درانڈیھی ءِ انگریں گیرانی گْرنچ ءِ بوجگ ءَ۔۔۔۔۔۔۔۔۔۔ند پہ نویسگ ءَ نستگ ءُ لبزانی جنگل ءَ آس کپتگ۔۔۔۔۔۔۔۔۔، بس دیدگاں کریمہ ءِ اکس ءُ سِنچ بکشیں پِگر ءُ لیکہ وت ءَ گْوپان ءُ ابدمانیں داستانے۔۔۔۔۔۔۔۔
ھمے داستان ءِ تاکدیماں تُمپ ءِ مچکدگ ءُ کیچ ءِ چِنال ءِ ھونکّیں ساھگ ءَ سیگی ءِ پتّرے تالان۔۔۔۔۔۔۔۔۔، بلکیں ڈیھ چاریں آتراپاں موتکانی چاھڑیں لِوار ءِ دیمپان ءُ تیاب ءِ شاگیں چَولاں لُڈّگ وئیل کُتگ۔ بُلبُلاں شینزارگ ءُ کپوتاں کُوکُوانی ریسّگ ءُ پرّیسّگ یلہ داتگ ءُ پہ مُونجائی کُدوھاں پانگ اَنت۔
ھمے ساھت ءَ بانُک ءِ گْوست چو چاردھی ماہ ءَ جلشک اِیت کہ آئی نودربرانی سیاست ءُ راجکاری ءِ باتِن ءَ راجی بودِشت ، زانت ءُ سما ءِ ارواہ مان گِپتگ ءُ کُنٹگ چکاریں راہ ءَ پند بُرّگ ءِ سِکین ءُ دِلبڈّی داتگ۔ ایردستی ءُ گُلامی ءِ ریزیں سانکلانی سِندگ ءِ توکل ءُ ھاٹیگ شکاستگ۔
مرچی اے ھبر راستے کہ بلوچ راج چہ یک شیرزالیں راجکارے ءَ زِبھر کنگ بوتگ ، بلے پِگرانی لد ءُ گْواش ءَ پہ مکسدے ءَ جُھد کنوک ءُ دیمونی دیوک پہ مُجّتی ابدمان بَہ اَنت۔ آیانی پِگر ءُ لیکہ ھر گام ءَ وتی بزّگ ءُ دِرتہ پُچّیں راج ءِ رھشُونی ءَ کنت ءُ تچکیں دگ ءَ ڈسّ اِیت۔
اگاں بانُک کریمہ مرچی جسمانی دْروشم ءَ چہ گِھیں بلوچ راج ءَ گِستا کنگ بوتگ راستے! بلے آئی ءِ پِگرانی مَھرّی دیم پہ مِنزل ءَ جمّاز کنان ءُ رھادگ اِنت دانکہ وتی سارت ءُ ھونکّیں بُنجل ءَ ، ءُ آجوئی بلوچ راج ءِ اولی ءُ گُڈّی ارمان اِنت ۔
پہ ھمے ارمان ءِ پیلو کنگ ءَ بانُک کریمہ ءَ چہ شھر ءُ بازاراں در دشت ءُ کُوچّگ ، ھلک ءُ میتگاں ، بلکیں ڈیھ ءِ چاریں آتراپانی گولگ ءُ راج ءِ سوھو ، شیوار ءُ سرپد کنگ ءَ پد ، پد ءَ پہ دُگنیا ءِ دلگوش گْور کنگ ءَ دیم پہ کینیڈا ءَ رپت دانکہ وتی بزّگ ءُ نیزگاریں ، ایردست ءُ گُلامیں راج ءِ توار جوڑ بِہ آں ءُ میان اُستمانی مھلوک ءَ اے سرپد بکن آں کہ شُما چہ دُور ءَ نِشتگ ءُ اِنساندوستی ءِ سَوت ءُ نازینک جَنَگ ءَ اِت، بلے ازگاریں ڈیھ ءِ ھُدابُندیں بلوچ راج وتی جِند ءِ گُلزمین ءِ دامُن ءَ نام گِپتیں ریاست پاکستان ءِ زُلم ءُ زُوراکیانی کُورُم ءَ کپتگ ءُ بِریان بُوَگ ءَ اِنت۔۔۔۔شُما انگت بے سما۔۔۔۔۔۔
