منی واھگانی جنگل ءَ تئی مھراں داوایے ءِ شُبین دات، بلکیں من ءَ انچیں تْرندیں بیھاراں گوں ماں بست کہ من ھِچّ نہ گوشت، نہ زان آں تو چے پھم اِتگ۔۔۔۔۔۔۔۔؟
تئی ھیال ءَ من تُرسوکیں مردے آں کہ ھِچّ نہ گْوشتگ۔۔۔۔۔۔۔۔۔؟ بلے یار آ گوں من ءَ سک نرم نرم ءَ گپّ ءَ اَت ءُ انچو سما بوت کہ آ زانگ ءَ اِنت کہ ما ھردوئیناں گوں یکّے دومی ءِ رُو ءَ مھر کُتگ۔۔۔۔۔۔۔۔۔
پمشکا آ ھمے جیڑگانی دیمپان اِنت کہ اے نوں سِندگ نہ بیت، گُڑا چوں اِیشی ءَ پہ گِستائی ءَ لاچار بِہ کن آں۔۔۔۔۔
مھرانی اے داوا وتی گُڈّی سِیمسر ءَ سر اَت، پمشکا من دل ءَ جیڑ اِت کہ اِے وَ نہ بیتگیں گپّے کہ بلوچی دُود ءُ ربیدگ مارا پہ مھر کنگ ءَ بدار اَنت ءُ وتی سانکلاں بہ بند اِیت۔
دل ءَ جیڑ اِت کہ مئے بلوچی دُود ءُ ربیدگ چوشیں پدمنتگ ءُ زالمیں دُود وَ نہ اَنت کہ مارا چہ یکّے دومی ءَ مھر کنگ ءَ بدار اَنت ءُ واھگانی شھدیں تُنّ ءَ گیش بِہ ودّین اَنت ءُ مارا پہ مُجّتی ھوشامی ءُ سربتگ۔۔۔۔۔۔۔۔۔۔۔۔۔
من گوں ھمے جیڑگاں گُلائیش اِت آں کہ چہ ھیالاں ھلوتے ءَ چِڑکّہ کُت ءُ گْوشت یار مئے دُود ءُ ربیدگ چو پدمنتگ نہ اَنت کہ مئے مھر ءِ سپر ءَ راہ ءِ نیم ءَ نیم بُندگ بِہ کنت، بلکیں آ اَنگت مارا سِکین دنت کہ مھر زِندگ بُوَگ ءِ مستِریں کارست اِنت کہ ترا زِندگی کنگ ءِ درس ءَ دنت۔ ترا مردُم ءِ اَرزشت ءَ پوہ ءُ سرپد کنت، ترا ھاٹیگ شکسا اِیت ءُ گیشتر توانمند ءُ تمرد کنت۔ تئی پاداں جُنزگ ءِ توکل ءُ ھر وڑیں زُوراکی ءِ دیمے دارگ ءِ سِکین ءَ دنت، گُڑا چتور بلوچی دُود ءُ ربیدگ منی مھر ءَ زِندانی کُت کنت۔۔۔۔۔۔۔۔۔۔
ھمے گڑ ءُ منج ءِ مْیان ءَ اِشکارگے ءَ وتی سُنٹ نوداں کُت ءُ چاگِرد سھرا بوت، ءُ گُوشاں ھمے ھبر ژونگگ ءَ اَت کہ چاگِرد شُمارا ھور بُوَگ ءَ نیل اِیت ءُ پہ دائِمی رُزوا ءُ بنّام کنت۔۔۔۔۔۔۔
یکرندے پد ءَ من گوں وت ءَ جیڑ اِت ءُ جُست کُت کہ چاگِرد کَے اِنت۔۔۔۔۔؟، اے چاگرد ءِ چونیں بنی آدم اَنت کہ منی وشیانی دُژمِن ءُ راھسر ءَ ڈنگر جَنَگ ءَ اَنت۔۔۔۔۔۔۔۔؟
گوں وت ءَ ساھتے ءِ جیڑگ ءُ سوڑگ ءَ پد من ھمے آسر ءَ سر بوت آں کہ چاگِرد ءِ ھمے مردُم وت مئے مھر ءَ شیشاریں مھر ءِ کالب ءَ نبشتہ کنگ ءَ اَنت، اے چتور منی مھر ءِ رھسراں دِیوال مِکّ ءُ ڈنگر جن اَنت۔۔۔۔۔۔۔۔۔۔۔۔۔۔۔
کسانیں بے تواری یے ءَ پد من ءَ ھمے پسّو چہ وتی باتِن ءَ رس اِت کہ اے دو دیمی آدینک ءُ مئے مھر ءِ دُژمِن۔۔۔۔۔۔۔۔۔۔۔۔۔
جیڑگ جیڑگ ءَ ھیالانی سر سِست ءُ من دُور ماں گْوست ءِ تاکانی لیٹینگ ءَ مُلمہ بوت آں ءُ چہ زُبان ءَ ھمے در آتک کہ من وت آں اے چاگِرد ءُ منی دوستدار اِنت۔۔۔۔۔۔۔۔۔۔، گُڑا ما ھم وتی مھر ءِ دُژمِن۔۔۔۔۔۔۔۔۔۔؟
پد ءَ ھیال کُت کہ تھنا چاگِرد ما نہ اِیں، بلکیں اِد ءَ بلائیں لشکرے ھست ءُ اے دُرست گوں چاگرد ءَ بندوک اَنت۔۔۔۔۔۔۔۔۔۔۔۔۔۔
گوں ھمے ھبراں ھور چاراں دِل ءَ جُستانی لڑے سرکشّان بوت ءُ گْوشگ ءَ لگ اِت کہ ما اے لشکر ءِ اُرش ءِ بگیری ءَ کُت کن اِیں۔۔۔۔۔۔۔۔۔، بلے اے چاگرد ھانی ءِ نام ءَ پرچا پہ وتی سنگینیں جِنکّاں دوست دار اِیت۔۔۔۔۔۔۔۔۔۔؟ شے مُرید ءَ پرچا ھر کِسّھاں چو کُران ءَ تلاوت کن اَنت۔۔۔۔۔۔۔۔۔؟ سسّی ءُ پُنّو ءَ پرچا زیارت کن اَنت۔۔۔۔۔۔۔؟، شھداد ءُ مھناز ءِ داستان پرچا کتابانی زیب ءُ زینت۔۔۔۔۔۔۔؟ اِیشاں کَے وان اِیت۔۔۔۔۔۔۔۔۔۔؟
چہ اے جُستانی زِر ءَ اُوژناگ کنگ ءَ پد من گوں وتی مھر ءَ اھد کُت ءُ گْوشت کہ دِل تپرکہ مبو، بِل کہ اے چاگِرد ءِ لھتیں ناپوہ مرچی مارا دُود ءُ ربیدگانی لگتمال کنوک گْوش اِیت ءُ وڑ وڑیں تژن ءُ شِگاناں پہ مئے بالاد ءَ شات کنت۔۔۔۔۔۔۔۔۔۔۔۔۔۔۔۔۔۔۔، بلے جزماں کہ ما باندا ھمیشانی چمّ ء کلّ ءَ مھر ءِ کِشار ءَ گوں توکل ءِ مُھکمی ءَ آپ دے اِیں ءُ سبزینیں دانکہ باندا دِگہ مھرے اے ناپوھانی دست ءَ زوال مہ بیت۔۔۔۔۔۔۔۔۔۔۔۔۔۔
***
