بلوچستان کے ضلع لسبیلہ کے علاقے سکن اوتھل میں کوئٹہ ٹوکراچی شاہراہ پر ٹریفک حادثے میں پاکستان کے چیئرمین سینیٹ صادق سنجرانی کے چھوٹے بھائی ہلاک ہوگئے۔
لسبیلہ انتظامیہ کے مطابق ہفتے کو اوتھل کے قریب کوئٹہ ٹوکراچی قومی شاہراہ پر سکن اوتھل کے مقام پر کراچی سے کوئٹہ جانے والی کار مخالف سمت سے آنے والے آئل ٹیکر سے ٹکراگئی۔
ان کا کہنا تھا کہ کار اور آئل ٹینکر کے ٹکر کے نتیجے میں ڈرائیور یونس شاہ موقع پرہلاک ہوئے جبکہ چیئرمین سینٹ اکے چھوٹے بھائی سالار خان سنجرانی شدید زخمی ہوگئے۔
انہوں نے کہا کہ سالار خان سنجرانی کو زخمی حالت میں طبی امداد کے لیے سول ہسپتال اوتھل منتقل کیا گیا، مزید علاج کے لیے کراچی منتقل کیا جارہا تھا کہ راستے میں زخموں کی تاب نہ لاتے ہوئے دم توڑ گئے۔
ضلع لسبیلہ کی انتظامیہ نے کہا کہ واقعے سے متعلق تحقیقات شروع کردی ہیں۔
