ھانی منی دشتار نہ اِنت
ساجد ءَ وتی دہ ءِ چکاس سوبین کُت اے وھد ءَ وتی نوک ورنائی ءِ موجان اَت بائد و ھمیش ات کہ چو ھمُک ورنا ءَ پہ وت دشتارے شوھازے کُتیں کہ اے ھمُک انسان ءِ مستریں جلواناکتریں واھگے ءُ کُدرتی گواچِنے کہ اے اُمر ءَ ھمک ورنا ءِ واھگ ھمے نیمگ ءَ تَراَنت بلئے لہتیں اَنچیں کِرد دست کپ ایت کہ آ زندگی ءِ وشی آں سر گوز کن انت ۔ساجد ءِ پت دل ءِ نادُراھے ات دلے آپریشن بوتگ ات بسترانی سرا ءَ ات بلئے اے نادُراھیں پت ءَ ڈگار است ات ءُ برات ھم وتی ڈگاراں ءُ سیمسراں ٹیل ءِ کار ءُ مزدوری ءَ کنگ ءَ اتنت ءُ مات چہ کسانی ءَ زِک زِک مشین ءِ سرا گُد دوچی کنئگ ءَ ات ھرکس ءَ ماس ھاتون بی بی ءَ را گُشتگ ات ترا نوں ھچ گُد دوچی ءِ زلورت نہ انت تئ مرد کیلکور ءَ کیلگیں میراسانی واجہ انت اے سال ءِ گَلّہ ئی دان تاں دوھمی سال شُمارا ورگ ءَ بس انت تئ بچ ءَ ٹکٹرے گون وتی ڈگاراں کار کنت ءُ دگے بچے سیمسر ءَ کارءَ انت نوں اے گُد دوچی مشین ءَ یل دئے تئ پاد، چم، ءُسرینءِ سرا اسر کئیت نادُراہ بئے گُڈا ماس ھاتون بی بی ءَ گُشت یکے اے زِک زِک مشین یکے گوک ءُ پس گوں من ھچ یلہ نہ بنت منا منی اللہ ءِ شُگریں منی مرد ءِ کیلگانی دان ءُ پُگ بس انت منی بچ مھنتی انت بلئے منا ھُشکیں نندگ وش نہ بیت ۔من ساجد پُل ءِ سُوری گُد ھم تیار کُتگ انت ۔ھاتون بی بی ءَ بے مھنت ءَ وش نہ بوت بلئے من اجب ھئیران بوتاں کہ نوک ورنائیں ساجد ءَ وتی وانگ یلہ دات ءُ دگے مردُمے ءِ دان دُرشیں مشین ءَ پہ ماھے پنچ ھزار مزدوری بندات کُت گُڈا من ءُ منی مات ءُ پتاں ساجدی جند ءِ مات ءُ پتاں برات گُھاراں گوں ساجد ءَ گُشت ترا چے زلورت تو مزدوری بکن ئے تو وتی وانگ ءَ سرجم کن بلئے ساجد گپ نہ زُوریں ورنائے ات مارا پہ کندگ پسوئے دات من وانگ سرجم کُتگ ارددو، بلوچی انگریزی وانگ زاناں ۔دو سئے ماہ ءَ پد دان دُرشیں مشینے یلہ کُت شُت تُربت ءَ دُکانے ءَ ھمالی ءَ کار ءَ لَگ انت دگے دو سئے ماہ نہ گوست دُکان ءِ کارے یلہ دات ٹرکے ءِ کِلنڈر بوت نہ زاناں چینچو ماہ ٹرک ءِ سرا کارے کُت ھمے سال ءَ آواران، کولواہ ،مشکے ءِ بیمناکیں زمین جُمب بوت زمین جُمب ءِ سیمی روچ ءَ ساجد گامیشدر کیلکور ءَ اتک من چُناھا ھمُک سُھب شُتاں وتی ناکو ساجدی پِس ءِ چارگ ءَ گَڈا من شُتاں تاں ساجد ھم اتکگ منی مات پت ھم ھمدا انت ساجد ءِ گُھار ھم ما چُناھا اے ناکوزتک یکے دوھمی مات ءُ پتاں تُررُ ءُ ناکو توار نہ کن ایں ما ھردُکیناں مات ءُ پت توار کنیں گڈا اے روچ ءَ چوناھا ھرکس پہ زمین جُمب ءِ بابت ءَ گپ ءَ ات ساری ء روچ ءَ میتگ ءِ مردُماں ٹرکے چہ سامان ءَ پُر کُتگ ءُ راہ داتگ ات وتی کولواہ ءُ آوران زمین جمب ءَ تاوان باریں مردُمانی کُمّک ءَ ۔