سیمی بہر
کؤر ءَ جھل ءَ من تاں آ سنگت ءِ کرا رَستاں من دیست کہ باز جاگھ پِیش بُرّراتگ کمب چیر کُتگ بلئے مان نہ داشتگ اَنت, سنگت ءَ من ءَ دیست چیر ءِ بروتاں کندگے جَتے ءُ درائینتے کلُو کُجنت؟ من گُشت کلُو باندا کئیت من ءُ سنگت سوار بوتیں شُتیں ھما ھلک ءَ کہ آدگے سنگت ودار ءَ اَتنت من اود ءَ گوں سربوھگ ءَ گُشت شُما وتی بُنزھ ءَ ٹہین اِت کلُو اود ءَ نبوتگ بلئے من باندا دُراھی داتگ اے ڈُبہ منی اِنت کلُو ءَ من باند ءَ الّم کاراں ھما بُنزھ جوڈ کنوکیں سنگتانی کِرا پیش کناں ءُ دوھمی گپ اش اِنت کہ اے کؤر ءَ چہ ھلک ءَ بُرز تِر من نہ شُتگاں بلئے کؤر ءِ جھل ءَ ھچ کمب مان نہ داشتگ کلُو ءَ وتی ھلک ءِ لانکبوج جاھ ءِ بُرّاِتگیں دہ بَروٹی,,, چانگ,, کَمب مانداشتگ اے گپ ءَ اگاں کلُو پاھو ءِ ھکّداراِنت گُڈا یکپارگے من ءَ پاھو بِدی اِت ما شُما کُل بلوچیں اچ ما شُما چُشیں کئے است کہ آئی ءِ ھلک ءِ لانکبوجی جنگل ءَ بُہ بُرئے آ منّیت؟؟
اشاں انگت بازیں جاھلی کُت گُڈسرا پہ زور ھمے بُنزھ ٹھینت ماکہ واتر بوھگ ءَ اَتیں من گوں ھما سنگت ءَ سینکل ءَ سوار بوتاں کہ بالگتر ءِ جاھمنند نہ اَت آئی من ءَ جُست کُت اے چے جیڈھے؟ من گُشت ادا دگے جیڈہ نیست اے مردُم گُش اَنت ما ادئے میر ءُ واجھیں اشانی ڈگار کوچگ ءَ اَنت نوں اے گُشنت اے ڈگارانی دپ ءِ پراھیں ڈنّ ءُ اے کؤر تاں کوہ ءَ برؤت مئے میراس اَنت ۔چوکہ اشاں گپ جتگ کلُو سلاھ بندیں کلُو ءَ اے کلنڈیں کلاش ھما روچی بڈّا کُتگ کہ بیل اسھاک ءَ دست ءُ پاد بستگ اَنت نوں تُرسیت کہ ھروچ یکے منی دست ءُ پاداں مہ بندیت کلُو پہ وتی ساہ ءِ رکینگ ءَ مُزاھمت کنئگ ءَ اِنت چوکہ مات ءَ گپ جتگ کلُوئی کستریں براس بہار جان یک پُہتہ ئیں مردُمے اسکولے نہ ونتگ بلئے پہمے بازاِنت بہار من ءَ گُمان بیت کہ یک سِلاھ بندیں پارٹی ءِ باسک جوڈ بوتگ ءُ اے مردُم کہ شُما بُنزھ ٹہینتگ چد ءُ ساری میر ساھب ءِ نزیکیں مردُم بوتگ اَنت ءُ نشنل پارٹی ءِ باسک اَنت نوں ھوش اِش کُتگ ءُ بی این ایم ءَ کاھَنت آجوئی جُنز ءَ ھوار بہ بنت بلئے من ءَ تئ ھمراھ دوست بوھگ ءَ نہ اِنت اے جیڈہ ءِ تہا ھمے مردُمانی ھکّ ءَ اِنت وھدے کہ کلُو بس وتی ھلک ءِ چاریں کُڈّکاں لوٹگ ءَ اِنت ءُ باندا من شُمئے ڈسّ ءُ نشان ءَ کارانے شُما گپانے وت گوش بداراِت گُڈا سنگت ءَ من ءَ جاھے نشان دات کہ باندا پِلاں جاہ ءَ کلُو ءَ بیار ایندگے سُھب ءَ کلُو اتک تاں وتی کلاشے بڈّ ءَ اِنت من کنداِت ءُ گُشت کلُو کم بھت اے مردُماں تئ ارزی داتگ من ترا لہتیں سنگت ءِ کرا بَرگاھاں ترا چوناھا کُشَنت پدا ترا کلاشے بڈّا کلُو ءَ گُشت ھؤ یار چد ءُ پیسر ھرکسی واجھی بوتگ کلُو لٹّانی چیر ءَ بوتگ بلئے من اُمیت کشّ اتگ کہ نوں مئے وتی براسانی بادشاھی اِنت بلکیں کلُو ءَ انساپے رسیت۔۔۔
بلئے من توئے عمر ءَ گُشاں اگاں من گُناھگاراں من ءَ ھمدا بُکش من گُشت اڈئے کلُو تو اینچو وھد ءَ منی سنگت بوتگ ئے تو من ءَ مورے ءِ کُشئگ ءَ دیستگ سوار بو سینکل ءَ بِریں ترا بِلے ھما کُشنت من ءُ کلُو کَندان بوتیں شُتیں پہ ھما سنگتانی ڈس ءُ نشان ءَ چہ وش اتک ءُ دُراھبات ءَ پد گپ بندات بوت اَنت ۔آ سنگتاں ھما مردُمانی گُشتگیں گپ جت اَنت ءُ گپانی میان ءَ بالگتر ءِ جاھمنندیں سنگت کلُو ءَ پجّہ نیاورت کہ شال ءَ وانگ ءَ بوتگ ات بلئے گوں من پجّاروک ات ھمے سنگت ءَ کلو ءَ گُشت تئ جیگ ءَ بچار پچ اِنت ترا کلاشے بڈّا گَردئے تئی برات بہار اوں سِلاہ بنداِنت اے وت تئ گُنڈائی ءِ شاھداَنت شُما یکبرے پیسرا مردُمانی پِیش مانداشتگ اَنت؟؟
