بلوچ یکجہتی کمیٹی (کراچی) نے سمی دین محمد کی جانب سے دیئے گئے ریلی کے بیان کی حمایت کا اعلان کردیا۔
لاپتہ ڈاکٹر دین محمد بلوچ کی بازیابی کیلئے ان کے صاحبزادی سمی دین بلوچ نے 28جون2021 کو کراچی آرٹس کونسل تا کراچی پریس کلب تک ریلی کے انعقاد کا اعلان کیاہے۔
بلوچ یکجہتی کمیٹی (کراچی)نے اپنے بیان میں تمام ریاستی اداروں سے اپیل کرتے ہوئے کہا ہے کہ جبری گمشدگیوں کے مسئلے کو جتنا پرامن طریقے سے حل کیا جا سکتا ہے اس کے حل کے لئے اپنا بھرپور کردار ادا کریں۔
انہوں نے اپنے بیان میں سمی دین محمد کی کاوشوں و کوششوں کو سراہتے ہوئے کہاکہ ہم تمام تر لوگوں سے اس ریلی میں شرکت کی اپیل کرتے ہیں اور سمی دین محمد اپنی قوم کے لوگوں کی آمد کی منتظر رہے گی۔
بلوچ یکجہتی کمیٹی (کراچی)نے اپنے بیان میں کہا ہے کہ بہت افسوس ہوتا ہے کہ جب اپنی قوم کے بچے بچیوں کو اس طرح سے روڈ پر اپنے پیاروں کی بازیابی کے لیے کبھی احتجاج،کبھی بھوک ہڑتالی کیمپ، کبھی کراچی پریس کلب، کبھی کوئٹہ پریس کلب، کبھی اسلام آباد ڈی چوک،چاہے سردی ہویا گرمی،روڈوں پر ہاتھ میں اپنے پیاروں کی تصویریں، چہروں پر درد و الم، لبوں پر جھوٹی ہنسی، دل میں ایک ایسی درد جس کو چاہ کر بھی نہ بیان کر سکیں اور اگر بیان کیا بھی جائے تو اس معیار کے الفاظ نہ مل پائیں کہ جو اس درد کو بیان کر پائیں۔
بیان میں کہا گیا ہے کہ آج مہلب و سمی اپنے والد کی بازیابی کے لیے ہزار دکھ ہزار تکلیفیں برداشت کرکے نہیں تھکی ہیں اور انہوں نے عہد کر لیا کہ ہم اپنے والد کو ضرور بازیاب کریں گے اور اس بازیابی میں وہ اپنے قوم و وطن کے لوگوں سے بروزِ پیر 28جون2021 کو منعقد ہونے والی ریلی میں بھرپور شرکت کی اپیل کرتی ہے۔
واضع رہے کہ بلوچ یکجہتی کمیٹی (کراچی) بلوچ مسنگ پرسنز فیملیز کی جانب سے ہر طرح کی احتجاج کی حمایت کرتی رہی ہے۔
