ابرم ءِ زیبائیں جلشک۔۔۔۔۔۔۔۔۔۔سُھب ءِ گورگیں رنگانی لاگریں بْرمش چہ گِس ءِ درِیگ ءَ سُکسُک کنگ ءَ اَت کہ من بلوچی لبزانک ءِ پِڑ ءَ اے اھد ءِ مزن نامیں شائِر ءُ آزمانکّار اُستاد منیر مومؔن ءِ شیئرانی وانگی ” تئی ھیال ءِ کُدرتانی میتگ ءَ ” گوں مُلمہ اِت آں۔ چُوشیں گُمانے نیست اَت کہ اے سُھب گوں ناوشیں ھالے ءَ من ءَ وش آتک کنت ءُ مِستاگ گیت، پمشکا من گوں منیر ءِ وانگ ءَ گُلائیش اِت آں کہ
تو رپتگ ئے نوں ترا چوں توار پِر بہ کناں
من چُنت وھد اِنت وتی گالوار اِش نہ کُتگ
دیمتِر ءَ گْوش اِیت
تو چو مُلوریں آشِکے
اِمروز ءِ دِل تھنا کُتگ
مردُم اے شاہیں میتگ ءِ
ٹپّی ئیں کونجے ءِ گم اِنت
چہ ھر کتار ءَ سِستگ اَنت
کس پہ کس ءَ مھتل نہ اِنت
کسّے نہ منتہ پہ وت ءَ
تئی زیارت ءَ درکپتگ اَنت
سَوتانی ھِنّی ئیں گُبار
سُھبانی امبوئیں سمین
زپتیں مُسامانی جلشک
بیگاہ ءِ دِل تنگیں زھیر
اِستین گوں لھمیں ھاجتاں
کَورانی تُنّیگیں بدن
شانتُل گوں شیدائیں دِلاں
چمّانی الوت مُھرگیں
گزّانی شیکّوئیں گماں
کَیپانی رُژنائیں مھاڑ
اُوستانی شیشگ پْرشتگیں
تئی زیارت ءَ درکپتگ اَنت
تو چو مُلوریں آشکے
اِمروز ءِ دِل تھنا کُتگ
من کہ دست پہ دیمی تاکدیم ءَ بُرت، انچو گْوانکو ءَ ٹِلّینگ کُت۔ من چار اِت داں سنگت باھڑ اِنت، من کہ ھال کُت تہ ناوشیں ھالے کوار ءَ اِت ئِے۔ من گوں اے ھال ءِ اِشکنگ ءَ ھیالانی ابرم ءِ ھنکین ءَ گوں وڑ وڑیں ھیالاں دیم پہ دیم ءُ مانگیشّ اِت آں۔
انچو سما بوت کہ اے ھبر دُروگے، بلے گْواچن ءُ راستی ءَ کَے دُروگ کنت۔ ءُ اے راہ ءِ تْراولیں پند ءِ مُساپِر گوں وتی ھر گام ءَ جَوریں ملکموت ءَ دیم پہ دیم۔۔۔۔۔۔۔، ھمے جیڑگانی پُژدر ءَ چہ زُبان ءَ در اَتک کہ پہ گُلامیں راج ءَ مَرگ ھِچّ بِستارے نہ دار اِیت، چی ءَ کہ آ پیسر ءَ مُرتگ۔ ھو! آئی ءِ گْور ءَ زِندگ بُوَگ ءِ ھاجت آجوئی اِنت، پہ آجوئی ءِ موکگ ءَ مرگ ءِ امبازگ مرگے نہ اِنت، بلکیں ابدمانیں زِندمانی یے۔۔۔۔۔۔۔۔۔
اے مْیان ءَ من وت ءَ تھمیات کنگ ءِ جُھد ءَ اِت آں۔۔۔۔۔۔۔۔۔۔۔، بلے پاکمِر ءُ نمیریں سر شے سِکندر ءِ گْوست ءُ ھید شلیں پند ءِ تْراولیں کِسّہ ءِ ھون میچلیں دنز ءُ گُباراں زِرد ءُ باتِن ءِ کُنٹگداریں گیابان تانسر ءَ آڈھور کُتگ اَت۔ مارِشتانی لد ءَ آسے کپتگ ءُ مانداران اَت کہ جین آسٹن ءِ گُشتن گیر اَتک، جین آسٹن گْوش اِیت:
