اے دُگنیا ءَ ھر وھدے کہ زھگے ودیگ بیت۔گڑا اے ابرمی گپے کہ زھگ بےسما بیت آنچوش کہ زھگ رودوم زیران کنت گڑا مدامی چہ وتی گس ءُ چاگرد ءَ باسمائی سنچ زیر ایت ءُ یک باسمائیں زھگے جوڑ بیت۔پہ وتئ مات،پتَ ءُ راج ءَ یک شرپداریں زھگے بیت،گڑا آئی ءِ کھول ءُ راج پہ ھمے زھگ ءَ پھر بند اَنت۔انچوش کہ وھدے شھید آتپ جان 24پروری 1998ءَ مند سورو ءَ مھمد یوسپ بلوچ ءِ گِس ءَ ودیگ بیت اے یک انچیں گسے کہ مدام گوں بلوچ راجی سیاست ءَ ھمگرانچ بیتگ۔
ھما گِس ءَ شھید گُلام مھمد ءِ پیمیں سیاسی راھشونے ودیگ بیتگ۔آتپ جان چہ کسانی ءَ ھمے چیز ءِ واھگدار بیتگ ءُ مدام وتی ناکو ءِ دیوان ءَ نشتگ ءُ چیزانی سرپد بیگ ءِ جُھدے کُتگ۔پدا ناکو ءَ آتپ جان ءَ مدام سوج و سر کُتگ کہ چہ من کمو گستاہ بہ بو کہ ریاست ءِ چم پرتو مہ کپ ایت۔چے ءَ کہ دُژمن ءِ چم پہ منی گار کنگ ءَ سک اَنت۔چہ من پد شُما منی جُھد ءَ دیم ءَ برگ ءِ جُھد ءَ بہ کن اِت۔آتپ جان مدام گوں وتئ کسانیں بالاد ءَ ھمے سیاسی ءُ چاگردی جھد ءَ ھمگرنچ بیت۔آتپ ءِ سیاسی تربیت یک کسانے مدتے چہ شھید چیئرمین ءَ بیت۔
اے وھد ءَ آتپ سک کسان بیت بلے آئی ءِ پگر سک مزن بیت۔
وھدے کہ 3 ایریل 2009 ءَ چیئرمین گوں لالا منیر،شھید شیر مھمد ءِ ھمراھی ءَ ریاستی لشکر ءِ دست ءَ آورا جنگ و بیگوہ بیت ءُ پد ءَ شھید کنگ بیت کلین بلوچستان ءَ بہ گر داں کراچی ءُ مند ءَ آسے روک بیت بلے شھید چیئرمین ءِ سنگتانی شھیدی ءِ سیمی روچ ءَ مند ءَ یک راجی مزنیں روانکے در کیت ءُ دیم پہ سورو ءِ رستریں لشکر ءِ بنجل ءِ نیمگ ءَ رھادگ بیت ءُ زھرشانی کنت۔ریاست ءِ لشکر مردماں لٹ شاپ کنت۔ھمے وھد ءَ آتپ بلوچستان ءِ بیرک ءَ زیر ایت ءُ رستریں لشکر ءِ بنجل ءِ دروازگ ءِ سرا سرکپیت ءُ زورگریں پاکستان ءِ بیرک ءَ دیر کنت ءُ بلوچستان ءِ بیرک ءَ مِک کنت۔گڑا ھمے میان ءَ لشکر ءِ یک کارمندے آتپ ءِ سر ءَ ترپک ءَ ٹال کنت ءُ گْوش ایت کہ جھل ءَ ایر کپ۔دگہ سوبیدارے وتی کارمند ءَ ھکل دنت کہ ھچ مہ گُوش ءُ آپئےگْوش ایت کہ زھگ سرکپ ءُ وتی بیرک ءَ مِک بہ کن کہ مرچی شُما گوں ما دارگ نہ بہ اِت۔پد ءَ آتپ جان گوں اوگاماں وتی بیرک ءَ مِک کنت۔
آتپ بی ایس او ءِ باسک ھم نا اَت آتپ جان وانگءِ سک شوک بیتگ۔ کہ من وانان یک سرپریں سیاسی زانتکارے جوڑ باں وتئ راج ءُ سرڈگار ءِ آسودگی ءُ آجوئی ءَ جھد کناں۔ آتپ جان ءَ بلوچی وانگ ءُ بلوچی شائری ءِ ھم باز شوک داشتگ،آتپ جان ءِ بازیں انکلابی شیئرشوشل میڈیا شنگ بیتگ۔ پدا آتپ جان ھمے کسان اُمرءَ بی ایس او آزاد ءِ باسک جوڑ بیت بی ایس اوُ مند زون ءِ سنگتانی گون ءَ ھمکاری کنت، سیاسی ءُ چاگردی سرگرمیاں بندات کنت۔وھدے کہ ما چہ مند ءَ 2010 ءَ چہ ریاستی زلم زوراکیانی دیمپانیاں پد تربت کیچ ءَ جھمنند بوتیں گڑا آتپ جاں مڈل ھائی اسکول ءَ وانگ بندات کت، وھد ءُ پاس انچو دیما جنزاں بنت کہ یک انچیں ماریشتے آتپ جان ءَ وتئ تہ ءَ رودینت کہ آتپ جان ءِ وانگ ءِ واھگ کمتران بوت ءُ سلاہ بندیں جُھد ءِ واھگ گیش بوان بوت۔اے وھد ءَ تربت بمب تراکانی آماچ اَت۔ 2011 ءِ 20 اگست ءَ آتپ جان ءِ مستریں برات آسپ کہ چہ امارات ءَ واتر کیت گڑا چہ کراچی ءَ ریاستی چیریں ادارھانی دستاں بیگوہ کنگ بیت۔گڑا آتپ جان ءِ جیڑہ گیش بنت کہ لوگ ءِ مستریں ساڑی نہ بنت ءُ مستریں برات ءَ پاکستانی لشکر ءُ چیریں ادارہ شھید کن اَنت کہ آئی ءِ تیر سُپتگیں جون ماں مُرگاپ ءَ چگل دیگ بیت کہ ھمے جاہ ءَ آئی ءِ ناکو شھید گُلام مھمد ءُ ھمبلانی جون چگل دیگ بیتگ اِت اَنت۔
