براہوئی نادامتل ”سالک کارہ گالاک سلِرہ“ہر ہمووختا یات بریک ہراوخت کسس یات برے اویات آتیٹی گلہ شکوہ یا زہیری او ارمان اوڑدھ مرے۔تو اینو یاداکان مست ہروخت سِیل بریک اوڑتون اوڑدہ گجر او نا حلواہ ءِ کننگ او خنئنگ تون اسہ وارس کنا دماغ آاسہ ہندنو ڈکھس بریک کہ کاش ای تینا دوتیئٹ ہمو عظیم انگا سیاسی سنگت ہرا نا است خواہی تینا ڈغار و تینا قوم اتون ہنداخہ در اسک کہ شہ رگ نا اسہ بندغ تون۔ایہن تو بلوچستان ہموخرنا ڈغار ءِ کہ اوفک داڑے ہرطبقہ فکر نا بندغ ودی کرینر کہ اوفتہ خنئنگ تون است ہنداخہ درک خلیک کہ نن دنیا نا اسہ خوش نصیب او قومئس حساب مرینہ ولہ ایلو پلوان داڑے ہمو کڑدارنا مخلوق ہم دوبریک کہ بندغ کواک کننگا بیوس مریک۔یقناََ جوان او بدئنگا کڑدار نا بندغاتان لس مخلوق واقف ءِ۔جوانئنگا کڑداراتیٹی نوری نصیر خان،خان مہراب خان،نواب خیربخش مری،نواب اکبر خان،بالاچ مری،غلام محمد بلوچ،ڈاکٹر عبالمنان،استاد اسلم،اوایلو ہمو مخلوق کہ د اکوڑو آدنیا ءِ یلہ کریر یا اینو ہم ساڑی اریر،ہندن ایلو پلوان ہمو پنک ہم بریرہ ہرافتا بنئنگتون کاٹم اوخنک شیف ڈغاراٹی خلئنگرہ دا مونا کڑدار نا مخلوق ءِ نن پاکستان نا دوآن بہامروکا بے ضمیر ہم چائنگ کینہ دافتیٹی،ملاحسن،عیدو،سڑداردوداخان زرکزئی،ملاشفیق محمدزئی،ثناء اللہ زرکزئی،حاصل خان بزنجو،ملا اقبال بزنجو،ڈاکٹر مالک اوایلو بھازا خنشیف تا پنٹ چانہ۔دہن کہ نن درشان کرینہ کہ کاٹم ِ بڑز کروکا کڑدار آتیٹی اسٹ ڈاکٹر عبدالمنان شہیدنا پنٹ چائنگک تو دہنا کڑدار آتا جوزہ،اوفتا نظریاتی فکر اوفتا دے ءُ نن نا ڈکھ ویل آتا نیامٹی آجوئی کن کاریم کننگ قوم اکہ اسہ ہندنو کسر ئسے کہ اونا زیہا عمل کرسہ نن غیرفطری آ ملک پاکستان آن آزاتی دوئی کننگ کینہ۔داہیت اٹی ہچو شک اسے نا گنجائش سلیپک کہ بلوچ آزاتی کن کاریم
کروکاتا کاریم اٹی کمی ارے ولہ ڈاکٹر عبدالمنان شہید ہمو کڑدارءِ کہ اوفک اسہ روحانی باولمہ اسے نا کڑدار تون اوڑدہ اسہ ایلم،اوسیاسی سنگت اسے نا ذمہ واریتہ ہم برجا تخار۔اوفتازندنا دوران ہراوخت کہ اوفتون تول بش نا شرف رسینگا تو اوفتا بھازا ہیتاآتان سبخ ہیل کننگ نا شرف دوبس اوبھازا ہیتاک اوفتا یاتہم بریرہ ولہ اوفتا اسہ ہیت اس ہراکہ کنے اینو ہم یات سلیسنے اوفک قومی خذمت اٹی دے ءُ نن آختہ منگونتون اسہ دے شہرآہنار اوواپسی آن بنئنگتون بھاز است نا حُب مہراٹ توار کریر،”گودی نم تینا چناء حرفبو داکان منہ کلو گجر نا اومشین ئس ھلبو ببو کنا است اینو سخت گجرنا حلواہ کنئنگ خواہک“ اوفتا داہیت آن پد اتفاقاََ نن سفر ئسے آہنانہ تو اوفتہ پارین ڈاکٹر صاحب فلحال نن سفر آ پیشن مرینہ انشاء اللہ بسن تو یقیناََ نم کن حلواہ کینہ۔داڑتون نن سفر آپیشتمان تو یکنیم تُو آن پد بسن سماء تما اوفک ہنوکا دے کراچی اان مشکے یعنی تینا علاقہ غا برام سے آہنانر۔داڑان پد اوفتون ملاقات نا شرف دوبتو،ہندن اسہ دے اخبار اٹی خنان اوفک مستونگ اٹی قوضہ گیر آ پاکستان نا فوجنا دوآن تینا سنگتاتتون اوڑدہ شہید مسر۔داحوال نا رسینگ انگان پد اسہ پلوان است مونجا مسک ولہ ایلو پلوان یات بسک کہ اوفک تینٹ ہم ہروخت درشان کریرہ کہ ننا کسر شہیدی خواہک او آجوئی ننا دترآن ننے دوبریک۔اوفتا دا ہیتاتہ یات کننگتون اسہ وار پدا ہرکسس تینے سنبھالا۔ولہ اوفتا دا ہیت اینو ہم دہ سالآن پد کنے ہرہمو وختا یات بریک ہراوخت گجر آتہ خنو اسہ وار تون اوفتا است خواہی یات بریک کہ کاش ای تینا دوآن دا عظیم ائنگا قومی رہبر کن گجر نا حلواہ کننگ کروسٹ۔اوفتا شہادت آن پد اینو ہم ہروخت ای گجر نا حلواہ کیو یا بازاران حلیو اسہ وار لازمی اوفتہ ڈاکٹر نا پنا فاتحہ ایتوہ۔اللہ اوفتہ جنت نصیب کے اوفک تینا ورنائی اوزند ءِ ننکونا نابود اراج کن قربان کریر۔داسا ننا ذمہ واری ءِ کہ اوفتا ایمانداری اولنگھڑو ملاسی اٹ تینا فکرءِ مونا دننگ نا پروگرام برجا ہمو وکتئسکان تخون ہراوخت ئسکان قوضہ گیر آریاست نا اسہ سپاہی اس ہم ننا ڈغار آ سلیک۔یقناََ دا مصخت اے تینا ئی کننگ تون اوفتا دتر نا اسہ اسہ پھڑینک نا حسابے حلئنگتون اوفتا روح ءِ آسراتی دوئی بریک۔
