شہید غلام محمدبلوچ
شہید شیرمحمد بلوچ
شہید لالا منیر بلوچ
ماتی منی ماتی منی
مُرواردیں اَرساں مہ گْوار
واہگ منی جندءِ نہ اِنت
ہست اِنت منی زردءِ کرار
ماتی منی دلجم بہ بی
مرگءِ لوار ءِے کُشت نہ کنت
من کہ مِراں بازینے بیت
گوں شادہاں گو ں تو ہوار
تلکاریں ہونانی نشان
ارسیگ انت کاڑانی گُشان
(شہید غلام محمد )
سد سلام گُشاں مُرگ آپ ءِ شہیداں کہ وتی سر اِش پہ ماتیں گلزمینءُُ کُلیں انسانیتءُُ گلامیں راجانی سربلندیءِ ہاترا کُربان کُت انت۔ مروچی ہمے شہیدانی ہونءِ لکیر بلوچ راج ءُُ کُلیں گلامیں قومانی رہشون انت۔ شہدائے مُرگ آپ ہما شہید اَنت کہ جُنزءِ بنداتی دہرءَ زورگیرءَ 3اپریل2009ءَ چہ ایڈوکیٹ میر کچکول علیءِ کارگسءَ روچء رحمانی کُلیں مہلوکءِ دیما دزگیر کت انت۔ ایڈوکیٹ میر کچکول علیءَ باقاعدہ فوجءِ خلافءَ ایف آئی آر ہم درج کت ، گواہی ہم دات کہ شہدائے مُرگ آپ چہ منی کارگسءَ ، منی چمانی دیما یزیدی لشکرءَ چست کتگ انت۔ اے دْرچءَ من ایڈوکیٹ کچکول علیءِ ہمت ءُُ جوانمردیءَ سلام گُشاں، بلے ہمے ایف آئی آرءِ سرا کسءَ دلگوش گْور نہ کت، تانکہ چیزے روچ ءَ پد بزاں 9اپریل2009ءَ شہدائے مُرگ آپءِ زدگ ءُُ زانگولیں لاش مں مُرگ آپءَ دزکپت انت، بلوچءِ ازلی دژمن، پنجاپءِ یزیدی لشکرءَ شہدائے مُرگ آپ سک باز لَٹّ ءُُ کُٹّ کتگ اتنت، انچوش کہ آیانی لاشانی پجار ہم مشکل ات، چہ ہیلی کاپٹرءِ سرا دور دیگ بیتگ اتنت، دژمنءَ سک باز اذّیت داتگ اتنت۔
نِزّء من اے ہبرءِ تہا شک نیست کہ جہانی سامراج ہم اے درگتءَ گوں یزیدی لشکرءَ ہم پَتّ ءُُ ہمراہ اَت، چیا کہ جان سولکی نامیں مردے، بلوچ راجی سرمچاراں اے ہاترا دزگیر کُتگ اَت کہ واکداریں توان مئے نیمگا دلگوش گْور بہ کننت، مئے آجوئیءِ جیڑہءَ بہ زیرنت۔ دَراہگءَ پدجان سولکیءِ جندءَ ہم گْوشتگ ات کہ آ جہانی واکداراں سکین دنت کہ بلوچءِ حقءَ آواز چست بہ کننت، بلے ہچ نہ بیت۔ اے راجی بامردانی شہید یءِ یک سبب یے منی نِزءَ جان سولکیءِ دزگیر کنگ ءُُ یلہ دیگ ہم بیت کنت،چیا کہ اے درگتءَ شہید غلام محمدبلوچ جان سولکیءِ رہائی کمیٹیءِ باسکے اَت،جان سولکیءِ پہ سلامتی دراہگءَ پد اے بلوچ رہشونانی چست کنگ ءُُ بے دردی شہید کنگ الم مانایے داریت، دِلانی تہا شَک ودی بیت کہ اے ہَر دُکیں وئیلانی کڑی وت ماں وت دپ ورَنت، بلے وائے بے وسی ءُُ نادزرسی، سد حیف پہ زوراوری، اے درگتءَ ہچ رنگیں پٹّ ءُُ پولے دیما نیاتکگ۔
