کوئٹہ میں سردار بہادر خان ویمن یونیورسٹی کے ہاسٹل سے ایک خاتون پروفیسر کی لاش برآمد ہوگئی ہے جبکہ تربت میں مسلح افراد کے حملے سے ایک شخص ہلاک ہوگیا۔
بلوچستان کے دارالحکومت کوئٹہ میں خواتین اسسٹنٹ پروفیسر کی لاش برآمد ہوئی ہے۔
تفصیلات کے مطابق سردار بہادر خان ویمن یونیورسٹی کے اسسٹنٹ پروفیسر ڈاکٹر شائستہ کی لاش یونیورسٹی ہاسٹل سے برآمد ہوئی ہے۔
ڈاکٹر شائستہ کا تعلق کراچی سے بتایا جارہا ہے تاہم موت کی وجوہات تاحال معلوم نہ ہوسکی۔
لاش کو پوسٹ مارٹم کے لئے کوئٹہ بی ایم سی اسپتال منتقل کردیا گیا ہے۔
اس حوالے سے مزید تحقیقات متعلقہ حکام کررہے ہیں۔
جبکہ بلوچستان کے ضلع کیچ میں مسلح افراد نے فائرنگ کرکے ایک شخص کو ہلاک کردیا۔
فائرنگ کا واقعہ ضلع کیچ کے مرکزی شہر تربت کے علاقے میری کے مقام پر پیش آیا ہے۔
فائرنگ کے نتیجے میں ہلاک ہونے والے شخص کی شناخت ملا واحد سکنہ میری کے نام سے ہوگئی ہے۔
تاہم واقعہ کے محرکات تاحال معلوم نہ ہوسکے۔