برے برے من وتی مارِشت وتی گْور ءَ داشتگ اَنت، چی ءَ کہ من ءَ پہ آیانی درشانگ ءَ زُبان نہ رستگ۔
Sometimes I have kept my feelings to myself, because I could find no language to describe them. ~Jane Austen
چوش کہ من گْوش آں، برے برے بنی آدم ءَ انچیں ھیال چاگِرد کنت کہ مارِشت بے آسگ ءَ بُنگِر اَنت، مرچی من ءَ انچیں ھیالاں گْور جتگ کہ منی زُبان نہ لوٹ اِیت کہ من آیاں درشان ءُ ند ءِ سانکلاں کید، بلے آ آجو اَنت۔ چی ءَ کہ منی نزّیک ءَ لبزاں بانزُل پِر ءُ مارشت چو وشبو ءَ آتار بیت۔
پمشکا من اے گپّ ءِ گْوشگ ءَ راست آں کہ گوں سرڈگار ءَ مھر جوزگانی نام اِنت کہ چو زِر ءِ چَولاں جُلگُمیت ءُ چاردھی ماہ ءِ بْرمشاں ھوار ءُ جلشک اِیت۔ آچشیں ھُلّانی سارتی ءُ تاھِیر بکشوک۔۔۔۔۔۔تھاردیمگیں آکبت ءِ رُژنا ءُ ایردستی ءِ ھُنڈالانی ولگوج کنوک۔۔۔۔۔۔۔۔۔
وھدے ابرم ءِ زیبائیں جلشکانی باتِن ءَ ماھِکان جوھانیں مھر سھرا بیت، گُڑا اے کُورُمیں تورشت اشکامے بیت ءُ ھر زیم ءَ ساٹ کنت۔ ھمے جوزگ اِنت، ھمے توکل ءُ سرڈگار ءِ شیشاریں مھر اِنت کہ ترا زِندگ بُوَگ ءِ شاشانیں ھاٹیگ ءَ شکسا اِیت ءُ پہ گُلامی ءِ سانکلانی سِندگ ءَ چاڑِکّہ کنت۔۔۔۔۔۔
انچوش جاھے ڈاکٹر واجہ شاہ مھمد مری گْوش اِیت: سانکل اگاں چینچو زنگ بِہ باں، وت کدی نہ پْرش اَنت، ناکہ چہ ھاکمیں ٹولی ءِ نیمگ ءَ اے رنگ ءَ کنگ ءِ موہ دَیَگ بیت۔
یات بِہ کن! چاگِردی سائنس ءَ آٹومیٹک ءِ لبز سک کم کاردربر بیت، بلے اِنسانی دزمانگیجی ءَ ابید ھِچّ بُوَگ ءِ گُنجائش نیست۔ چوش کہ چاگِرد وَسر ءَ جْوان نہ بیت، بلکیں آئرا ءَ شر کنگ کپ اِیت یا شر کنگی اِنت۔
بھر ءُ بانگی نِزام ءُ کاربُوجانی سکرات کرنانی داب ءَ دْراجکشّ بیت، ءُ زُلم وتی مَرگ ءَ وت نہ مِر اِیت، بلکیں آئرا کُشگی اِنت۔ پمشکا اِنسان جْوانیں توجیلّے بِہ ساز اِیت ءُ یک ارزِش داریں گامگیجے بِہ زور اِیت دانکہ زِند گْوازینگ ءِ کابِل بِہ بیت۔ وھدے آس رُوک بیت، گُڑا پہ آئی ءِ کُشگ ءَ چاڑِکّہ بُوَگی اِنت، بلکیں آ ساھت ءُ دمان تمبورگ ( دمبورگ ) جَنَگ ءِ نہ اِنت، یا جوکّ ءُ لچّہ وانگ ءِ۔۔۔۔۔۔، ملکموت کہ دیم پہ دیم ءَ میلانک بِہ بیت، گُڑا گیگ ءُ گْوم، گیش ءُ گیوار ءِ نہ، زِندمان رکّینگ ءِ آشوب ساچگی اِنت۔