مروچی کلیں بلوچستان ، کلیں انسانیت اے شہیدانی سرا ناز کنت، مروچی بلوچ راج ہمے شہیدانی رند پدءَ وتی ماتیں گلزینءِ آجوئیءِ جہدءَ دیما بران اِنت۔ اے شہیدانی ہون بلوچستانءِ آجوئیءِ مانزمان اَنت۔
بلوچ شہیدانی لڑ مروچی سک دْراج انت۔ کلیں شہیدانی جہد ستا کرزنت۔ اے دْرچءَ من بلوچستانءِ اندگہ شہید ءُُ دنیاءِ گلامیں راجانی شہیداں سلام گُشاں۔ شہید غلام محمد گْوشیت:
کُہتاں آزمان کنت سرشان گوں رگامی گْوارگاں
پُر وداریں دیدگاں ارسے شلیت باریں کدی
مہرءِ آسءَ سُتکگ اَنت پیردانءِ سْیاہ ڈنءِ پِڑءَ
سُہرچک ءُُ آتاریں یک پُلے سْرپیت باریں کدی
وش رواجیں وہدءِ سالونک کیت پہ گْورامبازےءَ
پُر وداریں وہدءِ بانور سمبہیت باریں کدی
شہدائے مُرگ آپءِ ارواہ ہما وہدءَ تاہیر گِرنت کہ کُلیں بلوچ راج شہیدانی رند پدءَ وتی جہدانی کاروانءَ پہ وتی مرادانی منزلءَ رہادگ بہ کنت۔ شہیدانی روچ دارگ ءِ مول ءُُ مراد گوں شہیدانی پروگرامءَ ہوار بئیگی انت، شہیدانی نیم بُندگیں واب تعبیر کنگی انت، شہیدانی واب ءِ تعبیر آجوئی انت۔ گُڈسرا من وتی نبشتانکءَ گوں وتی اے شعرءَ آسر کناں کہ اے شہدائے مرگ آپءِ نامءَ ندْر کنگ بیتگ:
ندْر پہ شہدائے مرگ آپءَ
ہوناں مرگ آپ ءَ شنزتگ دوشی
گلزمین ماتیں جُمبتگ دوشی
گونڈلاںآماچ انت کئی بالاد
جون کئی باریں شِنگ اتگ دوشی
میر بلوچ خانءِ شکّلیں جنگجاہ
ٹوپ ءُُ دُمبالاں گُرّاِتگ دوشی
پُرسی اِنت نوریءِ دیار مسکیں
گوکپْروش چہ زُلماں لرزاِتگ دوشی
زوراکی چنگیز ءُُ یزیدانی
آزمان لنجیں جکستگ دوشی
جِنّ ءُُ انسانءُُ پْریشتگاں گْریتگ
ارش ءُُ کُرش جہلءَ کنزاِتگ دوشی
شنزاِتگ ہوناں تلّاں مرگ آپءِ
مسکیں ساچاناں بُرّاِتگ دوشی
نگرہیں جان ءُُ پتکگیں دلبند
بالاد سِیکارچاں بُرّاِتگ دوشی
جہہ جت آشوبءِ مُرتگیں ولّءَ
جمبراں زلمءِ پوش اِتگ دوشی
گیدیءِ دوست ءُُ دژمناں گْریتگ
ہون تلاراں چہ چُرّاِتگ دوشی
دین ءُُ اسلامءِ سیمسر اِش پْروشت انت
دژمنءَ ہِیکّی شنزاِتگ دوشی
گوں وتی بکّالی تب ءُُ میلاں
ہُنڈال انساپءِ بُرّاِتگ دوشی
لالءِ گیوارءِ مادنیں کشکءَ
کلکشان تامور اِش کُتگ دوشی
کدہاں پُر کیفیں طہورانی
چہ گنوکیءَ سار کتگ دوشی
مہرجتیں زِردءِ تْرونگلیں تْرمپے
لالءِ گیوارءَ دْرنز اِتگ دوشی
سُہرچکیں ہوناں مئے شہیدانی
گلزمین بانور کتگ دوشی
دْرنگیں اَرواہاں اَندرا کبرءِ
گوں جنتّی حُوراں سِیر کتگ دوشی
تاں کدی دارئے مہر ءِ ابدالاں
بالواں رُژنے بالتگ دوشی
تپاکی آجوئیءِ مانزمان انت
بلوچستان آجو بات