کلُو ءَ پسو دات کہ واجہ منی جیگ پمیشکہ پچّ اِنت کہ منی گُد ھمے یکیں جوڈہ اِنت بَٹنے پِر نیست دوھمی کلاش من ءَ وتی ساہ ءِ رکینگ ءَ بڈءَ اِنت منی یک براسے کُشئگ بوتگ من ءَ پاتراپ دئیگ بوتگ منی چُنت برا دست ءُ پاد بندگ بوتگ اَنت ءُ منی کستریں برات سلاہ بنداِنت آ و سرمچارے بی آر اے ءِ باسک اِنت ءُ دگے باز مردُم سلاہ بنداِنت, مرچی بلوچستان ءِ گیشتریں بَچ سِلاہ بنداَنت منی سِلاہ آجوئی جُنز ءِ دیم ءَ نہ اوشتاتگ اگاں آروچ ءَ بلوچستان منی ھوناں بلوٹیت من ءَ اوں ھون ءِ دئیگ ءِ ھکّ اِنت ءُ پَرزاِنت ,دوھمی گپ پیسری پیش نہ من بُراِتگ اَنت نہ من مانداشتگ اَنت آ پیش پہ بہا ءِ واستہ مردُماں بُراِتگ اَنت ۔سرمچاراں منی اِشکُنئگ ءَ پیش ءِ بُرّگ ءُ بہا بند کُتگ بلئے اے مردُماں گُشتگ مارا بالگتر ءِ پارٹی ءِ زمہ دارے ءَ رَزا داتگ کلُو ءَ ھمے سنگت ءِ جند ءِ نام گپت کہ ھمدا نشتگ اَت۔
پدا گُڈا یک ٹَرکے ءُ دو سئے کؤرانی پیش سرمچاراں مانداشتگ اَنت من وانگ و نہ زاناں بلئے ونِندگاں گُشتگ اے پیشانی ماندارگ میجر گُھرام ءَ منّ اِتگ ۔ منی وتی ھلک ءِ لانکبوجی پیش کہ مردُماں بُراتگ دہ بَروٹی,, چانگ,, کَمب من مانداشتگ منی ھلک ءِ لانکبوجی پیش ءَ انگت ھرکس بُہ بُریت من وش نہ باں منی ماس ءُ گُھارانی اندیم اِنت ۔شُما اے دَمگ ءَ سرپد نہ اِت ادا ھزاراں زُلم ءُ زوراکی بوتگ بوھگ ءَ اِنت کلُو ءَ لہتیں مزن مزنیں زوراکی آنی نام گپت کلُو ھرکس ءَ دیستگ آ زانت کہ کلُو ھدّ ءَ چہ گیش رَپٹیت اینچو گپ ادا نبشتہ اوں نہ بیت بلئے کلُوئی ھچ گپ ءِ پسو سنگتانی کرا نیست ات کلُو سرتاں پاد دردے اَت ۔ھما ڈنّی سنگت ءَ سرجمیں جیڈہ پہم اِت کہ واکی کلُو یک بوچُکے ءَ اوں گُناھ گار نہ اِنت کلُوئی ارس چہ چمّاں شیپ گران اَتنت بالگتری ڈاک ءَ یک کُڈکے ءِ روتاپ ءَ جنوری ءِ ماہ ءِ گوریچ کلوئی ارساں چہ سیاھچکیں انارکاں دیم گوزگ ءَ نئیلگ اَتنت ھما ڈنّی سنگت مارگ ءَ اَت کہ درد چِد ءُ دیم گوشدارگ نہ بیت گُڈا آ سنگت ءَ کلُو امبازاِت ءُ گلائیش کُرت ءُ گُشت بس, بس, بس ,,,, کلوئی بے گُناھی کہ پدّر بوت اَنت ھما ڈنّی سنگت ءَ پہ مزاک ءُ وش گپی گُشت کلُو یار ترا ادا میر نندگ ءَ نئیل انت تو منی کرا بیا من ترا دوبان یک باگے گوں مشینے ءَ دیاں گُڈا کائے؟؟
کلُو ءَگُشت شُما منی واجہ اِت بلئے دُنیا ءِ توک ءَ چُشیں ھوڈیں مردم نیست کہ آئی ءَ چہ سیاھیں ڈنّ ءَ کُڈکاں بہ بَر ءُ باناں بنادین ءُ باگے بدئے آ مہ زُوریتے گوں کلوئی ھمے گپاں ما چاریناں ٹہکے دات کنداِت درد ءِ شیشگ پروشت اَنت ھما ڈنّی سنگت ءَ گوں بالگتر والا سنگت ءَ گُشت اینچو زوراکی کہ کلُو بیان کنئگ ءَ اِنت تو اشانی بارو ءَ چینچو سرپدئے؟ بالگتر والا سنگت ءَ گُشت من چُشیں ھچ جیڈہ ءَ سرپد نہاں, پدا من ءَ جُستے کُت کہ تو؟ من گُشت کلُو ءَ اینچو کہ بیان کُتگ دو ھمینچو۔۔۔۔۔
روان اِنت۔۔۔۔۔۔۔
