زِندگی! تو وت منی کِسّہ ءِ کارِستے یے، من تئی کِسّہ ءِ کُجام کارِست بِہ بَہ آں۔۔۔۔۔۔؟
چی ءَ کہ من وتی نیزگار ءُ ایردستیں بالاد ءَ وت یک ناسرجمیں کِسّھے آں، بلے وھدے تئی کارِستے بِہ بَہ آں، گُڑا دُگنیا من ءَ کُجام چمّاں چار اِیت۔۔۔۔۔۔۔؟
چہ بازیں سَوڑگ ءَ پد زِندگی دیم ءَ گام جنان بوت ءُ گْوشاں الوت کُت ءُ گْوشت ئے۔۔۔۔۔۔
ھو! تو باندا کِسّھے بَہ ئے ءُ بُنگپّ من، چی ءَ کہ تو بے من ءَ ھُورک ءُ ھالیگیں درپے یے۔
گوں زِندگی ءِ اے ھبر ءِ اِشکنگ ءَ ھور منی جبین ءَ آسے تالان بوت ءُ تیوگیں بالاد دْرھگ ءَ لگ اِت۔ ھیالانی آپریچ ءَ نوکیں ھیالے تیجار بوت ءُ درنگازگ اِت ئے، تو وتی ھستی ءَ شاھگان لیکے ءُ چہ من ءَ شمشکار پرچا۔۔۔۔۔؟؟
بلکیں! من وتی اندر ءَ جتائیں دْروشمے ءِ واھُند ءُ ھیالانی امبارے آں، گُڑا تو چِتور منی کِسّہ ءِ بُنگپّ بَہ ئے، تو زان ءَ واجہ سُکرات ءِ زِندمان ءِ بابت ءَ نہ ونتگ کہ اے گپّاں جن ئے۔ دومی واجہ سُکرات تو زان ئے چے گْوشتگ۔۔۔۔۔؟؟؟
واجہ سُکرات ءَ گْوشتگ: مئے ھیال ( خیالات ) گیش کِیمتی اَنت، مئے زِندگی نا!
بلکیں منی کِسّہ ءِ بُنگپّ منی ھیال بَہ اَنت تو نہ، کارِستے ءِ الم۔۔۔۔۔۔۔۔
وھدے اے ھبر کہ زِندگی ءِ گُوشاں کپت، اجب ھیرانگی یے سھرا بوت، بلے من جزم اِت آں کہ اے ادارُکی زِندگی پہ کس ءَ دائِمی نہ اِنت، زِندگی ستر وتی واھشتانی چمّگ ءَ بِِہ پلگار اِیت ءُ درروُپگ ءِ جُھد ءُ کُوشست ءَ مُلمہ بِہ بیت، داں کِردار واناک مہ بیت زِندگی زِندگ نہ مان اِیت۔۔۔۔۔۔۔۔۔۔
گُڑا پرچا۔۔۔۔۔۔؟
انگت لھتیں بیرکدار زِندگی ءِ دُمب ءَ چو تُنّیگیں سید ءَ کپتگ کہ زِندگی دز نہ کپ اِیت، چی ءَ کہ منی زانگ ءُ لیکہ ءِ رِد ءَ زِندگی داں ھما وھد ءَ زِندگی یے گْوشگ نہ بیت شیشاریں کِردارے ءِ ھُدابُند مہ بیت۔۔۔۔۔۔۔۔۔
چو وَ تانسریں دُگنیا ءِ بنی آدم زِندگی یے ءِ واھُند اَنت، نہ زِند ءَ آیاناں چوشیں شُناس ءُ پجّارے ھست، ناکہ مرگ ءَ پد زِندگ مان اَنت، ابید لھتیں ھسابی ءُ چندے۔۔۔۔۔۔۔۔۔۔۔۔
زِندگی چو گُنگیں بُت ءَ دُور میلانک اَت ءُ منی گپّاں گُوشدارگ ءَ اَت کہ ناگت ءَ چِڑکّھے کُت، تو راست گْوش ئے کہ مرگ ءَ پد منی سپر چو بشّ آماچیں ھامین ءَ اِیرھت بیت، بلے چرے ھبر ءَ بیھال کہ تئی وڑیں کارِست ءُ لھتیں شگالانی کارپدانی باپُشت ءَ من دوبر ترکاں ءُ تیجار بَہ آں۔۔۔۔۔۔۔۔، لھتیں بے وس ءِ مرگ ءَ پد من شموگ ھم بَہ آں۔۔۔۔۔۔۔۔۔