بلے! مرچی ھما کینیڈا ٹورنٹو ءِ دمکاں نام کپتگیں رھشُون بانُک کریمہ بلوچ ءِ بے ارواھیں جون کہ دز کپ اِیت ، چو مھشر ءِ آسریچیں نِدارگ ءَ بھاریں موسم وت ءَ مٹ کنت ءُ تورشتیں گم ءُ رنجانی نپت ءُ بیر گْوار اِیت ، چی ءَ کہ یک نیمگے ڈیھ ءِ چاریں دمک ، کش ءُ گْوراں پاکستانی لشکر ءِ لشکر کشّی ءُ ماں کیلّکور ءَ جھازانی بمب گْواری ءَ پد شھید بوتگیں بلوچ پُسّگانی آس گِپتگیں جون، ءُ دومی نیمگ ءَ بانُک کریمہ ءِ تپتگیں جون۔۔۔۔۔۔۔کہ دِل پاھار کشّ اِیت ءُ دیدگ ھون ءِ ارس شل اَنت۔۔۔۔۔۔۔
ھمے ساھت ءَ وھدے میکؔ ءِ گْوشتن کہ دیم ءَ میلانک بیت ، زِرد ءَ ھاٹیگ رس اِیت ءُ توکل ءِ بالاد چو آھن ءَ مُھکم بیت۔ واجہ میک جاھے گْوش اِیت: کسے کہ نُکس ءُ تاوان برداش نہ کنت ، آ پائدگ ھم ھاسِل نہ کنت۔ اگاں کسے چہ سکّی ءُ سُوریاں نا آشنا اِنت ، آ اِیمنی ءُ وژدِلی ءِ چہ تام ءُ لِذّت ءَ زِبھر بیت۔
پمیشکا گْوش اَنت کہ وتی کِردار ءَ چینچو شیشاریں رنگے ءَ پلگارے ، پلگار! چی ءَ کہ مرگ اِنسان ءَ الم کُش اِیت۔۔۔۔بلے شیشاریں کِردار ءِ ھُدابُند پہ مُجّتی مان اِیت ءُ گوں زِرد ءِ دِریکگاں پیوند بیت، گُڑا دُژمِن پرے ھبر ءَ کدی چاپ ءُ نازینکاں مہ بیت کہ من بلوچ راج ءِ شیرزالیں جِنکّ بانُک کریمہ بلوچ چہ جُھد ءِ آجوئی ءِ پِڑ ءَ گِستا کُتگ ،
بلکیں آ پہ مُدامی جُھد ءِ آجوئی ءِ پِڑ ءَ ساڑی اِنت ءُ وتی راج ءَ ھمے درونت ءَ دَیَگ ءَ اِنت کہ آجوئی گوں دیمونیاں ھمگرنچ اِنت۔
پہ گُلامی ءِ سیاھیں روچانی شُودگ ءُ پلگارگ ءَ مارا دیمونی دَیَگی اِنت ۔ ھر ھما راج کہ مرچی وتی جِند ءِ سرڈگار ءَ زِندگی کنگ ءَ اِنت ، آیاں اے ھونانی کَور مانداتگ ءُ آدست بوتگ اَنت۔
راستے کہ اے ھوناں برے سیرکگیں مُرگاپ ءِ دِلبند چُک اِتگ، برے بولان ، بارکھان ، کاھان ، ڈیرہ بگٹی ، کوھستان ، چاگی ، نوشکی ، ءُ برے کولواہ ، آواران ءُ رکشان ، مزن بند ، سائجی ءُ دڑامب ، کیچ ءُ تگران ، باگیں زامُران ءُ گُل ءُ پُلیں کُلبر ءِ میتاپیں بالاد مینتگ!