ساجد گوں ما گُشت من رواں منی سیٹھ ءِ بان کپتگاں کُڈّک بندگ ءَ انت مالار ءَ کُمّک لوٹیت لوگ ءِ دُرسیں مردُدماں گُشت ھو برو اے باز جوانیں کارے بلئے انوں مردُم سک تاوان بار بوتگ اَنت کُڈّک ءِ بندگ ءَ سیٹھ ءَ مزدوری مہ گر ۔ماس ءَ گُشت ساجد جان تئ تُمپ ءِ ناکو شاھ بیک چہ گَترءَ اتکگ ساری ءَ ھم فونے کُتگ ءُ زی پدا منا فونے کُتگ گُشتگے منی جنک ھانی ساجدی دشتار نوں رُستگ اے رند ءَ چُکاں سُور کن ایں منی موکل ھم باز انت شش ماھنت شُما تیاری بکن ات سلامتی،
آسمی پُل تئ سیٹھ ءِ کُڈّک تیار بوت انت گُڈا کِلنڈری مکن بیا تئ سور ءِ تیاری ما کُتگ ساجد ءَ کندگے جت ءُ گُشت اماں گُڈا من سیٹھ ءِ کُڑکاں سک زُوت تیار کناں گوں ھمے گپاں مات ءُ پت برات ءُ گھاراں ھوار شادِھانی کندگے جَت چمدا چہ دیوان پُرشت من، ساجد ءُ آئی گھار مئے لوگ ءِ نیمگ ءَ رھادگ بوتیں
مئے لوگ چو کمو دُوراَنت ساجد کندان ات ءُ جھلیں توارے ھمے سؤت ءَ جنان ات،،، ھانی منی دشتار نہ انت،، من ٹھکے دات گوں ساجد ءَ گُشت تو اے سؤت ءِ متلب ءَ پھمگ ءَ ئے پسوئے دات کہ انا من گُشت اے سؤت گُشگاانت ھانی منی دشتار نہ ئے، ھانی منی مات ءِ بدل، کنداِت ءُ گُشتے من ھمے شئیرانی ماناھاں نہ زاناں ھرچی گُشندہ گُشنت منا ھرچی یات بیت من گُشان اش کناں ۔پدا گُھار ءَ جُست کُت ساجد تو آنگو کدی روئے؟ گُشتے مرچی جلدی کن بِریں لوگ ءَ نانے تیار کن منی ھمراہ کئیت گاڈی ئے گونے ما گڈّگی ءِ کلّگ ءَ رویں کَرز بریں گون ماشُتیں لوگ ءَ کلاکے ءَ پد گاڈی اتک ما سُبارِگ کُت ساجد ءُ آ سنگت راہ کپت اَنت اگاں منا ھوش بکنت آ سنگت شہید سالم جان ات، ساجد شُت تاں سئے ماہ ءَ انگت نہ یتک فونے ھم نہ جت ماس ھاتون بی بی وداریگ ات کہ زوت بہ ئیت ما رویں تُمپ ءَ سُور جن ایں ساجدی ناکو ھُمک ھپتگ جُست کنت شُما چیا نیااِت، چارُمی ماہ ءَ ساجد اتک تاں پاکستانی اُنڈائے گونے وت ءُ میتگ ءِ دگے ھمسروئیں ورنائے ھمراھنت اشاں وھدءُ پاس نیست برے نیمروچ برے سرشپ برے گور بام تچ انت کہ تچ اَنت برے دو دو سئے سئے شپ ءَ گاراَنت ماس گُشیتے تو مرچاں چو لانگہ ءَ چَکرءِ تو کُجا روئے ءُ کائے،؟ بہ نند لوگ ءَ نوں رویں تئ سُور ءَ گُشیت شَریں بلئے نندگ ءِ نام ءَ نہ زانت ءُ میتگ ءِ رنگ ھم مٹّ بوھان اَنت بی این ایم والا بُنزھ جوڈ کنان انت بی ایس او آزات ھم ھنچو سرجمیں بالگتر کیلکور ءَ نوک نوکیں مردم زاھر بوھان انت ساجد ءُ ھما ورنا گوں تُپنگی آں گندگ بنت پدا شہید داکتر منان زاھر بیت ھلک پہ ھلک لوگ پہ لوگ پہ آجوئی جُنز ءَ درس دیان انت گُلامی ءُ آزاتی ءِ باروا مھلوک ءَ پوہ کنان انت دوسئے ماہ ءِ توک ءَ سری گڈّگی ءُ چیری گڈّگی آشوب ءِ بُنجاہ جوڈ بنت ءُ بی این ایم جلسہے ءِ جار ءَ جنت اے جلسہ ءِ تیاری ءَ کیلکور بالگتر ءِ ھچ گَّل ءِ باسک وتا چیر دات نہ کنت کہ پہ جلسہ ءِ تیاری ءَ مردمانی کِرّ ءَ روگ کپ ایت پہ جُنز ءُ جلسہ ءِ کُمک ءَ مھلوک ءِ ھوارگیجگ المی بیت اے جلسہ ءَ کیلکور بالگتر ءِ ھمک مردم وڈے نہ وڈے وتی کُمک ءَ کنت ھر پئیمیں مالی کُمک دنت ءُ ھرکس ھم دنت سری گڈگی گامیشدر ءُ چیری گڈگی جلسہ ءِ مرکز بنت ھُمک لوگ چہ جُھد کار ءَ پُر بیت ھمک لوگ ءِ مردم شپ ءُ روچ پہ مھمان نوازی دسگٹ بیت تاں دو سئے ماہ ءَ سری گڈّگی ءُ چیری گڈگی ءِ زھگ ءُ زالبولاں بگر تاں مردین آدم کس وتی زاتی کارے کُت نہ کنت کہ ھمک لوگ چہ مھمانیں جُھد کار ءَ پُر ءُ چکار بیت اشانی کنور شام ءُ سُبارگ تاں جان شودگ گُدشودگ ءِ بند ءُ بست کنئگ بیت ھمے جلسہ ءِ دوران ءَ ساجد وتی مات ءَ گَشیت ناکو ءَ بُگش تئ اے موکلاں من آروس کُرت نہ کناں ۔اے جلسہ 2013 ء ءِ گامیشدر سری گڈگی ءَ بیت ھژدہ 18 ھزار مھلوک بھر زوریت اے جلسہ ءَ دلمُرادبلوچ، شہید داکتر منان، چئیرمین ھلیل بلوچ ءَ چہ ابید دگے باز راھشون گُشتانک دنت ءُ لہتیں ماہ ءَ پد پدا دگے جلسہ ئے بی این ایف ءِ نیمگ ءَ چیری گڈگی ءَ بیت بانک کریم ءُ دگے رھشون گُشتانک دیئنت ھمے وڈ تاں 2015 ءَ کیلکور بالگتر آشوبی جُنز ءِ مرکز بنت 2015 ءَ پاکستانی لشکر بالگتر ءَ کئیت گُڈا ھر کس ھرکس بیت ۔ساجد ءِ ماس یکرندے کولواہ ءَ روت ساجد ءَ گندُک کنت ساجد وتی ماس ءَ گُشیت شما ءُ منی ناکو منی دشتارءَ اگاں کولواہ ءَ کاراِت گُڈا من آروس کناں اگاں نہ گٍُڈا نوں من باریں کُجا کُجا رواں من پہک ءَ بلوچ آجوئی جُنز ءِ ھمراھاں مات گُشیت آسُمی پُل تئی ناکو اے گپ ءَ سرپد نہ اِنت کہ تو سرمچارے ءِ ءُ من اے ھبر ءِ گُشت ھم نہ کناں چیاکہ آ اگاں وتی جنک ءَ ادا آورت مہ کنت منا چہ ھم سک مجبوراِنت بگندئے ھچ وڈیں راھے گیشینت مہ کنت منا پریشان کنئگ ءَ دل نہ بیت گُڈا من آئی ءَ رزا دیاں وتی جنک ءَ ھرکس ءَ دنت بِداَنت آ رُستگیں چُکے اگاں دگے جاھے تو شوھازاِت یا ما، گُڈا پدا ترا آروس دیئیں ساجد گُشیت ھو منی مات چِد ءُ شرتریں گپ نیست اے 2016 ء ءِ گپے ۔پدا یک ءُ دو رند ءَ جُھد ءِ سنگت آئی ءَ آروس دیئگ ءِ جُھد کن اَنت بلئے آ رازیگ نہ بیت آئی پت دل ءِ نادُراھی سوُب وپات بیت پت ءِ جنازہ ءَ ھم شُت نہ کنت.گڈا پند پہ پند سَپر پہ سَپر کار پہ کار جُنز پہ جُنز برے مشکے برے گچک برے پروم برے کُلبر برے ساھجی برے زامُران تاں 8 ھشت دسمبردوھزار بیست ءَ ماں زامُران زراگین ءِ کوھانی تہا آسمی پُل گوں عزیز جان ءُ مُکتار جان ءَ ناپاکیں لشکر ءِ پلیت ایں پدانی شودگ ءَ وتی ھوناں ریچنت ءُ جان اش گوں ھاک ءِ وشبو ءَ ھوار بنت ساجد ءِ شہیدی ءَ گوں من ھما روچ ءِ ترانگ ءَ کپتاں کہ من ءُ ساجد ءُ آئی گُھار منی لوگ ءَ روگ ءَ اَتیں وتی سُور ءِ گل ءَ ھمے سوت ءَ الھان کنئگ ءَ ات کہ ھانی منی دشتار نہ اِنت ۔
