ماھو!
زمستانی سارت ءُ تھاریں شپے ، من تھنا نشتگاں ءُ منی کش ءُ گوراں بس تاکریچیں درچکانی کپتگیں زردیں تاک اَنت کہ گوریچ ءِ شیکگاں گوں دردانی زِیمراں ساز کنان اَنت۔ لَھتیں روچ اِنت ابیتکیں مُولمانی تہ ءَ زند ءِ نہ وشیں روچاں تیلانک دیگ ءَ آں۔ چونائی ءَ درانڈیھ ءَ تھنائی ، ابیتکی ءُ مُونجائی زند ءِ دائمی ھمراہ اَنت ، بلے مروچاں ابیتکی، تھنائی ءُ مُونجائی گیش بوتگ اَنت ءَ اے ساھت ءَ چِد ءُ گیشتر۔۔۔۔۔۔۔
کئے بِہ پول اِیت اے تھنائیاں
کئے بہ مار اِیت اے ویرانیاں
کئے بہ منّ اِیت کہ رُژن اندر اِنت
چیر ءُ سر اِنت ءُ سیاہ شپ اِنت
ماھو!
ھمُک روچ زندگی چو مَٹّ بیتگیں موسمانی داب ءَ وتی ھر رنگ ءَ منی دل ءُ ارواہ ءِ سر ءَ نکش کنان اِنت۔ برے برے زندگی ءِ سارتیں روشت منی تھانگ ءِ بے تواری ءَ مرگ ءِ امبازاں چگل دنت ءُ برے برے من ءَ ھمے گُمان بیت کہ زندگی ءَ وت ھم بے وسی ءِ چادر مانپوشتگ ءُ مرگ ءِ امبازاں واب کپتگ۔۔۔
درانڈیھ بیتگیں زندگی یک انچیں روکیں چراگے ءِ پیم ءَ اِنت کہ گْوات ءُ شرتگانی سر ءَ تھنا اُوشتاتگ ءُ زندگ بُوَگ ءِ جُھد ءَ اِنت ءُ نہ زاناں گْوات ءِ کُجام شیکّگ زندگی ءِ روکیں کندیل ءَ کُش اِیت۔
ماھو!
ھمے کہ بچّے پہ زمین ندرْ بیت ، گُڑا پہ من ءَ درانڈیھ موتک کار اِیت ءُ ماہ کِسّہ۔ ھمے کِسّہ اَنت کہ ارواہ ءِ دامُن ءَ نکش بَہ اَنت۔ ھمے کِسّہ اَنت کہ منی ارواہ ءِ مُوتک جوڑ بَہ اَنت۔ ھمے سنج بستگیں ھونانی کِسّہ اَنت کہ ماتیں زمین ءِ دلبند ءَ تالان بَہ اَنت۔
ھال اِنت کہ لھتیں تیر دُرشتگیں لاش اَنت نادرھجاہ ءَ سر کنگ بیتگ اَنت کہ کوزہ گیر ءِ جنگی بالگردانی شیلنگ ءَ چہ شھید کنگ بیتگ اَنت ءُ چندے زمین ءِ بچّ اَنت کہ آوار جَنَگ ءُ زندان ءِ تھاریں کُوٹِیاں برگ بوتگ اَنت۔ پد ءَ ھالے تالان اِنت کہ بلوچستان ءَ چہ دور درانڈیھ ءِ بے راھیں گٹّ ءُ گراں بلوچ جھدکاریں زالبول بانُک کریمہ ءِ لاش دست کپتگ کہ کمے وھد ءَ چہ پیسر آوار جَنَگ بیتگ۔۔۔۔۔
ماھو!
