تئی یاتانی بُکچہ ءَ دل گْوشی پچ بِہ کن ءُ گْوات ءَ بِہ دے داں ترا سر بہ بَہ اَنت، بلے پد ءَ دل گْوش اِیت کہ وت بیا ھور نند اِیں زپت ءُ شیرکنیں یاتانی بُکچہ ءَ بوجیں ءُ بے تاھِیریں زرد ءَ تاھِیر بکشیں داں ھیالانی دامُن ءَ کُنٹگانی بدل ءَ پُل بِہ سْرپ اِیت ءُ وشّیانی روچ دوبر واناک ءُ منگیری بِہ بیت۔
من ءُ تو، واھِد جان ءِ اُوتاک ءَ گوں شوھاز ءَ بِہ نِند اِیں ءُ کِسّہ بِیاریں، من شیئر بِہ واناں ءُ تو واہ واہ بِہ کن، وھدے زیبائیں کاڑانی سیاہ ماریں زُلپانی نام کہ منی دپ ءَ بئیت، کماش ٹھک بِہ دنت ءُ ماھو ماھو بِہ کنت۔
بیا۔۔۔۔! پد ءَ ھور نِند اِیں ءُ گْوست ءِ زپت ءُ شکّلیں گیراں کمائیں، بیا! بیا، بلے۔۔۔۔۔۔۔۔۔۔۔۔۔
وھدے من ءَ تئی ابدمانی ءِ راستیں ھال رست، گُڑا من ءَ باور بُوَگ ءَ نہ اَت۔ چی ءَ کہ تئی یاتانی سارتیں ساھگ انگت منی سر ءَ ساھِیل ءُ ساچان اَت۔ پمشکا گْوش آں جنگو جان تو پہ رَوَگ اِشتاپی کُت، بلکیں ترا انوں رَوَگی نہ اَت۔ پہ ترا بازیں کارے پہ سرجم ءُ پیلو کنگ ءَ مھتل اَت، بلے مرچی پہ مُجّتی مھتل بوت اَنت۔
چی ءَ کہ تو پہ راجی مھتلیں کار ءِ پیلو کنگ ءَ رپت ئے، پمشکا وتی تِلائیں سر ءُ ارواہ سوگات کُت اَنت ءُ پہ دائِمی نمیران بوت ئے۔ تنیگا تئی دستانی ھِنّی ھست اِنت، سالونکی ءِ شاتمانیں روچ ھِسابی اِت اَنت، بلے تو اے کُل ماں نیاؤرت اَنت ءُ دِرکّ پہ ماتیں گُلزمین ءِ گْوانک ءَ بست۔
تو پہ زمین ءَ اَنچو شیدا اِت ئے، انچوش مُرید پہ وتی ماھیں ھانُل ءَ مَست ءُ گنوک اَت، ھمے رنگ ءَ تو پہ وتی لجّ ءُ ننگ ءِ جنگ ءَ، پہ وتی زمین ءِ جنگ ءَ شے مُریدیں سر کُربان کُت۔
مرچی شُمئے اے جُھدانی برکت ءَ سرجمیں بلوچ راج زانت ءُ سرپد اِنت کہ اے جنگ گیرت ءِ جنگ اِنت، زمین ءِ جنگ اِنت، ماتیں وتن ءِ رکّینگ ءِ جنگ اِنت۔۔۔۔۔۔۔۔۔
وھدے کہ تئی گیرت، لجّ ءُ ننگ پادمال کنگ بیت، گُڑا یک بلوچ زھگے ءِ بِستار ءَ تئی سر ءَ ھژدری اِنت کہ تو وتی لجّ ءُ ننگ ءِ پھریزگ ءَ چہ ھیش ءُ نوشیں جھان ءَ در بِہ کپ ءُ ماتیں سرڈگار ءَ پہ آجوئی بِہ سینگار۔
وھدے تئی لجّ ءُ ننگ ءِ سر ءَ اُرش کنگ بیت، گُڑا بزاں کہ تئی واستا ھچ پش نہ کپتگ۔ ءُ باندا تو چہ وتی جِند ءِ دوار ءَ گار ءُ گُمسار کنگ بَہ ئے، چی ءَ کہ گُلامی ھمے بدّیں ھوپ ءُ نادْراھی اِنت۔ ءُ اے نادْراھی ءِ اِلاج آزاتی اِنت، آزاتی گوں کُربانیاں ھمگرنچ اِنت، بے کُربانی دیوکیں راج چہ راجی ھستمان ءَ زوال آماچ بَہ اَنت، بلے توئے جنگو جان ءَ اے درد ءُ گم مار اِتگ اَت، پمشکا گوں سرمچاریں سنگتاں پہ ماتیں سرڈگار ءَ ندْر ءُ کُربان بوت ئے۔۔۔۔۔۔
آگاں ما لوٹ اِیں کہ مئے ڈیھ، لجّ ءُ ننگ چو بنگالی راج ءِ وڑ ءَ پادمال کنگ مہ بیت ءُ مئے مات گوھار چو بنگالی زالبولانی وڑ ءَ بے سِتر کنگ مہ بَہ اَنت، گُڑا مارا گوں یکمُشتی ءَ ھوار چو ورنائیں جنگو جان ءَ ندْر بُوَگ ءِ پلسپہ زِندگ ءُ آھِگی سر ءَ اَمَل کنگی اِنت، چی ءَ کہ کوم گوں لیکھانی زندگ کنگ ءَ زندگ مان اَنت۔
مرچی ھما لیکہ ءِ رِد ءَ ورنائیں جنگو جان گوں وتی سنگتاں ندْر بوتگ، ھمے لیکہ ءِ رد ءَ مارا، مئے کماش، مئے مات ءُ گْوھار، مئے زھگ، مئے گُلیں راج ءَ را ءَ ندْر بُوَگی اِنت، گُڑا نُوں ما پہ وتی آیوکیں پدریچ ءَ نُگرھیں سُھبے سمبھین اِیں، اگاں نا گُلامی ءِ بدّیں ھوپ مارا پہ زِندگ ءَ نیل اِیت۔۔۔۔۔۔۔۔۔۔
پمشکا من گْوش آں اے جنگ منی جنگ اِنت، تئی جنگ اِنت، ھر ھمائی ءِ جنگ اِنت کہ آئی نام بلوچ اِنت، گُڑا بلوچ ءِ جنگ بلوچ ءَ زیرگ ءُ وتی کوپگاں کنگی اِنت۔ اے جنگ داں ھما وھد ءَ برجاہ مان اِیت، ناشریں زُوراک ءِ نام ءُ نِشان، پد ءُ رَند چہ مئے پاکیں سرڈگار ءِ سر ءَ گار ءُ بیگواہ نہ بَہ اَنت۔ اے جنگ مارا برجاہ دارگی اِنت دانکہ آجوئی ءَ، گُڑا من چہ وت ءَ اِیمن بہ آں کہ جنگو جان ءُ آئی سنگتانی، بلوچ راج ءِ زِندانی ءُ شھیدیں پُسّگانی دیستگیں واب مانا۔۔۔۔۔۔۔۔۔
اگاں ما پہ اے راجی جُنز ءِ مُھکم کنگ ءَ ھر وڑیں کُربانی ءِ دَیَگ ءَ ساڑی بوت اِیں، گُڑا مئے شھیدانی دیستگیں واب ءَ پہ مانا کنگ ءَ کسے داشت نہ کنت، ناکہ وسّاچیں پاکستان۔
” ائے بلوچاں اِتھاد، پہ وشیں روچاں اِتھاد "
