” مرد ھما اَنت کہ مِر اَنت براتانی رم ءَ
نام اِش مانیت ماں جھان ءَ چو رُستم ءَ "
زِندگی سپرے ءُ ما کُل اے سپر ءِ مُساپِر۔۔۔۔۔۔۔۔۔، بلے اے سپر ھما مُساپِر ءَ گیر کار اِیت کہ آ اے سپر ءَ دم برّگ ءِ نام ءَ نہ زانت ءُ جُنزگ ءِ ھاٹیگ مُدام سوھان۔۔۔۔۔۔۔۔۔۔
ساجد جان! من گوں ترا زِندمان ءِ ھمگرنچیں کُجام کِسّھاں بیاراں دانکہ تئی نمیریں ارواہ سارتیں آھے بِہ کشّ اِیت ءُ ھمے کلوہ ءَ بِہ دنت کہ ما انگت شُمئے مجلِساں ساڑی ءُ جنگ ءِ بابت ءَ سوڑگ کنگ ءَ اِیں۔۔۔۔۔۔۔۔۔
ساجد جان ترا یات اِنت۔۔۔۔۔۔۔۔۔۔۔! من کہ ترا اولی رند ءَ ابدمانیں جنگی جان ( جنگیان ) ھنکین ءَ دیستگ اَت تو کسان اِت ئے۔۔۔، بلے مُدام کہ منی سر تئی میتگ ءَ کپت تو الم مئے دیوان ءَ اتک ئے ءُ وت ءَ سھرا کُت۔
ھمے رنگ ءَ وھد پِرگْوزان ءُ تو وتی گاماں دیم ءَ شھار دیان اِت ئے۔ کولواہ ءَ کُجا کہ روانک ءُ راجی مُچّی یے بی این ایم یا بی ایس او آزاد ءِ نیمگ ءَ ٹھینگ بوت، تو گوں سنگتاں ھمود ءَ ساڑی ءُ پہ کارانی گیش ءُ گیوار ءَ چاڑِکّہ ءُ گُشاد اِت ئے۔
پمشکا ساجد جان من اے گپّ ءَ پہ جزم گْوش آں کہ زندگی بے وپایے نہ اِنت چو کہ بازیں کسے گْوش اِیت۔۔۔۔۔، ءُ من اے گپّ ءِ منّوگِر نہ آں کہ زِندگی بے وپایے۔۔۔۔۔۔۔۔۔۔
چی ءَ کہ پہ درور تو منی دیم ءَ وت ساڑی ئے، تو گوں زِندگی ءَ وپا کُت، اے زِندگی ءَ ترا تئی رَوَگ ءَ پد اُوں زندگ کُتگ ءُ تو پہ مُجّتی ابدمان ئے۔۔۔۔۔۔۔۔۔۔۔۔۔
ساجد جان۔۔۔۔۔۔! منی نزّیک ءَ ھر بنی آدم ڈیوا ءُ زندگی وٹّ ءِ درور اِنت۔۔۔، اے وٹّ سُچان ءُ مردُم چہ بُرزگ ءَ دیم پہ جھل ءَ سرگِران بیت۔۔۔۔۔۔۔، بلے ھمے بودناکیں بنی آدم کہ وت ءَ ڈیوا ءُ زِندگی ءَ وٹّ سرپد بَہ اَنت۔۔۔۔۔۔۔۔۔۔۔۔۔۔۔۔۔۔۔۔۔، گُڑا آ چہ ھمے وٹّ ءِ دوتاں پہ وت کارِستے ساز اِیت ءُ آیوکیں پدریچ ءَ گْواچن ءُ مادنیں دگ ءَ شون دنت۔۔۔۔۔۔۔۔۔۔
