گُلامی ھما ھوپ اِنت کہ اِشی ءِ دْراہ بُوَگ ھون لوٹ اِیت، بزّگی، در پہ دری لوٹ اِیت۔ گُلامی ءِ دیم ءَ چو کوہ ءَ مِکّ بُوَگ لوٹ اِیت، گُڑا چہ اے ھوپ ءَ رکّیں ءُ آزگیں زیم دْرواہ بَہ اَنت، پرچا کہ ابید ء ھون ءَ اِشی ءِ درمان دِگہ نیست، ءُ بلوچ اے ھوپے دْورائی ءَ در کپتگ۔ نوں اے شُومک ءِ نادْراھی وتی گُڈّی سیمسراں سر بوتگ ءُ بلوچ ءِ لجّ ءُ ننگ ءِ سر ءَ کپتگ۔
پمشکا مارا نوں زانگی اِنت کہ گُلامی ءِ اِیرھت گوں دیمونی ءَ بیت، اگاں ما پہ دیمونی ءِ دَیَگ ءَ ساجو ءُ چاڑِکّہ بت ِیں گُڑا گُلامی پہ دائِمی نہ مان اِیت، بلکیں زُوت چہ مئے سرڈگار ءِ سر ءَ گار ءُ گُمسار بیت۔
مرچی دُژمِن ءَ دست پہ مئے لجّ ءُ ننگ ءَ شھار داتگ، بلے من اے گپّ ءَ پہ پھر گْوش آں کہ بلوچ راج ءِ شاری ئیں زالبُول مھکم ءُ بھادریں زالبُول اَنت۔ دُژمِن گوں وتی کُجام رِپک ءُ پندل، زُلم ءُ زُوراکیاں بلوچ زالبُولانی سر ءَ کھر بِہ گْوار اِیت، منی راج ءِ شیرزال ھچ وڑ ءَ چہ وتی راستی ءُ ھکّ ءِ راہ ءَ پدکِنِز ءُ پہ ھر وڑیں دیمونی ءِ دَیَگ ءَ چک ءُ پد نہ بَہ اَنت، چی ءَ کہ آ اے ھبر ءَ شرّی ءِ سر ءَ زان اَنت اے گُلامیں زِند ءِ اندر ءَ مئے لجّ ءُ ننگ ھِچّ رنگ ءَ پھریز نہ بیت، گُڑا پرچا ما گوں وتی کماش ءُ تنگوئیں براتاں، گوں ھزار نازیں بچّاں اے راجی آجوئی ءِ جُنز ءَ دیم ءَ نہ بر اِیں دانکہ مئے لجّ ءُ ننگ بِہ رکّ اِیت ءُ باندات رُژناہ بِہ بیت۔
پرے ھاتِر ءَ من گْوش آں کہ اے پہ منی راج ءَ ھژدری اِنت کہ آئی بچّ ءُ جِنکّ یکّیں سنگر ءُ راجکاری ءِ پِڑ ءَ دست پہ دست ساڑی بِہ بَہ اَنت، چی ءَ کہ اے گُلامی ءِ ھوپ ءِ درمان ءُ اِلاج آجوئی اِنت، ءُ ابید ء آجوئی ءَ راستے کہ ما در پہ در ءُ ھاک پہ سر بَہ اِیں، پمشکا منی راج ءِ ھر جِنکّ ءِ اے پرز بیت کہ آ چو کریمہ ءُ شاری ءِ داب ءَ جُھد ءِ پِڑ ءَ ساڑی بِہ بَہ اَنت۔ چو روزینہ، مات سدگنج ءُ کسانسالیں بکتی ( بختی ) ءِ وڑ ءَ دُژمِن ءِ تیراں سینگ ءَ جاہ بِہ دے اَنت، دانکہ پہ دُژمِن ءَ بیھار ءُ پہ آیوکیں پدریچ ءَ سکینے بِہ بَہ اَنت۔۔۔۔۔۔۔۔۔۔
چی ءَ کہ مارا گُلامی ءِ ھوپ مرچی اِلاج کنگی اِنت، اگاں مرچی گُلامی ءِ ھوپ درمان کنگ مہ بیت گُڑا باندا مارا سرجم ءَ وتی چنکّاں زور اِیت ءُ بلوچ ءِ ننگ نہ، بلکیں بلوچ ءِ نشان پشت نہ کپ اِیت۔۔۔۔۔۔۔۔۔۔
پمشکا مارا اے ھوپ مرچی گُٹگِیر کنگی اِنت دانکہ باندا مئے آیوکیں پدریچ وتی زیبائیں سرڈگار ءِ سر ءَ شان ءُ زِندگی بِہ کنت ءُ وتواجہ بِہ بیت۔
جزماں! منی راج ءِ شاری ئیں شیرزال پہ وتن ھر رنگیں دیمونی ءِ دَیَگ ءَ ساڑی بیت، چہ سالاں زرینہ مری، ھنیپہ بُگٹی ءُ دِگہ بازیں۔۔۔۔۔۔۔۔۔۔۔، پرے زُوتاں بانُکیں گْوھار نورجان ءُ بلوچی زُبان ءِ نامداریں زالبُول شائِر ھبیبہ پیرجان کہ زِندان ءِ تھارونکیں کُوٹیانی اندر ءَ گوں ناشریں ریاست ءِ زُلم ءُ زُوراکیاں دیم پہ دیم اَنت، ھمے داب ءَ بلوچ راج ءِ ھر جِنکّ ءُ بچک پہ ماتیں گُلزمین ءِ آجوئی ءَ جاڑی بِہ بیت ءُ کُربانی دَیَگ ءِ لیکہ ءَ مُھکم بِہ کنت دانکہ باندا آیوکیں پدریچ سرجھل کنگ ءِ بدل ءَ پہ دائِمی پھر شاناں بِہ بیت۔
***
