ماتی زُبان ….. کمال بلوچ

0
741

اگاں راج ءَ زندگ دارگ لوٹ اِت گُڑا الم وتی ماتی زُبان ءَ بِہ وان اِت ءُ مردمانی سرپد کنگ ءِ کوشست بِہ کن اِت ، چے ءَ کہ زُبان راجانی پجّار ءُ ھستمانی ءِ چیدگ ءُ نِشانی اِنت ۔ اے بابت ءَ زبان ءِ بستار ءَ چہ بے زُبانیں راجاں پول بِہ کن اِت کہ زُبان ءِ کدر ءُ بستار چی اِنت ۔ کُجام راج ءَ کہ وتی راجی زُبانے بیت گُڑا آئی پجّار ھم چہ آئی ءِ زُبان ءَ بیت ، چے ءَ کہ زُبان اِنسان ءِ جزبگ ءُ مارِشت ءَ نوک کنت ءُ پلگار اِیت ۔

کُجام راج ءَ را مرچی زُبان نیست گُڑا پہ سِتک بِہ زان آ زندگیں راجے نہ اِنت ، چی ءَ کہ راجانی پجّار آئیگی ماتی ءُ راجی زُبان بیت۔ اے راستی یے کہ کُجام ھم راجے زندگ مان اِیت ءُ دیم پہ وشھالی ءُ دیمروئی ءِ نیمگ ءَ گام جنت آئی تہ ءَ زُبان ءِ مزنیں کِردے ھست ۔  اگاں یورپ ءِ تہ ءَ سائنس ءَ دیمروئی کُرتگ اے ھم آئی ماتی زُبان ءِ برکت اِنت ،چی ءَ کہ  دُگینا سرپد بوتگ زُبان زِندگ دارگ لوٹ اِیت ۔

بلے  بدبھتی ءَ مرچی مئے گلامیں  راج  گیش ءَ گیش چہ وتی زُبان ءَ سک باز دُور اَنت ، چراِیشی ھمے پدّر بیت مئے گْور ءَ دُور چاری ءِ کمّی اِنت ۔ اُو زُبان راجانی پجّار ھمے ھاتر ءَ  گْوشگ بیت کہ چہ ھمے زُبان ءَ ھر یکّے وتی راج ءَ را شرّیں دابے ءَ سرپدی دات کنت ۔ھمے زُبان کہ مان اِیت گُڑا یک راجے وتی جزبگ ءُ زِرد ءِ پاھارانی درشانی ءَ شرّیں وڑے ءَ کُت کنت ۔ اگاں زُبان ھترھے تہ ءَ بوت گُڑا پہ جزم بِہ زان کہ آ راج پہ ھتم ءُ ھلاس بُوَگ ءَ دیر نہ کنت ۔  چی ءَ کہ کُجا کالونی ریاست جوڑ بوتگ آئی ءِ مستریں کُوشست ھمے بوتگ آ ایردستیں راجانی زُبان ءُ راجی پجّار ءَ ھلاس بِہ کنت ، پمیشکا آئی ءِ اُرش گیشتر زُبان ءِ سر ءَ بیت ۔

من سرپد بَہ آں داں بلوچستان ءِ سر ءَ پاکستان ءِ کْوزہ ھست اِنت گُڑا بلوچی ءُ براھوئی زُبان ءِ پہ مُدامی ڈالچار کنگ بَہ اَنت ، من اگاں  بِہ گْوش آں وتی جاگہ ءِ کامیات اِنت گُڑا ردیں ھبرے نہ اِنت ، چے ءَ کہ بلوچستان ءِ آباتی ءَ بِی چار  ءُ بلوچی وانگ ءِ کد ءَ بِہ چار چینچُک اِنت ۔ مرچی بلوچ راج ءِ مزنیں کچّ ءُ کیاسے  بلوچی ءِ وانگ ءَ نہ زانت ، ایشی ءِ مستریں سَوب ھمے بوت کنت کہ بلوچی زُبان ءَ را ھتم کنگ ءِ پندل اِنت پاکستان کامیات بوتگ ۔

 بلے من دِگہ ھبرے گِند آں کہ بلوچ کْواسانیمزنیں جُھد جپایے بوتگ کہ چہ وتی راجدوستی ءُ زُبان دوستی ءِ کُمک ءَ وتی زُبان ءِ ھزمت کُرتگ کہ آ نامانی تہ ءَ واجہ زھور شاہ ھاشمی  ، اتا شات (عطاشاد) ،مبارک کازی ،شھید سبا دشتیاری ،گُلام ھُسین شوھاز،گل ھان نسیر ،آزات جمالدنی ،واھد بزدار ،گَوس بھار ءُ دِگہ بازیں نام ھست اَنت کہ آیاں اَچ وتی کُمک ءَ زُبان ءِ ھزمت کُرتگ ۔ بازیں  ابدمان بوتگ ءُ بازیں مرچی ھم ھمے کاروان ءِ ھسپر اَنت کہ واج ھُدا آیاں سلامت بِہ کنت ءُ چِد ءُ گیش زُبان ھزمت کنگ ءِ موہ بِہ رس اِیت دانکہ آیوکیں پدریچ ھیمشانی پدگیری ءَ بِہ کنت ءُ وتی راج ءُ زُبان ءِ ھزمت ءَ ساڑی بِہ بیت ۔

پرے ھاتر ءَ اے بلوچ راج ءِ سر ءَ راجی ڈُبّہ ءُ زِمہ واری بیت کہ آ وتی راج ءُ وتی زبان ءِ پھریزگ ءِ واستا گوں یکمُشتی ءَ دیم ءَ در بِہ کپ اَنت ۔ ھمے رنگ  ءَ اے روچ کہ مرچی زُبانانی میان اُستمانی روچ گْوشگ بیت ، اے ھما بنگالی راج ءِ جُھد ءُ کُوشستانی برورد اِنت کہ اے جُھد دیم ءَ اَتکگ ءُ راجاناں مزنیں سوگاتے بکشاتگ ۔

ھمے وڑ ءَ بلوچ راج ءِ  سر ءَ راجی پرز بیت  کہ وتی زُبان ءِ رکّینگ ءَ ، وتی راج ءِ  آجوئی ءُ وشھالی ءِ واستا جُھد بِہ کنت دانکہ دُگینا ءِ تہ ءَ وتی پجّار ءَ پیداک بِہ کنت ءُ چہ گُلامی ءِ زِندمان ءَ آجو بِہ بیت ۔

زُبان زِندگ بیت راج ءُ کَوم ابدمان بیت ، اُو زُبان دوستی راجدوستی ءِ مستریں چیدگ اِنت ، پمیشکا مارا وتی راج ءِ اندر ءَ اے زانت ءُ پھم ، بود ءُ مارِشت ودی کنگی اِنت دانکہ وتی شھدیں زُبان گیش ءَ گیش بِہ وان اِیں ۔

LEAVE A REPLY

Please enter your comment!
Please enter your name here