زان ئے کریمہ کَے اَت؟ کریمہ بیست ءُ یکمی کرن ءِ کِسّھانی کارستے اَت۔ کریمہ نوکیں پدریچ ءَ پہ یک چیدگے اَت کہ زُلم ءِ ھلاپ ءَ چہ گس ءَ دراتکگ اَت۔ بلوچستان ءِ ھر ھلک ، میتگ ءُ شھراں گردان اَت ءُ واب کپتگیں بلوچ راج ءَ را گُلامی ءِ سما ءُ مارشت ءَ دَیَگ ءَ اَت۔ آیانی زمیر ءَ ٹوھینگ ءَ اَت۔ پد ءَ سیاست ءِ تب بدل بوت ، جَنَگ ءُ بَرّگ گیش بوت، ھلکانی ، ھلک لڈّ ءُ بار بیت ءُ درانڈیھاں پناھگیر بوت اَنت۔ گُڑا کریمہ ھم دیم پہ کینیڈا ءَ اِنسانی ھکّانی پچگرگ ءِ ھاتر ءَ واب کپتگیں اِنسانی زمیرانی ٹوھینگ ءِ ھاتر ءَ شُت ءُ درانڈیھ بوت۔
ماھو!
کریمہ ھما دگ ءُ کشکانی مساپر اَت آ دگ ءُ کشک ابدمان بُوَگ ءُ جسمانی ھوالہ ءَ جُتا بُوَگ ءِ راہ اَت ، بلے من گْوش آں کریمہ ءَ زندگ بُوَگی اَت۔ پہ وتی راج ءَ باز کار کنگی اَت ، وتی راج ءِ مْیان ءَ ساڑی بُوَگی اَت۔ انگت راج بے سما اِنت، گْراں واب اِنت۔ راج گُلامی ءِ گْرانیں واب ءَ چہ ٹوھینگی اِنت ءُ ھمے سما دَیَگی اِنت کہ شُما گُلام اِت پاد بیا اِت۔۔۔۔۔۔۔۔۔۔۔۔بلے کریمہ ابدمانیں مرگے ءِ امبازاں رپت ءُ پُشت ءَ ھزاراں تھل ءُ تُرپشیں یات پش گیتگ۔۔۔۔۔۔۔۔۔۔
ماھو!
برے برے ننداں جیڑاں کہ پہ بلوچاں ھر کُجا بلوچستان اِنت۔ آ کیلکور ءِ مراد مھمد میتگ بہ بیت یا کہ کینیڈا ءِ شھر ٹورنٹو ، ھر کُجائے زلمانی آس شنزیں نوبت تئی سر ءَ ساھیل اَنت۔ ھر نیمگ ءَ کُبلیں دروازگ ءُ کوریں دریگ ءُ رھچاریں چمّ۔۔۔۔۔ھشکیں یات ، زپتیں زھیر ، لھڑیں تْرانگ اَنت ءُ بے کِساسیں درد اَنت۔۔۔۔۔۔۔
ھما درد کہ نبشتہ کنگ نہ بَہ اَنت ، بس مارگ بَہ اَنت۔ بُن گِپتگیں ارواھے کہ آئی ءِ چِیھانٹاں جَھانے سر ءَ زُرتگ ، بلے کَرّ اَنت اے دھر ءِ گُوش کہ لگتمالیں راج ءِ چیھالاں اِش کنگ ءَ نہ اَنت۔۔۔۔۔
ماھو!
نُوں بس اِنت نِندگ ءُ تماشا چارگ ، زُلم ءِ ھلاپ ءَ پادآھگی اِنت ءُ جُنزگی اِنت۔ اگاں بلوچ انگت وشوابی ءِ ملاراں بوت ، گُڑا پہ آئی ءَ زندگی یک کِسّھے ، داستانے ، ھَور ءُ سْیاہ گْوات ءِ سر ءَ ایریں ڈیوایے ، یک دنز ءُ گُبارے، یک رازے ، اُپّے ، آہ ءُ پریاتے ءُ بس یک تماشایے۔۔۔۔۔۔۔۔۔۔کہ ھر کس کَیت ءُ تماشا۔۔۔۔۔۔۔۔۔
