بلوچ آزادی پسند رہنما اور بلوچستان لبریشن فرنٹ کے سربراہ ڈاکٹر اللہ نذر بلوچ نے پاکستان کے ساتھ ساتھ چین کو بھی بلوچ قوم کی نسل کشی میں ملوث قراردیکر اقوام متحدہ سے بلوچستان میں امن فوج تعینات کرنے کا مطالبہ کیا ہے۔
انہوں نے یہ بات مائیکرو بلاگنگ ویب سائٹ ٹوئٹر پر اپنے ٹویٹس میں کہا۔
ان کا کہناتھا کہ چینی کمیونسٹ پارٹی سامراجی عزائم کے ساتھ بلوچ عوام کی نسل کشی اور بنیادی انسانی حقوق کی خلاف ورزیوں میں براہ راست ملوث ہے۔ ہم بطوربلوچ قوم دنیا سے مطالبہ کر رہے ہیں کہ انہیں انسانی حقوق کی سنگین خلاف ورزیوں کا نشانہ بنایا جا رہا ہے۔
بلوچ رہنما نے اقوام متحدہ،یورپی یونین، امریکا، برطانیہ اور دیگر ممالک سے مطالبہ کرتے ہوئے کہا کہ وہ بلوچ وطن کو متنازع علاقہ قرار دیں اور اقوام متحدہ اپنی امن فوج بلوچستان میں تعینات کرے۔
انہوں نے کہا کہ میں اپنے پڑوسیوں افغانستان، ایران اور بھارت سے اپیل کرتا ہوں کہ وہ بلوچ قوم کی آزادی کی تحریک کا ساتھ دیں۔
آزاد بلوچستان خطے میں امن و سلامتی کا ضامن ہوگا۔
