جنگ ءِ رُژن ءُ اھد ءِ زیمر زندگ ئے
بانڑی ءِ دزگْوھار ءُ راج رھبر زندگ ئے
جی بلوچ ءِ باجنیں شیر زال مئے
تو نہ بَہ ئے بیھال ھِچبر زندگ ئے
تئی تمردی ءُ توکل ءَ را سد سلام
سرمچنڈ ءُ ھیسی ئیں سر زندگ ئِے
رُودینتگ پُلّ ءُ گْواڑگ باز تو
سبز اِیت تئی جُھد ءِ سَمر زندگ ئِے
اے اَھد ءِ تئی کِسّہ پہ مانیت مُجّتی
نوک کُت ءَ تو راجدپتر زندگ ئے
چو ترا چون کُشنت جوریں لگور!
تو نہ مُرت ءِ پہ سِیم ءُ زر زندگ ئِے
داں گُلزمین ءِ دامُن ءَ زِندگ بلوچ
چو نہ روت بولان ءُ گوادر زندگ ئے
سرڈگار ءِ مھلبیں بانور منی
تو مُدامی دژمن ءَ پہ ھنجر زندگ ئِے
تنگوھیں براتانی سْرپ ءَ اُوشتوک اِت ئے
چیدگیں البُرز ءُ رھبر زندگ ئِے
جی پہ تئی کوھیں بلوچی زھرگ ءَ
آشوب ءِ سرکیلیں گوھر زندگ ئِے
نامےتو بکشات بلوچاناں گُلیں
بِلّے لھتیں کُور ءُ کَرّ ، زندگ ئے
تئی پِکر چو سیاھجی ءِ بُرزیں ھسار
بھ نہ بیت ایرموش پہ ڈنگر زندگ ئِے
تو کہ سر گْوپتگ پہ مِسکیں گُلزمین
بُندر ءُ ڈیھ ءِ منی مھپر ، زندگ ئِے
