ما ھور ءُ ھوار اِت اِیں، کندگ ءُ مسکرا، سلام ءُ دُوا، کلوہ ءُ ھال، زِند ءِ آشوبیں بیٹ سراں شات ءُ گل، سنگت پہ ھُبّ ءُ مھر زِند ابدمانی ءِ وشبو چکاریں سپر ءَ رھادگ۔۔۔۔۔۔۔۔۔۔۔۔
اے ھبر ھِچّ رنگ ءَ وھم ءُ گُمان ءَ نہ اَت کہ چو زُوت مھرانیں ھمبل شھیدانی لڑ ءَ ھوار بَہ اَنت۔۔۔۔۔۔۔۔۔
پمشکا! مرچی منی بے ھاٹیگیں ند شھیدانی کوھیں بالاد ءُ نمیرانیں کِرد ءِ ھِچّ سِپت ءُ ستا ءَ کُت نہ کنت، چی ءَ کہ منی نِزویں ند ءَ را ھِچّ ستک ءُ بیسّہ بُوَگ نہ اِنت کہ سنگت اَچ ما دُور رپتگ ءُ شھید بوتگ اَنت۔
بلے! وھدے سنگتانی شھیدی ءِ اکساں گِنداں، گُڑا وتی بے باوریں زِرد ءُ بے ھاٹیگیں ند ءَ تسلّا دیاں کہ ھمبل پہ دائِمی ابدمان بوتگ اَنت۔
گوں ھمے جیڑگ ءُ مارِشتاں وھدے من ءَ گُلزمین ءِ سوگاتیں بچّانی مھر ءُ ساوڑیں گیر ءُ تْرانگ کہ چاگِرد کن اَنت، گُڑا یکرندے پد ءَ منی چمّانی دیم ءَ منی بے ھاٹیگیں ند میلانک بیت ءُ پہ ھلوت گْوش اِیت کہ چے نبشتہ بِہ کن آں۔۔۔۔۔۔۔۔۔۔۔۔
سگار جان۔۔۔۔۔، اتا جان۔۔۔۔۔، ھمّل جان۔۔۔۔۔، سمیر جان۔۔۔۔، تاھیر جان یا بال دوست۔۔۔۔۔، پہ کَے ءَ ءُ کئی بابت ءَ نبشتہ بِہ کن آں۔۔۔۔، چے نبشتہ بِہ کن آں۔۔۔۔۔۔۔۔
چی ءَ کہ زِندمانی ءِ دْراھیں کِسّہ چہ منی ڈڈّر ءَ بانزُل اِش رُودینتگ ءُ گوں کونجانی رماں بال بستگ ءُ رپتگ اَنت۔۔۔۔۔۔۔۔ بس لھتیں زپتیں یات اَنت کہ دِل ءِ پلّو ءَ چو تند ءَ ماں پُوش اِتگ اِش۔۔۔۔۔۔۔۔
چہ ھمے تند بستگیں یاتانی پُتینک ءَ مھرانی ساچانیں ساھِگ، بھادُری ءِ بے دروریں کارِست، جپاکشّی ءِ گوھریں پند، بودِشت ءُ لائِکی ء زانت بکشیں سبکّ، کندگ ءُ مسکرائی۔۔۔۔۔۔۔۔۔۔۔۔۔۔۔کُجام کُجام کِسّھاں بیاراں ءُ ند ءِ زُبان ءَ چو مُھرگ ءَ بِہ کمایاں۔۔۔۔۔۔۔۔، چی ءَ کہ منی نِزّ ءَ اے راجدپتر ءِ ھما کارِستاں گوں منی چاریں لبزاں کماھگ نہ بَہ اَنت۔۔۔۔۔۔۔۔۔
اے ھمبلاں گوں کُجام ساھتاں مردُم دُچار کپتگ دل ءَ گرکے جتگ ءُ ارواہ تاجگ بوتگ، چی ءَ کہ اِیشاں گوں وتی مھروانی ءَ مئے گمانی گرمیں ساھگ گوں وتی مھراں سارت کُتگ، پرے ھاتِر ءَ مارا سما نہ کپ اِیت کہ ما چہ جتا جتائیں ھند ءُ دمگاں سْیادی دار اِیں۔۔۔۔۔۔۔۔۔۔بلکیں ھمے زانتگ ءُ پھم اِتگ کہ یکّیں گِس ءِ مردم ءُ پہ راج ءِ پاسپانی ءَ مِرگ ءِ واستا یکّیں سنگر ءَ ساڑی۔۔۔۔۔۔۔۔۔
ھمے سِستگیں ھیالانی دامُن ءَ وھدے من ھمّل جان تئی کْوھنیں توار بندے گُوشداشت کہ مسکرائی ءِ سر ءَ کندگ ءَ اَت ئے، ءُ من پہ بےھیالی گوں وت ءَ گْوشت۔۔۔۔۔۔ترا دیر اِنت تو ھال نہ کُتگ، چوں زان ءَ مارا شموشتگ ءُ بے ھال کُتگ۔۔۔۔۔۔۔۔۔؟ پد ءَ زُوت ھیال اتک کہ تو پہ دائِمی ابدمان بوتگ ئے یار۔۔۔۔۔۔۔۔۔۔۔! گُڑا ناگتی چہ لھڑیں جبین ءَ آھے درآتک ءُ تْرانگانی نوکیں جمبرے ساچان بوت۔۔۔۔۔۔۔۔۔۔
