پاکستان کی عسکری حکام کے ذرائع نے ضلع کیچ کے علاقے کہیر کور، دشت میں بلوچ سرمچاروں کے حملے میں 10فوجی اہلکاروں کی ہلاکت کی تصدیق کردی ہے۔
اس حملے کی ذمہ داری بی ایل ایف نے قبول کرتے ہوئے فوجی اہلکاروں کی ہلاکتوں کی تعداد 17بتائی ہے۔جبکہ ایک سرمچار کی شہادت کی بھی تصدیق کردی۔
بی ایل ترجمان کے مطابق بلوچ سرمچاروں نے دشمن کا اسلحہ اور دیگر فوجی ساز و سامان قبضہ میں لے کر چوکی کو نذر آتش کردیاجبکہ قابض دشمن کے خلاف اس حملے میں بی ایل ایف کاایک سرمچار ممتاز عرف بالاچ دشمن کے خلاف بہادری سیلڑتے ہوئے شہید ہوئے۔
پاکستانی فورسز و بلوچ سرمچاروں کے مابین یہ جھڑپ منگل کے روز بلوچستان کے ضلع کیچ کے علاقے کہیر کور، دشت کے مقام پر قائم فوجی چوکی پرحملے کے بعد شروع ہوا۔
مقامی ذرائع کے مطابق گذشتہ شام کو مذکورہ چوکی پر مسلح افراد بڑی تعداد میں فوجی پوسٹس پر حملہ آور ہوئے دونوں اطراف میں تین گھنٹے سے زیادہ چلنے والی اس جھڑپ میں اندھا دھند راکٹ گولوں اور دیگر اسلحہ استعمال کیا گیا۔
عسکری حکام کے ذرائع کا کہنا ہے کہ حملے میں نشانہ بننے والے اہلکاروں میں دو کا تعلق بلوچستان کے ضلع لسبیلہ اور نصیرآباد جبکہ آٹھ کا تعلق پنجاب کے علاقوں جہلم، گجر خان، ساہیوال، بہاولنگر، ملتان اور منڈی بہاؤ الدین اور شیخو پورہ سے ہے۔
عسکری ذرائع کے مطابق ہلاکتوں کی شناخت نائیک وقاص سکنہ لسبیلہ،عدنان سکنہ باول نگر،شہزاد سکنہ ساہیوال،ظفر سکنہ جہلم،ذہن سکنہ جہلم،نوید غفورسکنہ ملتان،فرحان سکنہ شیخوپورہ،ارسلان سکنہ منڈی بہاؤالدین، محبوب سکنہ نیرآبادکے ناموں سے ہوگئی ہے اورزخمیوں میں خرم سکنہ چکوال،حمیدسکنہ ژوب اور لطیف سکنہ چنوٹ شامل ہیں۔
