سلیمان جان تو پہ راستی ءَ مُنجارھے اِت ئے ، تئی مُنجارھی پہ ھما سر زمین ءُ بلوچ راج ءَ اَت کہ ھپتاد سال ءَ چہ گیش اِنت گُلام اِنت۔
اے مئے سرکل گْوش ئے۔۔۔۔۔۔۔۔۔۔۔یا انچیں ماھُول ءُ چاگِردے جوڑ بوتگ اَت کہ ھمُک کارِست ءَ پہ دوستی وت ءَ یک نامے بستگ اَت۔ مُنجاراہ ، سیّد ، بُزرگ ، گُلّو ، ناتو ، پیشُکوک ، تیرے نام ءُ پیگمبر۔۔۔۔۔۔۔۔۔
اگاں من بِہ گْوش آں چے پیم ترا اے مُنجاراہ ئے نام بندگ بوت ، اے چہ تئی سادگیں تب ءُ آشوبی کِردار ءَ ۔ مُدام گُوں گَل سازی ءَ مُشکول بوتگ ئے۔۔۔۔۔۔۔۔۔۔، کُجا کہ موہ رستگ تو ھرجاہ پہ راجی جُنز ءُ گَل ءِ کارانی دیمروئی ءَ نا سرد زانتگ نیکہ گرم۔۔۔۔۔۔۔۔۔، زیارت ءُ پیرے ئِے سر بیتگ یا دُکّان ءُ ھُوٹلے ءِ دیم بہ بیت۔۔۔۔۔۔۔۔۔۔تو گوں بزّگیں راج ءَ ھم دیوان اَت ئے ۔
ھمے داب ءَ وھدے یک تامُرے ٹاھینگ بِہ بیت ءُ ھما درچِتگیں کارِستاں چہ یکّے نیمراہ ءَ گِسر بہ بیت۔۔۔۔۔۔۔گُڑا ھما کارِست ءِ کمّی پہ مُدامی مارگ بیت ءُ آئی ءِ جاگہ ھُورک ءُ ھالیگ بیت۔ مُنجاراہ۔۔۔۔۔۔! ھمے رنگ ءَ تئی شھیدی ءَ رند ھما سرکل ءَ تئی کمّی ءُ رھشُونی مُدام گیر آرگ بیت۔۔۔۔۔۔۔
بلے تو یک انچیں کارِستے ئے کہ آ کارِست مھکمیں لیکہ ءُ توکلے ءِ نام اِنت۔ ھما سرکل ءَ کہ ترا مُنجاراہ توار کنگ بیتّ ءَ ھما کارِست انوں یکّے چہ دومی ءَ دُور اَنت ، بلے پہ بِچکند ءُ تئی کاروان ءِ ھمراہ اَنت۔ پیگمبر انگت گوں وتئی مزن توکلی ءَ گل ءِ پیگام ءَ دیم ءَ برگ ءِ جُھد ءَ اِنت۔ سیّد ھم تئی اِیمانداری ءُ تمردی ، گل سازی ءِ توسیپ ءَ کنت ءُ کیڈرزاں تئی رندپدانی رندگیری ءِ درس ءَ دنت۔
گُلّو ءُ بُزرگ تئی رَھبری ءَ چہ ھما کار کُتگ اَنت نوں گْوشت کن ئے کہ پہ وت تئی وڑیں رھبرے نہ گِندگ ءَ اَنت۔
تیرے نام ئے جُست ءَ مہ کن گوں وتی ھما گلی کاراں گُلائیش اِنت ءُ کدی کدی تئی ءُ آجزو ءِ ترانگاں گیج اِیت ءُ دِگہ نوکیں جزبگے شکسائیت۔
پیشُکوک ترا چہ رند تئی ھَند ءَ دمگ ءَ چہ دیر اِنت ، اِیشی ءَ وتی وش بھتی سرپد بیت کہ انگت تئی کاروان ءِ مُساپِر اِنت ءُ دیم پہ مِنزل ءَ جُنزان اِنت۔ گوں نوکیں نوکیں کارِستاں ڈیک دیان اِنت۔۔۔۔نام مٹّ اَنت بلے لیکہ ءُ مِنزل یکین اِنت۔۔۔۔
مُنجاراہ۔۔۔۔۔! تئی شھیدی ءَ رند مجید جان ءُ دِگہ بازیں سنگت شھید کنگ بوتگ اَنت ، لھتیں روچ ءَ پیسر رھمدل جان ھم شھید کنگ بوت۔ لکّی جان انگت زندانی اِنت ، ڈاکٹر دین جان ، زاھد جان ، زاکر جان انگت بندی ھانہ ءَ بندیگ اَنت ، بلے تئی آجوئی ءِ کاروان دیم پہ مِنزل ءَ جُنزان اِنت ۔