بلے مرچی اے ھونانی ھوناکیں جمبر ءَ کینیڈا ٹورنٹو ءِ دمکاں ھار کُتگ ءُ لگور ءُ تولگیں دُژمِن ءِ پُروش پدّر کُتگ کہ دُژمِن باتِن ءَ چینچو کْواپگ ءُ پُرشتگ۔
ھمے داب ءَ اے ھبر اُوں راستے کہ وھد بلوچ راج ءَ را ھمے توار ءَ جَنَگ ءَ اِنت کہ چہ شِنگ ءُ شانگی ءَ در بیا اِت ءُ یکّیں پتّر ءَ یکمُشت ءُ تِپاک بِہ بَہ اِت ، اگاں نا تو ھمے رنگ ءَ ھر دمک ءَ تولگیں دُژمِن ءِ دام ءَ کپ ئے ءُ ارزانی ءَ شِکار بَہ ئے ۔ گُڑا پرچا پہ گورگیں بامسار ءُ راجی آکبت ءَ وت ءَ یکّیں پتّر ءَ یکمُشت نہ کن ئے ؟
ھزاراں زھرکنِکّی ءَ ابید ھم تئی مکسد ءُ مِنزل یک اِنت ، گُڑا تئی راجی ڈُبّہ ءُ پرز بیت کہ تو پہ ایردست ءُ گُلامیں راج ءِ پاسپانی ءَ چہ ھر ھما زھرکنِکّیاں سرگْوز کہ آ تئی راجی جُنز ءَ چو رمیز ءَ وارت۔
مرچی کریمہ بلوچ ءِ جون کہ ھما مُلک ءَ دز کپ اِیت ، آ مُلک وت ءَ اِنساندوستی ءُ اِنسانی اُکبالانی پانک جن ءُ بیرکدار گْوش اِیت، بلے پد ءَ ھم ھما دمکاں تئی ھون تالان اَنت ءُ ھِچ وڑیں گامگیج گِندگ نہ بیت کہ بَہ کَول ء بلوچانی ءَ مردُم ءَ اُوپارے بروت۔۔۔۔۔۔۔
پہ درور اُستاد آرِپ بارک زئی ، چہ سوئیڈن ءَ اِھوالکار ساجد ھُسین بلوچ ءُ اوگانستان ءَ درانڈیھیں بلوچ پُسّگانی دردناکیں کُشت ءُ کوش اِنسانی اُکبالانی لگتمال کنگ ءِ منّانک ءُ پاکستانی پوج ءُ چیریں ترامگیج ءُ ادارھانی کارپد اَنت ، بلے پہ یک نیمگی دُگنیا ءِ ھاموشی ءُ بُتی گیش بژینگ کنت۔ چرے بژنیگ بُوَگ ءَ پد مجگ ءَ ھمے جُست ایر کپ اِیت کہ گیدی ھر اِنساندوستاں کہ وت ءَ اِنسانی اُکبالانی پانک جنی ءِ شال مانپوشتگ ، اندر ءَ ھرکس وتی سیت ءُ نپّانی آس ءَ جمبور اِنت۔۔۔۔۔۔
بلے! اگاں کُجام راجاں پہ وت مُزاھِمت ءُ گھگیری ءِ راہ گچین کُتگ ، وھد ءُ زُوراک ستر تاکت ور بِہ بیت آئی ءَ پہ آجوئی ءِ دزگِرگ ءُ زِندگ بُوَگ ءَ ھِچّ کسے داشت نہ کنت ، ءُ مئے پجّار شھیدانی رِتکگیں ھون اَنت۔
مرچی ھمایانی رِتکگیں ھون ءُ داتگیں دیمونیانی مُز ءُ برکت اِنت کہ ما زِندگ اِیں ءُ پہ ابدمانیں زِندگی ءَ مُزاھِمت کنگ ءَ اِیں ، ءُ آجوئی ھمے کُربانیانی برورد اِنت کہ مارا دَیَگ کپ اَنت۔
ھمے وڑ ءَ بانُک کریمہ بلوچ ءِ داتگیں دیمونی ، کُنٹگ چکار ءُ تْراولیں پند بلوچ راجدپتر ءِ سرتاک ءَ نبشتگ بیت کہ شیرزالیں جِنکّ ءَ پہ ماتیں سرڈگار ءِ موکگ ءَ راجکاری ءِ پِڑ ءَ بازیں بیھار ءُ پادتراپ ، سکّی ءُ سُوری دیستگ ، بلے پدگرد نہ بوتگ ۔