چہ بازیں جیڑگ ءُ گوں وت ءَ سَوڑگ ءَ پد من انگت دو دِلگ اِت آں ءُ زِندگی ءِ پسّو دَیَگ گْران کپتگ اَت۔ چی ءَ کہ زِندگی ءِ داتگیں پسّو پمّن چو جُستے ءَ میلانک اَت، پمشکا من دیم گوں زِندگی ءَ کُت ءُ جواب ترّینت کہ تو راست گْوش ئے کہ من دوبر ترکاں ءُ تیجار بَہ آں، بلے اے کِردار ءِ سارت ءُ ھونکّیں ساھگ اِنت کہ پِیلّوشگ ءِ بدل ءَ تیجار بَہ ئے ءُ سبز ئے۔۔۔۔۔۔۔۔۔
اگاں نا! تو اُوں ھما روچ ءَ مِرے کہ ساوڑ ءُ میزریں بالاد بے ارواہ بیت، پمشکا اے راستے کہ بے ارواھیں جون بید ء کلّ کنگ ءَ دِگہ ھِچّ درد ءِ درمان نہ بیت، بلے من گْوش آں کہ کسے شیشاریں کِردارے ءِ ھُدابُند بِہ بیت، آئی ءِ مرگ نوکیں زِندمانے۔۔۔۔۔۔۔۔
اے ھبر ءِ اِشکنگ ءُ کمیں بے تواری ءَ پد زِندگی ءِ رولہ رنگیں ٹھک ءُ بچکند بُجان بوت اَنت۔ چہ ٹھک ءُ بچکنداں پد زندگی ءَ شاکار اِت ءُ گْوشت: ھمیش اِنت! تو گُڈّی ءَ منی گپ ءِ سِیمسر ءَ اتک ءُ سر بوت ئے، من ترا گْوش آں کہ من دوبر تیجار بَہ آں، ھاھاھاھاھاھاھا۔۔۔۔۔۔۔۔۔۔۔۔۔۔
من پہ تھمبل چِڑکّہ کُت ءُ زندگی ءِ پسّو ترّینت کہ تو الم دوبر تیجار بَہ ئے ءُ ترک ئے، بلے جْوانیں کِردار ءُ شگالیں کارپدانی باپُشت ءَ، اگاں نا بے کارِستیں بالادانی شھر ءَ تو پہ مُجّتی بیگواہ بَہ ئے۔ پمشکا من گْوش آں کہ اے شگالیں کارپد ءُ شیشاریں کِردارانی ساھگ اِنت کہ تو سر ءَ چیر دے ءُ وت ءَ دوبر ساٹے، اگاں نا گپّ ھما اِنت کہ من پیسر ءَ گْوشتگ۔۔۔۔۔۔۔۔۔۔۔۔
شرّیں ساھتے ءَ بے چِڑکّھی ءِ دروازگ بُتک ءُ بے تواری ءِ ھاکمی برجاہ منت، ناگت ءَ گْواتے ءَ شِیکّ اِت ءُ زندگی ءِ تلکاریں لُنٹاں پُرشتگیں بچکندے سھرا بوت ءُ گْوشگ ءَ لگ اِت، ھو! من ءَ تئی ھبر باور اِنت، بیا من ءُ تو ھوری ءَ اے کلوہ ءَ شِنگ ءُ تالان کن اِیں کہ ما کَے اِیں۔۔۔۔۔۔۔۔۔۔۔
ابید جیڑگ ءَ سوڑگ ءَ من گوں زندگی ءِ دانکاں تِپاک کُت ءُ ھو کُت، چی ءَ کہ زندگی پہ منی دوئیں دانکانی منّگ ءَ لاچار بوت، اگاں نا من چو پہ نازانتی زندگی ءَ گوں ھِچّ وڑ ءَ پہ تِپاکی ءَ ساجو نہ اِت آں۔۔۔۔۔۔۔۔۔۔
پمشکا من گُڈّی ءَ اے ھبر ءَ پہ جزم گْوش آں کہ مارا چہ مرگ ءَ پد پہ مُدیمی زندگ بُوَگ ءِ ھاتِر ءَ شیشار ءُ جْوانیں کِردارے ساٹگی اِنت، چی ءَ کہ گْوستانک شگالیں کارپدانی پُولِنگیں بالاداں ھم گیر کار اِیت۔۔۔۔۔۔۔۔۔۔۔
گُڑا! من ءُ تو کُجام کارِست ءَ پیلو بَہ کناں کہ باندا گْوستانک مارا پہ شرپ ءُ وژنامی یات بِہ کنت ءُ گیر بیار اِیت،۔۔۔۔۔۔۔۔۔۔۔۔۔۔؟؟؟
