من ءَ گوں ترا گِلگ نیست، پرے ھاتِر ءَ مُدام نِنداں ءُ جیڑاں کہ گوں ترا چے گِلگ بِہ کن آں، چی ءَ کہ گِلگ ءِ جِند نیست۔ بس گِلگ من ءَ گوں وتی جند ءَ، گوں وتی کُنٹیں گاماں گِلگ، وتی نِزوری ءُ زُوراکیں وھد ءِ دست ءَ برگشتگیں ودار ءِ گِلگ۔۔۔۔۔۔۔۔
تو مہ جیڑ ءُ وت ءَ مہ رنجین، ناکہ منی نِزوریاں بِہ ڈبّ چیر بِہ دئے، بلکیں پہ واہ ءُ زاری سرجمیں میتگ ءَ سر ءَ بِزیر ءُ من ھرچی گْوشت کن ئے بِہ گوش۔ بُھتام بجن، ھر وڑیں ھبر بہ ساز پمّن ءَ، بس وت ءَ میاریگ مہ کن، پرچا کہ من ءَ شات نہ بیت کہ تئی تیرکمانیں دیدگاں ارس گُلگُل بہ بَہ اَنت، ناکہ تئی سُھریں لُنٹاں من پہ لپرزگ دیست کن آں، چی ءَ کہ اے ھبر ءَ دِل نہ سگّ اِیت۔۔۔۔۔۔۔۔۔۔۔
پہ تو اِشتاپ اِشتاپ ءَ دیر بوت من ءَ، چہ مھر ءِ کیپانی تِنگگ ءَ پیسر تو چہ منی دست ءَ لگوشت ئے۔ نوں دست منی دست ھُورک ءُ ھالیگ اَنت۔ نہ تئی دستی سمارے ءِ نِشان پشت کپتگ، ناکہ منی جند پہ ترا اَتک کنت کہ دل ءِ گُکّ داتگیں پاھاراں تئی گْور ءَ بِہ ریچاں ءُ کمو ساکم بہ بِہ بَہ آں۔
بس برے برے کہ تئی ترانگ گْورامباز اَنت، گُڑا سک اِیوک ءُ تھنا بہ آں ءُ بے سریں گال پہ تو نبیسّاں ءُ رودپتر ءِ تاکاں رنگین کن آں، ءُ پد ءَ وت ءَ وھد ءِ دست ءَ دیاں ءُ تئی شموشگ ءِ جُھد ءَ کن آں تئی، بلے تو شموشگ نہ بَہ ئے۔۔۔۔۔۔
جیڑگ جیڑگ ءِ تہ ءَ وھدے سما کن آں، ترا ھرگور ءَ ھر چیزّ ءِ تہ ءَ گِند آں۔ برے برے تو منی رودپتر ءِ تاک ءِ سر ءَ ئے ءُ من ترا نبشتہ کنگ ءَ آں، تو بچکندگ ءَ ئے۔۔۔۔۔۔۔۔
برے کہ من سپرے ءَ رھادگ بَہ آں، گُڑا تو منی ھمراہ ءُ گون ئے گوں، برے برے تو منی واب ءَ ھم کائے وتی تَرّیں زُلپّاں چنڈّے ءُ آپانی تِرینزُک منی دیم ءَ لگ اَنت ءُ تو ٹھک دے ءُ دِرکّ بند ئے من تئی دُمب ءَ کپ آں۔۔۔۔۔۔۔۔
پمشکا! من ترا داں روچ ء مروچی شموشت کُت نہ کُتگ، بلے من باز جُھد کُتگ تئی شموشگ ئے، تو شموشگ نہ بَہ ئے۔ پرچا کہ تئی جتائی ءِ درد گوں من ءَ سگگ نہ بہ اَنت، ءُ بے تو گْوش ئے من ھالیگیں ڈبّے آں ءُ زند بے مکسد۔۔۔۔۔۔۔
منی ارواہ! نوں من دم بُرتگ اِنچو گریوگ ءُ ھیسکارگ ءَ، چمّ چہ ارساں کیل اَنت، دل مُدام چو لھڑیں منجل ءَ جوش وارت ءُ تو انگت سھرا۔۔۔۔۔۔۔۔
تو زان ئے کہ مردُم گْوش آں مگریھ اے دل ترا چہ اندر ءَ کْواپگ کنت، بلے اے چے زان اَنت کہ من چہ اندر ءَ دیریں پُرشتگ ءُ کْواپگ آں۔ ءُ تئی مھر وت یک نادْراھی یے، چرے نادْراھی ءِ رکّگ ءَ ھِچ وڑیں راہ ءُ در گِندگ نہ بیت، پرے ھاتِر ءَ من دِل ءِ دُرستیں دریگ ءُ دروازگ کُلپ جتگ اَنت۔۔۔۔۔۔۔۔
***