بلکیں اے ھبر باور کنائینتگ کہ راجانی ھستمان ءِ ھُنڈال آپ ءِ بدل ءَ ھون وارت، زِندگیں راجانی راجدپتر سْیاھی ءِ بدل ءَ گوں زگریں ھوناں نویسگ بیت ۔ پمیشکا آئی ءَ گوں وتی ھوناں اے درونت پہ ما نوشتہ کُتگ کہ راجی ڈُبّہ کار ، جُھدکار ءُ راجی آجوئی ءِ جنگول پہ سِدک بِہ زان اَنت کہ پہ نِندگ ءُ مودگ ءَ مِنزل کدی آسر نہ بیت، بلکیں پہ مِنزل ءِ سر بُوَگ ءَ نِھنگیں درد ءُ اندوہ ، ایردستی ءُ گُلامی ءِ کُلیں کُچّل ءُ تھلی اِیربرگی اَنت ءُ دیم ءَ جُنزگی اِنت ۔
چی ءَ کہ تو اے اھد کُتگ گوں ماتیں گُلزمین ءَ من تئی ریزیں سانکلاں بوجان ءُ وتی پدمنتگیں بلوچ راج ءَ چہ تھارونکی ءَ کشّان ءُ رُوژنائی ءِ گْواش ءَ نوکیں زِندمانے شکساھاں ، گُڑا پرے ھاتِر ءَ دیمونی دَیَگ الم اِنت دانکہ اھد ءِ ودارانی نِشتگیں بانور پہ شادِہ ءُ سوری منگیراں بِہ بیت۔۔۔۔۔گُڑا مارا اے ھبر منّگ کپ اِیت کہ بانُک کریمہ بلوچ پہ ھما مکسد ءَ کہ شھید کنگ بوتگ ، آ مکسد راجی آکبت ءِ مانزمان اِنت۔۔۔۔
بَہ کَول ء زُلپکار زُلپی: کریمہ بلوچ ” تھاردیمگیں راھاں جَنَگ نہ بوتگ ” بلکیں آ ھما تھارونکی ءِ بگیر ءَ جنگ ءُ جُھد کنگ ءَ بوتگ ، مارا ءُ مئے آیوکیں پدریچ ءَ را چہ تھاری ءَ کشّگ ءُ دیم پہ رُوژنائی ءَ سر کنگ ءِ جنگ ءَ کولیگ بوتگ۔ آئرا گوں تھاری ءِ راھاں جتگیں مردُماں شُمار مکن اِت۔ آئی زانتگ! کُجام راہ کہ آئی ءَ گچین کُرتگ ، چہ اے راہ ءَ ابید نادْراھی ءَ مرگ الم اِنت۔۔۔بلے پد ءَ ھم آ گوں وتی زانت ءُ سما ءَ رھادگ بوتگ۔ آ تھاریں شپاں چو یک شپچراگے ءِ داب ءَ بوتگ۔
پمیشکا گْوش اَنت کہ دُگنیا ءُ اے کازماس ءِ گْرانمُلیں چیز مارِشت اِنت، ءُ مارِشت گیدی ءِ ھر ھمُک بندگ ءِ کِرّ ءَ نہ بیت۔ بلے مرچی بانُک کریمہ بلوچ پہ مُجّتی نمیران اِنت ، آئی ءَ را ھمے مارِشت ، راجی سِنچ ءُ بودناکی ءَ ابدمان کُتگ کہ منی راج گُلام ءُ ایردست اِنت پہ آئی ءِ آجوئی ءَ من ءَ چیزے کنگی اِنت ءُ وتی راجی ڈُبّہ ءُ زِمہ واری پیلو کنگی اِنت دانکہ باندا آیوکیں ءُ گُلیں پدریچ ءِ دیم ءَ میاریگ مہ بَہ آں۔
ءُ آ مرچی پہ ابد نمیران ءُ زِندگ اِنت ، چی ءَ کہ کُجام مارِشت ، مکسد ، پِگر ءُ لیکہ ءِ پُژدر ءَ کولیگ بوتگ۔۔۔۔آ مکسد راجی آجوئی اِنت ، ءُ راجی آجوئی ءِ ھاتِر ءَ دیمونی دَیَگ ھژدری اِنت۔
دُژمِن ستر گوں رِپک ءُ پندلاں دیم ءَ بئیت ءُ وتی تولگ ءُ روباهی کارپداں مارا بِہ ڈسّ اِیت، بلے جزماں پہ ناکامی چہ مئے ڈیھ ءُ بُندر ءَ واترّ اِیت۔۔۔۔۔۔چی ءَ کہ منی راج ءِ اندر ءَ دیمونی دَیَگ ءِ پلسپہ زِندگ اِنت۔ ءُ کُجام راجانی اندر ءَ کہ دیمونی دَیَگ ءِ پِگر ءُ پلسپہ زِندگ بوتگ ، آ مرچی ابدمان ءُ دُژمِن پہ دائِمی بے سوب۔
ھمے داب ءَ پاکستان ھم کدی پہ گل ءُ شاداں نہ بیت۔۔۔۔۔۔
بلے! کریمہ۔۔۔۔پہ مُجّتی بلوچ راج ءِ دِل ءِ دِریکگاں مان اِیت ءُ چو ھساری ٹُلّے ءَ چیدگ بیت۔۔۔۔۔۔