آتپ جان ءِ اُمر اے وھد ءَ 14،15 سال اَت کہ اے اُمر آئی وانگ ءُ زانگ،لیب گْوازی ئیگ اَت بلے یک نیمگے لوگ ءِ زمہ واری ءُ دومی نیمگ ءَ راجی جیڑہ، آتپ ءَ گوں وتی نزوریں کوپگاں دوئیں جیڑہ زُرت اَنت۔یک نیمگے وانگ ءُ دومی نیمگ ءَ راج جیڑہ ھم بَڑّ ءَ بست۔کمپوڈر وانگ دربُرت گڑا انگلش ءُ بلوچی ھم ونت۔ھمے میان ءَ آ سید زھور شاہ ھشمی وانگجاہ ءَ وانگ ءَ اَت کہ لوگ ءِ تہ ءَ آئی وانگجاھے پچ کُت کہ بلوچ زالبول بیا اَنت ءُ وتی ماتی زبان ءَ در بہ بر اَنت۔کش ءُ کِرانی ھمساھگ پہ وانگ ءَ اَت اَنت ءُ ما ھم بلوچی ءِ وانگ چہ ھمد ءَ بندات کُت۔ریاست ءِ دلاراں آتپ جان ءِ بیگوھی ءِ رند ءَ اِت اَنت ءُ مدام سُھریں رنگ ءِ ویگو گاڑی یے آتپ ءِ رنگیری ءَ کنگ ءَ اَت۔گڑا لوگ ءِ مردم کہ ھالاں سرپد بنت،آتپ ءَ شال ءَ دیم دے اَنت۔آتپ شال ءَ ھم گوں بی ایس او ءَ ھمگرنچ بیت ءُ وتی سیاسی کاراں بندات کنت۔شال ءَ ھم لھتیں وھد ءَ پد چیریں ادراھانی مردم آتپ ءِ رندگیری ءَ کن اَنت،گڑا آ دگہ نیمگے روت ءُ وتی نمبر ءَ بند کنت،چیزے وھد ءَ پد آتپ یک شپے گوں دگہ سنگتے ءَ لوگ ءَ کیت۔مات آئی ءَ جُست کنت کہ کجا بیتگ اِت کہ چو ھاک ءَ گھیتگ اِت گڑا آتپ بچکندگے جنت ءُ گْوش ایت کہ ماتی جان ما انچیں راھے ءَ بیتگیں کہ سرجمیں راہ پُلک ءُ دنز بیتگ۔مات گْوش ایت زاناں تو شال ءَ نہ بیتگ ئے؟ پسو دنت کہ انہ ما دگہ نیمگے سپرے ءَ بیتگیں آتپ جان ءِ ھمراہ گْوش ایت کہ ما انچیں سپرے ءَ بیتگیں کہ جُست مہ کن ما باریں وتی ساہ پہ چونی ءَ داں لوگ ءَ سر کُتگ۔شال ءَ لشکر آتپ ءِ رند ءَ بیتگ گڑا من چہ اود ءَ در کُتگ ءُ دیمے شُتگ ایں چہ ھما دیم ءَ ما اِد ءَ اتکگیں۔
رند ءَ ما نہ زانت کہ آتپ ءَ کجا راہ بہ دئیں،یکبرے ما امارات ءَ راہ دات چیزے وھد ءَ ھمود ءَ بوت،بلے گِلزمین ءِ مھراں اود ءَ ھم نندگ ءَ نیشت،گڑا پد ءَ واتر اَتک۔ پد گم یک نیمگے ریاست ءِ رندگیری ءُ دومی نیمگ ءَ راج ءُگلزمین ءِ مھراں آتپ جان پہ جیڑگ ءَ لاچار کُت کہ کلم ءَ یل بہ کنت ءُ توپک ءَ بہ زور ایت ءُ راجی سرمچارانی ھمراہ بہ بیت۔آتپ جان داں گُڈی ساہ ءَ جُھد ءِ ھمبلانی ھمراہ اَت، 2مئی 2018 ءَ نیمروچ ءِ وھد ءَ آتپ جان ءِ شھدی ءِ وشیں ھال ءِ مستاگی لوگ ءَ مارا سر بوت،گڑا مات ءَ گریوگ ءِ بدل ءَ پہ بچکندگ الھان کُت کہ آتپ جان ترا سالونکی مراد بات۔ما چہ روکپتی بلوچستان ءَ مات ءِ ھمراھی ءَ دیم پہ مند ءَ آتپ جان ءِ آروسی مراگِش ءَ رھاگ بوت ایں، بلے وش بھتی ءَ آتپ جان ءِ لوگ ءِ گوازینگ ءُ گلزمین ءِ باھوٹ کنگ ءِ وھد ءَ آتپ جان ءِ مھکین مات ءِ پلین برات ھلیل جان آتپ ءِ ناکو ءِ دومی آروسی گون گلزمین ءَ یکجاہ برجم درگ بیتگ اَت ءُ وتئ تنگوئیں بچ ءُ مھروانیں برات پہ بچکندگ گلزمین ءِ میار کُت اَنت۔
***
