من دِیر سَریں راھے ءَ وتی شوھاز ءَ مُساپر ءُ گار بوتگ اِیں مرد ھردو وت اِت آں۔ من پکیری شالے وتی کُوپگانی سر ءَ چنڈّ اِت ءُ وتی سواس ماں پیشے ءَ بست اَنت کہ مُھر تر بِہ بَہ اَنت۔ وتی شوھاز ءَ درکپتگ اِت آں کہ باریں سر کُجا کپ اِیت ءُ چِینچو کرن گْوز اِیت، باریں وت ءَ شوھاز کُت کن آں کہ نہ۔۔۔۔۔۔۔؟
بلے! من ءَ وتی جِند اَلم ءَ شوھاز کَنگی اَت، پرچا کہ اِے ھبر پہ من ءَ جُستے اَت کہ وت ءَ شوھاز بِہ کن آں ءُ وت ءَ بِہ پول آں، چی ءَ کہ من ءَ ھم دیم پہ وتی سَپر ءَ جُنزگی اِنت ءُ پہ من منی مھروانیں ھَمبل ودار ءَ اَنت کہ مئے منزل سک دُور ءُ دْراج اِنت۔
اَگاں ما وتی مِنزل ءَ مہ رَو اِیں، گُڑا تھنا من نہ بلکیں سرجمیں بنی آدم وتی مِنزل ءِ شوھاز ءَ گار ءُ بیگواہ بَہ اَنت ءُ یک بے پسّوئیں جُستے ءَ ابید دِگہ ھچ پَش نہ کپ اِیت۔
پمشکا! من ءَ یکّیں ھبر ءَ بے تاھِیر کُتگ کہ وت ءَ بِہ شوھاز آں ءُ وت ءَ پَد بِہ جن آں کہ من کُجا ءُ چونیں تَھار دیمیں کُورچاتے ءَ کَپتگ آں کہ در آیگ ءِ رند ءُ نِشانے ھم نہ گِند آں، بلکیں باتِن ءِ تہ ءَ نِشتگیں مرد من ءَ ھر وھد ءَ سِکین دَیگ ءَ اِنت کہ وت ءَ بِہ شوھاز ءُ پہ در کپگ ءَ راہ ءُ درے بِہ پول کہ ترا جُنزگی اِنت۔
من وت ءَ بِہ شوھازاں ءُ سرجمیں گِیدی ءَ وتی مِنزل ءِ ڈَسّ ءَ بِہ دے آں کہ گار بُوَگ ءَ چِہ شتر اِنت کہ ساری ءَ ما بِہ زان اِیں مارا کُجام راہ ءُ کِشکاں پند بُرّگی اِنت ءُ مئے مِنزل کُجام دیم ءَ اِنت۔
شوھازگ برجاہ ءُ کِشک چہ کنڈگ ءَ چکار اَت، روچ چو آس ءَ برانز گِپتگ اَت۔ چادر ٹُنگ بُوھان ءُ سَواساں دْروہ اِتگ اَت ءُ پاد چہ ھُوناں میچل، بلے جِند ءِ شوھاز برجاہ ءُ گُلیں ھمبل منی ودار ءَ نشتگ اِت اَنت۔
سپر برجاہ ءُ مِنزل دور اَت، بلے پمّن اِے ھبر ھَژدری اَت کہ پہ مِنزل ءِ ھاتر ءَ وت ءَ بِہ شوھاز آں، چی ءَ کہ اے مِنزل منی باندات ءِ واھگانی سرجم کنگ ءِ منزل اِنت۔ داں من وت ءَ شوھاز مہ کن آں، گُڑا اے جُست منی باتِن ءِ نِشتگیں مرد ءَ ھِچّ رنگ ءَ اِیمن ءُ آرام بُوَگ ءَ نیل اِیت۔ اگاں من اِیمن ءُ پہ آرامی بِہ نِنداں ءُ ھِچّ مہ گْوش آں، گُڑا چوں وتی مِنزل ءِ ھمسپراں پہ گار بُوَگ ءَ رکّینت کن آں، چتور من گْرانیں مِنزل ءَ سر بوت کن آں، بِہ گْوش من ءَ۔۔۔۔۔۔؟
من گوں وتی اے جُست ءَ دیم پہ دیم ءُ دیر شُتگ اِت آں سک دِیر، پَدی ءَ وھدے چکّ جت تہ ھچ نیست اَت۔ نہ مُرگ، نیکہ دْرچک ءُ کوہ، بس پٹّیں زمینے اَت۔ بُرز ءَ نیلّیں آزمان ءِ تَہ ءَ من ءُ پادانی چیر ءَ پِراہ ءُ شاھگانیں زمین۔۔۔۔۔
گُمان بوت گُوشاں توارے اِش کُت، چو نرم نرم ءَ گْوشاں گْوش ئے یکے سُکسُک کنگ ءَ اَت۔ چہ کسانیں ساھتے ءِ ڈمبّ بُوَگ ءَ پد گُوشاں ھمے توار اَتک ءُ کسے گْوشگ ءَ اَت کہ تو اَتک ئے وتی شوھاز ءَ۔۔۔۔۔؟
ھمے توار ءَ پد کسانیں ساھتے پِر گْوست ءُ پد ءَ توارے بوت، تو زان ئے کہ تو چینچو بزّگ ءِ ءُ تئی باندات چِنچُک بزّگ بیت، ترا سما ھَست کہ مَرچی ءَ چہ گیش تئی باندات ترا بَزّگ تِر کنت۔۔۔۔۔۔۔۔۔؟ گُڑا پرچا تو وتی شوھاز ءَ دیر کُتگ۔۔۔؟ تو نہ زان ئے کہ یک روچے ءِ بے سماھی باندات ءِ باپار ءُ سُودا ءِ جنگ اِنت۔
اے زمین تئی ءُ اِیشی ءِ واجہ توئے، بلے اَنگت وتی سرڈگار ءِ سر ءَ اِیمن نہ ئے۔ اَنگت تو ھِچ سما نہ کن ئے، اے زمین ھرروچ وتی سینگ ءَ وتی کُنگریں بچّاں واپین اِیت ءُ چو مات ءَ لیلو دنت، گُڑا اَنگت مات ءِ سر ءِ چادر ءَ کوزہ گیر دِیر کنت ءُ تو ھچ نہ گْوش ئے پرچا۔۔۔۔۔۔؟ سما گوں مُھریں سانکلاں بستگ۔۔۔۔۔۔؟ گُڑا سانکلاں بہ سِند ءُ سر گِر کہ تئی ھَمبل ودار ءَ اَنت ءُ ترا منزل ءَ رَوگی اِنت، اَنچو کہ تو وت ءَ شوھاز اِتگ، اَنچو وتی ڈگار ءَ۔۔۔۔۔۔۔۔۔۔۔
***
