بلوچ راج دوستیں رھشُون واجہ ڈاکٹر اللہ نزر بلوچ ءَ ‘کورونا وائرس’ ءِ سر ءَ ماں بلوچی ءُ براھوئی زبان ءِ تہ ءَ بلوچ راج ءَ را اے مزنیں وبا ءِ بابت ءَ وتی یک تامُرے یے تہ ءَ کلوہ دَیگ ءَ اِنت ۔
بلوچ راجی رھشون واجہ ڈاکٹر اللہ نزر بلوچ تْران کنان ءَ وتی بلوچ راج ءَ را ھمے کلوہ ءَ دَیگ ءَ اِنت کہ منی راج ءِ پیر ءُ ورناھاں مرچی دنیا ءِ تہ ءَ کوروناے نام ءَ یک وبایے شِنگ اِنت بلے بلوچ راج ءِ سر ءَ ساری ءَ چہ یک وبایے ھست آ پاکستان ءِ فوج ، آئی اسٹیبلشمنٹ ءُ آئی کبزہ گیری اِنت ،ھمے بابت ءَ وتی راج ءَ گوں تْراں کنان ءَ گْوشت ئے کہ بلوچ راج چہ دْرستیں انسانی بُنِکّی ھکّاں چِہ ساری ءَ زبھر اِنت ۔ پاکستان ءِ کبزہ ءَ را بلوچستان ءِ سر ءَ 72 سال سرجم اِنت کہ انگت اِد ءَ نہ جوانیں نادراہجاہے ھست ،نہ اِد ءَ جوانیں وانگجاہے دَیَگ بوتگ ۔ بلوچ راج ھرچ ھساب ءَ چہ دْرستیں اِنسانی بُنِکّی ھکّاں زبھر اِنت ۔
کورونا انوں دنیا ءِ 197 مُلکاں شِنگ ءُ تالان اِنت ءُ بلوچستان ءَ ھم سر بوتگ ، اے نادراہی ءِ یک اِلاجے وت ءَ وت پھریزگی اِنت ۔ آئی لھتیں راھبند ایش انت کہ آوانی تہ ءَ ۔۔۔۔
اوالی)ھچ جاہ ءَ نہ گردگ
دومی)وتی لوگ ءُ جاگھانی تہ ءَ نِندگ ءُ ھچ جاہ ءَ در نہ آھگ
سیمی)مُچّیانی تہ ءَ نہ رَوَگ
چارمی)یکے دومی ءَ چہ وت ءَ دُور دارگ
پنچمی) یکے دومیءَ گوں دست نہ گِرگ
اگاں یک مردمے ءِ تہ ءَ اے نشانی یا اَلامت بَہ اَنت
*گُٹّ ءِ ھراب بُوَگ
*پُونز ءِ رِچگ کہ ڈاکٹری زُبان ءَ آئرا (Rhinorrhea) گْوش اَنت
*گُٹّ درد
*سر درد
*ھُشکّیں جکگ
اگاں یک مردمے ءِ تہ ءَ اے نشانی یا الامت بَہ اَنت آ جلدی ڈاکٹر ءُ کِرّ ءِ بروت گوں ڈاکٹر ءَ ھوال بِہ کنت۔ چہ ایشی جوانتریں اِلاج وتی گِس ءُ جاہ ءَ نِندگ اِنت ،چہ مچّیاں وتارا دُور دارگی اِنت ، چی ءَ کہ مرچی ھمے وبا ءِ سَبَب ءَ کعبہ ءُ مدینہ شریف ھم بند اَنت ءُ عالم ء دیناں ھمے گْوشتگ کہ جمعہ ئِے نمازانی تہ ءَ ھم پنچ ءَ چہ گیش مردم مرو اِت ءُ وتی نمازاں وتی لوگاں بِہ وان اِت ۔پُرس ءُ پاتیاھاں ھم گیش ءَ چہ گیش کم مردم برو اِت۔ دانکہ ما وتارا چہ اے وبا ءَ پھریز کرت بِہ کن آں ۔ دگہ یک اھتیاتی تدبیرے (درمانے) کہ ساھت ءُ دمان وتی دستانی شُودگ اِنت ،وتی کسانیں زھگاں ھم ساھت ءُ دمان ءِ سر ءَ شُودگ ھم یک تدبیرے کہ بلوچستان ءَ ھِچ وڑیں اِلاج نہ بُوَگ ءِ درور اِنت ۔
وھدے کہ WHO ءَ ھمے گْوشتگ اَت کہ چین کہ وبا ءِ جاہ اِنت چہ اُود ءَ ھچ ڈنّی مردُماں لوٹائینگ مہ بیت اُود ءَ چہ کس مردمے ھم لوٹائینگ نہ بوت ، بلے مئے کراچی ءُ پنجابءِ مردم کہ ایران ءَ اِت اَنت آواناں لوٹائینگ بوت کہ آ گیشتر چہ کورونا ءَ متاسر اِت اَنت ءُ انوں تفتان ءِ تہ ءَ وبا ءِ رنگ ءَ ساڑی اَنت کہ ما زانت نہ کن آں چینچُک کِساس ءَ آوانی تہ ءَ کورونا ھست ءُ آ متاسر اَنت ۔
بلوچ راجی رھشون واجہ ڈاکٹر اللہ نزر ءَ گوں وتی راج ءَ تْران کنان ءَ اے ھم گْوشت کہ من وتی بلوچ بلوچ راج ءِ وانندہ ءُ نودربریں مھلوک ءَ چہ دستبندی کن آں ، چی ءَ کہ مئے راج ءِ گیشتریں مھلوک پھوال ءُ زمیندار اَنت ، ءُ آوانی تہ ءَ وانگ ءِ نسبت سک کم اِنت۔ مئے وانندہ ءُ نودربر مئے مھلوک ءَ را ابید چہ زر ءُ گزرے ءَ ھمے توجیل ءُ ھدایتاں سر بہ کن اِت دانکہ مئے بزّگیں راج وتارا پھریز کرت بِہ کنت ءُ مئے جانی تاوان بلکیں کم بہ بِہ اَنت ءُ اللّہ مئے راج ءَ را چہ اے وبا ءَ بہ رکّنیت ءُ بلکیں اے توجیلّ کار کرت پہ کن اَنت۔
