نوبتانی کامریڈ
منی گُھاریں شارُلی
ماھلیں او ازِگلی
سَمّی ایں او پاتُلی
نازُلیں او زرگُلی
سلام اِنت تئی تمردی ءَ
نہ تُرسیءُ تئی دلیری ءَ
ماھویں او مَھرنگ مئے پڈولیں
دراج پندیں روانک بُرّے شھدگاں
اے گرم ءُ بیر بِرتکگیں آ چاھڑّاں
آ زمستان ءِ ٹنٹّیں نوبتانی کامریڈ
چو بانڑّی ءَ سرمتاب گوْنگیں
چو روزینہ ءُ پلستین ءِ لیلہ خالد ءَ
زمین ءِ درد ءُ گم زُرتگاں سر ءَ
زندمان ءِ شادھوں شمشُتگاں
ھیش ءُ نوشیں لِزتانی وھد پیتکگاں
واھشانی لھتے گرنچ سوتکگاں
پہ کئے ءَ؟؟؟
پہ بندیگیں پِس ءُ برات ءُ بیل ءُ ھمبلاں
پہ دُتکّیں کاڑ ءُ ماساں مکھیں
پہ شھیدانی ھوناں رِتکگیں
دَرکپتگے تو جنگجاھے ءَ
گنوکیں شائر ءِ دُوائیں ھر مُدام
سوبین بات ئے منزل ءَ مُرادانی
سوبین بات ئے منزل ءَ مُرادانی
