دلیریں آ گْوھارے اَت
بلوچ ءِ درد وارے اَت
وتی پہ وار ءُ بزّگاں
مُھکمیں توارے اَت
پہ ڈیھ ءُ راج ءِ دُژمن ءَ
کوھے اَت تلارے اَت
پہ نرمزاریں دوداھاں
لَجے اَت میارے اَت
وتی پہ ماتیں گلزمین
گْواڈگ ءُ بھارے اَت
نہ اَت آ یک جنکُکے
لکّے اَت ھزارے اَت
پہ ھکّ ءِ گپ ءَ دائم ءَ
دلیریں سرمچارے اَت
گُلامی ءَ چہ رکّگ ءَ
آجوئی ءِ جارے اَت
پہ ماھلءُ پہ سمّیاں
دِلانی یک کرارے اَت
پہ گُلزمین ءِ مُوکگ ءَ
بلائیں کردگارے اَت
شھید بوت پہ وتن
درآمدیں ڈگارے اَت
ڈیھ ءِ ھکّ ادا کُت اَنت
زمین ءِ وامدارے اَت
ناگھانی سُوب کُرت
آستونکے مارے اَت