مرچی بلوچ راج ءِ کُنگُر شے سِکندر ءِ دابیں بلوچ راج ءِ ملّ مِڑوک ءُ سرمچنڈیں پُسّگ وتی واھگ ءُ واھشتانی سیراپ ءُ سمبھینگ ءِ بدل ءَ راجی زِندمان ءِ ساچگ ءُ ساٹگ ءَ در کپتگ اَنت۔ آیاں وتی گْواڑگیں زِندمان ءِ تانسریں ارمان ببا داتگ اَنت۔۔۔۔۔۔۔۔۔۔، مھلبیں زُلپانی پیڑاپ ءُ مِسکیں مھپرانی سَمارگ ءِ واب بُن داتگ اَنت۔ شکّلیں نیادانی ھیر بوئیں پتّر۔۔۔۔۔۔۔۔۔۔، پوپلیں ٹھک ءُ بچکند۔۔۔۔۔۔۔۔۔۔۔۔، کُماریں چمّانی سُرمگ ءُ آشنائیں داستان۔۔۔۔۔۔۔۔۔۔۔۔۔، پن ءُ مُزواک مال اِتگیں لُنٹانی اناریں سُھری۔۔۔۔۔۔۔۔، زِندمان ءِ کُلیں واھگ ءُ ارمان ببا داتگ اَنت ءُ راجی زِندمان ءِ ابدمانیں مانزمانی ءِ جُھد وتی کُتگ۔
پمشکا۔۔۔۔۔۔! مرچی پہ راج ءِ سِنکندر دابیں کُنگُراں منی دوئیں دانکانی سِپت ءُ ستا ھوادگ ھوادگ اَنت، چی ءَ کہ اے آیانی رِتکگیں ھونانی مُزّ اِنت سبا ءِ سارتیں سمین پہ مُوازے زاپرانیں وشبوھاں آتار اِیت۔ اے ھما ٹھل ءُ سوسنیں ورناھانی جُھد ءُ جپّاھانی برورد اِنت کہ زِر ءِ چَولاناں زُبانے پِر۔۔۔۔۔۔۔۔۔۔۔، دِرین ءِ رنگی ئیں شار دِیگر ءِ بالاد ءَ چو نُوک سوریں کاڑ ءُ پُلگدیں بانور ءَ سمھین اِیت۔۔۔۔۔۔۔۔۔، پاتو پُلّاں امباز اَنت ءُ شِیرکِنیں سَوت الھان اَنت۔۔۔۔۔۔۔۔، کُلّی گوں وتی شیزارگاں ڈُکّال ءَ بھارگاہ ءِ مِستاگ ءَ گِر اَنت۔۔۔۔۔۔۔، زِری نود تاکریچ ءِ نام ءَ بھارمیچ ءِ کلوہ ءَ نویس اَنت۔۔۔۔۔۔۔۔۔۔۔
گُڑا سِدکاں! آجوئی ءِ موکگ ءُ ایردستیں سرڈگار ءِ دیمپانی ءَ اے داتگیں دیمونی گُلامی ءِ شُومکیں نادْراھی ءَ پہ مُجّتی دْرواہ کنت۔۔۔۔۔۔۔۔۔
گُڈّی ءَ گوں اُستاد ءِ اے شیئر ءَ کہ وتی وانگی ” زِندگی ءَ را ھلک نام ءَ نیست ” ءِ تہ ءَ گْوش اِیت:
مارا شوھاز ءِ گنوکیں دمکاں
روچے نِیمونے ءَ راھے بُرتگ
روچے رنگے دُچار بوت من ءَ
زُمزمیں تیاب ءُ پٹّ ویرانیں
مھر امباز ءُ شاھگانیں دْرچک
دُورسریں کَور ءُ تُنّی ئیں گیابان
سُرمگیں کوہ گوں گر ءُ گاراں
گْونڈکیں میتگے کہ کُلّ ءُ دراں
انچیں زیبا ءُ کسانیں ھلکے
کہ تئی جیگی ءِ یات ءَ گیجیت
چو گُشے دست ءِ دِل ءَ جاگہ کنت
یا کہ چمّانی تہ ءَ واب کپ اِیت
***
