گوں سنگتاں کؤرے ءَ بُرز ءَ اوتاک کُتگ ات ۔یکروچے اتک منی کرا وتی میسجے وانین اَنت پدا پسوے کُت اَنت من ءَ سک زورے دات بیا رویں اوتاک ءَ بہ نند تو ادا ایوک ءِ دست ءُ گوش ئے نشتگ ئے ترا پاکستانی میجر بارت مارا چہ شائرے ءَ زِبہر کنت من گُشت میجر گھرام ءِ بیم است اِنت اے ناپاک نئیت اینگو ما کنداِت ءُ مزاک کُت سیمی روچ ءَ پدا اتک من ءَ میسجے پیش داشت اَنت من گُشت یار میجر دل ءَ مکن بلئے اے میسج واجہ گُلزار امام ءِ میسج اَنت تو ھنچو پہ دیم ھرکس ءَ وتی میسجاں دیئے کہ بوان , پدا پسواں روان دئیے اے منی نِزّا پہ تئ واستہ جوان نہ انت ھرکس تئ زاتی میسجاں بوانیت میجر ءَ ٹہکے دات ءُ گُشت من واجہ ءِ نمبر پجّہ آورتگ پمیشکہ میسج ءِ وانگ ءَ تئ کرا اتکگاں من ءَ تئ سرا یکین اِنت چو من ھرکس ءَ پہ دیم وتی میسجاں وانگ ءَ نہ دیاں۔۔۔۔۔۔ ترا یات بیت کہ منی ماس ءَ کلُو چہ دُرستاں چیر داتگ تو اتکگ ئے ترا داتگے بہ بَرے ھر جاہ برئے ے من ءَ چو وتی ماس ھانوئی وڈا یکین اِنت کہ منی میسجانی راز ءَ تو دگر ءَ نہ دیئے۔۔۔۔۔
میجر گھرام ءِ اے گپاں یک روھانی مہرے مان اَت, برے برے من ءَ لہتیں مردُم ءَ کہ ایم اے, بی اے پاس اَنت پہ تنکید گُشتگ اے آجوئی پسُندیں لیڈراں چونیں چونیں مردُم وتی کمانڈر جوڈ کُتگ اَنت یکے ءَ رھمین کمانڈر کُتگ یکے ءَ بہار, من پسو داتگ انت ھؤ شُما راست گُش اِت کیلکور بالگتر ءِ ایم اے ءُ بی اے پاسیں, ھیڈ ماسٹر, داکتر, ءُ بابو شُمااِت شُما روچے دو چکّر ءَ ناپاک لشکر ءِ دیم ءَ مُرگ ءَ بوھگ پسُند کُتگ گونڈلیں تیرانی دیم ءَ رھمین جان ءُ بہار جان ءِ دلبند اوشتاتگ اَنت زاھراِنت کمانڈر ھمیش بنت ۔ وتن دیوانگاں وتی راھ وت گچین کُتگ جنگ برجاھِنت یک روچے اپریل 2022 ء ءَ ناپاکیں لشکر ءَ گوں دیم پہ دیمی میڑے ءَ بہارجان پنّام میجر گُھرام وتی ھوناں پہ زمین ریچیت ءُ بلوچ آجوئی جُنزئے ابدمانیں شہیدانی لَڈا ھوار بیت ۔بلئے دُژمن گوں وتی چانوگریں ھَندی چم کُٹّاں ایمِن مہ بیت بلوچ مات ھروچ یک میجر گُھرامے ودی کن اَنت تاں اے جنگ روان انت میجر ودی بوھان بنت۔۔لَکاں لکّاں سُہریں دروت شہید بہار جان ءُ آجوئی جنزئے کُلیں شہیداں۔
تلّ سبز اَنت ءُ ٹیٹلیں آھوگ اش چر اَنت
بار کاھَنت پہ لاگریں اولاک ءَ کپ اَنت
,,,,,, ھلاس,,,,,,
