بلوچستان کے دارلحکومت کوئٹہ کے مرکزی شاہراہ جناح روڈ کے قریب سرینا ہوٹل کے باہر تنظیم چوک پر ایک بم دھماکا ہوا جس کا ہدف سیکورٹی اہلکار تھے۔
دھماکے کے نتیجے میں 2 پولیس اہلکار ہلاک جبکہ 8 اہلکاروں سمیت 12 افراد زخمی ہوگئے۔
پولیس کے مطابق دھماکے سے قریبی عمارتوں کے شیشے بھی ٹوٹ گئے جبکہ زخمیوں کو ہسپتال منتقل کردیا گیا۔
دھماکے کے بعد سیکورٹی فورسز نے علاقے کو گھیرے میں لے کر مزید تفتیش شروع کردی ہے۔
حکومت بلوچستان کے ترجمان لیاقت شاہوانی نے دھماکے میں ہلاک ہونے والوں کی تصدیق کرتے ہوئے کہا کہ تنظیم چوک پر دھماکے کی شدید الفاظ میں مذمت کرتا ہوں، جہاں 2 اہلکار جاں بحق اور 8 پولیس اہلکاروں سمیت 12 افراد زخمی ہوئے۔
انہوں نے کہا کہ زخمیوں کو ہسپتال منتقل کرلیا گیا اور ہسپتال میں ایمرجنسی نافذ کردی گئی ہے۔
ان کا کہنا تھا کہ دھماکا خیز مواد موٹر سائیکل میں نصب کیا گیا تھا، دہشت گرد بلوچستان کے امن خراب کرنا چاہتے ہیں اور خوف و ہراس بھیلانا چاہتے ہیں۔
لیاقت شاہوانی نے بتایا کہ حکومت پرامن بلوچستان کے حالات خراب کرنے والوں کو کیفر کردار تک پہنچائے گی۔