ساجد جان۔۔۔۔۔۔۔! تو پہ سِتک ڈیوا ءُ تئی زِندگی مرچی سِکین ءُ کارِستے جوڑ بوتگ۔۔۔۔۔۔۔، ترا تھنا تئی کھول۔۔۔۔۔۔، مکھیں مات ءُ پِت۔۔۔۔۔۔۔۔۔۔۔۔، مھرانی ھزار مُرادیں لوگبانُک ءُ ٹھلیں بچّ۔۔۔۔۔۔۔۔۔۔۔، تنگوئیں برات ءُ لاڑُکیں گْوھار گیر نیار اَنت۔۔۔۔۔۔۔۔۔۔۔۔۔۔، بلکیں ترا تانسریں بلوچ راج گیر کار اِیت۔۔۔۔۔۔۔۔۔۔۔۔۔۔۔۔۔۔، جنگ ءُ گھگیری ءِ پِڑ ءَ تئی راجپانی ءُ جنگولی ءِ کِسّھاں کار اِیت ءُ وتی زھگاناں لیلو ءُ تئی دابیں سرمچنڈانی دیمونی ءِ داستان ءَ وانین اَنت۔۔۔۔۔۔۔۔۔۔
ساجد جان۔۔۔۔۔! ھمے رنگ ءَ جاھے میلکم ایکس گْوش اِیت: اگاں شُما پہ اِیشی ءِ ھاتِر ءَ مِرگ ءِ واستا جاڑی نہ اِت، گُڑا اے لبز ءَ ” آجوئی ” چہ وتی لبز بلد ءَ بِہ کش اِت ( اگر آپ اس کے لیے مرنے کو تیار نہیں تو لفظ "آزادی” کو اپنی لغت سے نکال دیں )۔
بلے! ساجد جان تو گوں وتی سرمچنڈ ءُ راجپانیں سنگتاں اے سابِت کُت ءُ پیشداشت کہ ما وتی زِندمان ھمے لبز ” آجوئی ” ءِ پھریزگ ءَ کولیگ۔۔۔۔۔۔۔۔۔۔۔۔۔۔۔۔۔، ءُ ھمے کولیگی ءِ دِیدانک راجانی مُجّتی ئیں زِند ءِ مانزمان۔۔۔۔۔۔۔۔۔۔۔
ساجد جان۔۔۔۔! اے راستی یے کہ ” مکسد بِہ مِر اِیت اِنسان مِر اِیت، بے مکسدیں زِندمان اگاں چینچو دْراج کشّ بِہ بیت بلے چہ مرگ ءَ بدتِر اِنت۔۔۔۔۔۔۔۔۔۔۔۔۔
تو گوں وتی ورنائیں سنگتاں اے درونت بلوچ راج ءِ دِلبند ءَ نوشتہ کُت کہ پہ زِندگ بُوَگ ءِ ھاتِر ءَ دْراج کشّیں زِندمانے ءِ پکار نہ اِنت۔۔۔۔۔۔۔۔۔۔، بلکیں پہ مُدیمی ئیں زندگی ءِ واستا شیشاریں کِردارے ءِ ھُدابُند بُوَگی اِنت۔۔۔۔۔۔۔۔۔۔۔، اگاں نا تھنا دْراج کشّیں زِندگی ترا ابدمان نہ کنت۔۔۔۔۔۔۔۔۔
ساجد جان۔۔۔۔! تو گوں سنگتاں مارا اے زانت ءُ سرپدی ھم شکسات کہ راج نہ منت، شُما ھم نہ مان اِت۔۔۔۔۔۔۔۔۔، بلکیں پہ راج ءِ ابدمانی ءَ مارا وتی سرانی دیمونی دَیَگی اِنت۔۔۔۔۔۔۔۔۔۔۔
ساجد جان۔۔۔۔۔! من پہ تئی گِردانکیں بالاد ءَ چے کہ نوشتہ بِہ کن آں کم۔۔۔۔۔۔۔۔۔۔، چی ءَ کہ تئی داتگیں دیمونی راجدپتر ءِ تاکاں وت یک زانت بکشوکیں درونت ءُ ابدمانیں کِسّھے پہ آیوکیں پدریچ ءَ۔۔۔۔۔۔۔۔۔
بس! گُڈّی ءَ من ساجد جان ھمے گْوش آں کہ تو چو ڈیوا ءَ اے گیدی ءِ دِلبند ءَ پہ مُجّتی بل ئے۔۔۔۔۔۔۔۔۔، تئی رُژن ءِ شھماں ناشی ءَ ھوار ھِچّ رنگیں ھیروپ، دنز ءُ مُج، تند ءُ گُبار کوار ءَ کُرت نہ کنت۔۔۔۔۔۔۔
***