چاراں چمّانی آدینک ءَ گُلیں کولواہ سھرا ءُ سمیر جان ءِ تیر وارتگیں بالاد۔۔۔۔۔۔۔۔۔۔، بلے سمیر جان ءِ توکل مُھکم ءُ پہ راج ءِ نام ءَ کلوھے درشان کنگ ءَ اَت کہ بِہ گِندئے من تیر وارتگ ءُ نمیران بباں۔۔۔۔۔۔۔۔۔، بلے منی اے چاریں دانک منی راج ءَ را سر بِہ بَہ اَنت کہ ما پہ شُمئے وشھال ءُ آجوئیں آکبت ءِ واستا کوھاں یاگی ءُ دُژمِن ءِ اے شِل سریں تیرانی سینگ ءَ پہ جاہ دَیَگ ساڑی۔۔۔۔۔۔۔۔
سمیرجان! تو پہ زمین ءِ موکگ ءِ جنگ ءَ چاڑِکّہ اَت ئے، من ءَ یات اِنت کہ تو مزاک کُت ءُ گْوشت مادر ءِ آجوئی ھون لوٹ اِیت، من وتی تْرمپے ھون رِتک ءَ، مادر ءَ را پہ ما دِگہ چے کار ھست۔۔۔۔۔۔۔بلے من زاناں کہ مادر پہ تْرمپے ھون ءَ ھِچّ سلاہ نہ کنت۔۔۔۔۔۔۔، چی ءَ کہ مادر ھون ءَ سیرآپ نہ اَت کہ مرچی پد ءَ مادر ءَ را تئی تْرمپے ھون ءِ درکار بوت ءُ تو پہ مادر ءَ ھون ءِ دَیَگ ءَ مھتل نہ بوت ئے۔۔۔۔۔۔۔
ھمے رنگ ءَ تئی ھمراھی ءَ بالی جان ءِ شھدیں کندگ ءُ ٹھکّانی توار گُوشاں پیداک اِنت، انچو سما بیت کہ دیوال ءِ پُشت ءَ گوں سنگتاں مزاک ءُ مسکرائی کنگ ءَ ھوار ھمے گْوشگ ءَ اِنت کہ مارا اے دُژمِن یک انچیں تھے کشّگی اِنت دانکہ وتی نماسگاں اے کلوہ ءَ بِہ دنت کہ بلوچ ءِ ڈگار ءِ سر ءَ پہ باھوٹی، پہ مھمانی روئے ترا چمّانی سر ءَ جاہ دنت، بلے پہ زُوراکی ءُ زُورانسری تئی دیم ءَ چو گِردانک ءِ کوہ ءَ میلانک بیت۔۔۔۔۔
بالی جان! من تئی بارو ءَ دِگہ چے نبشتہ بِہ کن آں۔۔۔۔۔۔۔۔؟ چی ءَ ءَ کہ تو گوں وتی جنگی رِپک ءُ ھُنراں جتائیں داستانے اِت ئِے، جنگ ءِ تک ءُ پھناتاں پوہ ءُ سرپدیں سرمچارے اِت ئِے۔ مرچی جنگجاہ ءَ تئی جنگ ءِ نشانی پشت کپتگ اَنت ءُ تو چو کوھے ءَ چیدگ ءُ ھمے گْوشگ ءَ ئے کہ من دوبر واتر باں ترا پہ اِیمنی نیلاں۔۔۔۔۔۔۔۔۔۔۔۔۔۔، جزماں دُژمِن کدی پہ اِیمنی نہ بیت ءُ تو دوبر واتر کائے۔۔۔۔۔۔۔۔۔۔۔۔۔۔
ھمے رنگ ءَ اگاں کسے تئی جنگی کِسّھاں کار اِیت۔۔۔۔۔۔۔۔گُڑا تاھِیر جان ھم شموشگ نہ بیت۔۔۔۔۔۔۔، چی ءَ کہ آئی ھم گوں وتی بھادُری ءَ اے دُژمِن آسیگ کُتگ اَت، بلے مرچی تاھِیر جان ءِ رَوَگ ءَ سرجمیں کولواہ ابیتک ابیتک ءُ ملور ملور اِنت۔۔۔۔۔۔۔۔ تاھیر جان! مرچی منی ند چے کہ پہ تو نبشتہ بِہ کنت کم اِنت، چی ءَ کہ تئی جنگانی کِسّھاں یک اھدے گوناپ داتگ ءُ دانکہ بلوچ راج ءِ آیوکیں پدریچ ترا گیر کار اِیت۔۔۔۔۔۔۔۔۔، گُڑا تئی تْلاریں بالاد منی چاریں لبزانی مھتاج نہ اِنت۔۔۔۔۔۔۔۔۔۔
ھمے رنگ ءَ من گوں سگار جان ءُ ناسِر جان ءَ آژنا نہ اِت آں، بلے آیاں گوں وتی زمین ءِ مھراں اے سابت کُت کہ ما پہ زمین مُرت کن اِیں بلے لگور نہ بَہ اِیں کہ باندا بلوچ راج مارا بدّیں نامے ءَ توار بِہ جنت ءُ لگور بِہ گْوش اِیت۔۔۔۔۔۔۔۔۔۔اے ھبر سگار جان ءُ ناسِر جان ءَ پہ وت شات نہ بوت ءُ ماتیں زمین ءِ آجوئی ءَ کولیگ بوت اَنت۔۔۔۔۔۔۔۔۔
دل ءَ جزماں! آجوئی ءِ اے جُھد وتی گُڈّی مِنزل ءَ سر بیت ءُ شھیدانی داتگیں دیمونی بے سیت نہ بَہ اَنت، بس جنگجاہ ءُ سنگراں الم ھمبلانی کمّی مارگ بیت۔۔۔۔۔۔۔۔۔۔۔۔
***
