کپت جارے کہ جھدوں پہ سر شُت
کینگ ءِ کارچ کئی دل ءَ در شُت
شال پیسر سگار ءِ ارجان اَت
دَیناں بے سیتیں گنجیں گْوادر شُت
سید
گوادر ءَ بلوچ ءِ اے راجی مُچّی ءَ دژمن سرین پروش کُت ءُ آئی ءِ دیستگیں پلیتّیں واب ماٹو کُت اَنت۔ دژمن ءِ دْروگ ءُ پندل ءُ بُھتام آشکار بوت اَنت۔ آئی ءِ داشتگیں چریک، چلوپگ کار ،دزرود ءُ کاسگ چٹّاں سک باز جُھد کُت کہ اے راجی مُچّی ءَ بے سوب بہ کن اَنت بلے مئے بلوچ شیرزالانی، ورنایانی، کماشانی ءُ گْونڈیں زھگانی ھمّت ءِ دیم ءَ دژمن وت بے سوب بوت۔ دنیگا دژمن اے بے سوبی ءَ ایر بُرت نہ کنت۔ بلوچ ءِ اے پدریچ ءَ دژمن انچیں شمتے گوش بُناں جت کہ دژمن ءِ گوش بُن دنیگا سُھر سُھر اِنت۔ سید اے وڑیں جاوراں گْوش اِیت۔
راہ اگاں بستگ مئے کوہ ءُ تلار ءُ گْریشگاں
گوں وتی سرپنجگاں شیری رھے بُرّاں کنیں
چو گروک ءُ بیر ءُ نپت ءُ آس گواریں جمبر ءَ
دژمنانی زید ءِ میتاپیں لداں سوچاں کنیں
بلوچ راجی مُچّی ءَ اے گپ منّارینت کہ گوادر ءِ واھُند بکشو نہ اِنت۔ گْوادر ءِ واھند بلوچ اِنت۔ ءُ گوادر بلوچ ءِ جدّی میراس اِنت۔ گوادر پناھگیریں مھمد الی جنّاھ ءِ گْوادر نہ اِنت۔ گْوادر سرمتابیں ھمّل ء جیئند، سید ھاشمی، ناھُدا ھالو، میر ھسین اشرپ، ابدلمجید گْوادری، شھید مھبوب واڈیلا، شھید کامریڈ کیّوم، شھید اھمد داد ءُ دگہ بازیں راجپھاز ءُ زِرپھازانی گْوادر اِنت۔ سید دگہ جاھے گْوش اِیت کہ۔
وشنیاتکانی ردیں کاراں سروں رھن اِنت انگت
تاں نہ موکان ئِے میاری چوٹواں رنداں چتور
بکشو ءَ راجی مُچّی دارگ ءِ واست ءَ گْوادر ءِ سرجمیں راہ ءُ در بند کُت اَنت کہ بلوچ گوادر ءَ سر مہ بنت۔ راجی مُچّی بے سوب بہ بیت. بلے گوادر ءِ ابدی جھمننداں وت ءَ گْوادر ءَ سر کُت ءُ پیش داشت کہ گوادر ءِ روگ ءَ بلوچ ءَ ھچبر کس داشت نہ کنت۔ گُلزمین پہ وتی راجپھازاں راہ ءُ در پچ کنت ءُ وتی امبازاں زیر اِیت۔ گْوادر ءِ مھلوک ءَ گْوستانک یکبرے پد ءَ زندگ کُت۔ گْوادر ءِ میار جلّی، مھمان داری ءِ شان بالا کُت۔ من یک نبشتہ کارے ءِ بستار ءَ گْوادر ءِ مھلوک ءِ ھمنچو ستا ءَ بہ کناں کمّ اِنت۔ اینچو مھلوک ءِ ماں گْوادر ءَ دارگ ءُ آیانی ھزمت کنگ یک بلاھیں کارے۔ کہ اے کار گوادر ءِ مھلوک ءَ پہ دل ءِ ستک ءَ کُتگ ءُ پرے کار ءَ گوادر ءِ مھلوک ھزاراں شاباش کرز اِیت۔ گوادر ءِ مھلوک ءِ اے کارست الّم بلوچستان ءِ راجدپتر ءَ مان اِیت۔
گوادر ءِ کسان، مزن، کماش، ورنا، زالبول، اھوالکار، نبشتہ کار، شائر، کوّاس ءُ رھشوناں وتی وتی نکان دات اَنت۔ ءُ سربُلند بیت اَنت۔ راجدپتر ءِ بھرے جوڑ بیت اَنت۔ اے وڑیں جاوراں شھلچّہ کار مُلّا پازل گْوش اِیت،
وھدے کہ راج ٹکّر اَنت بیر ءُ ھون بیت
برات ھما اِنت کہ ستک ءِ دل برات ءَ گون بیت
لانک ءَ بند اِیت ءُ ھَمک کار ءَ شون بیت
چو نہ چار اِیت کہ دیمتر ءَ باریں چون بیت
چوناھا اے بلوچ ءِ اولی راجی مُچّی نہ اِنت۔ پیش ءَ ھم اے وڑیں راجی مُچّی بیتگ۔ چوش کہ دسمبر 1932 ءَ جیکب آباد ءَ راجی مُچّی یے بیتگ۔ دسمبر 1933 ءَ ھیدراباد ءَ راجی مُچّی یے بیتگ۔ بلے گوادر ءِ راجی مُچّی گیشتر سوب مند ءُ تواناتر بیتگ۔ پرچا کہ مرچی رسانکدر توانا اِنت۔ زانت ءُ پگر ءَ ھم مرچی گیشتر دیمروی کُتگ۔ مرچی اے شیرزالانی جُھدانی سبب اِنت کہ ماں میان استمانی جھان ءَ بلوچ ءِ توار سر بیتگ۔ بلوچ ءِ راجی مُچّی ءَ سرجمیں بلوچ راج ءَ گُلامی ءِ ھلاپ ءَ جُھد ءِ سکین داتگ.
مولانا روانبد گْوش اِیت کہ
جھ نہ جنت تاں کہ کاپلہ سالار
مَھری ماں راھان نہ بنت کتّار
شانک دنت پونڈے کہ جنوزامے
چو کہ یک بمبے ءَ بہ کنت کوکّار
مرچی رسانکدر ءِ سبب اِنت کہ جنوزامے ءِ شانک داتگیں پونڈے ءِ توار ماں میان استمانی جھان ءَ سر بیتگ۔ بلوچ راجی مچّی ءَ گوادر ءِ دنز ءُ مجاں اندیم بیتگیں گْوستانکی جاگہ گوناپ داتگ ءُ جڑکّینتگ اَنت۔ چوش کہ پُرتو، نھادیگ یا گلگ، باتیل ءِ کوہ، میدی ءِ کوہ، مُلّا پازل چار راہ، ساد ءِ کنڈگ، پاسار، کانجل، ٹُنگی ءِ کوہ، کونر ءِ کنڈگ، پراک، کسیپ کشی، لونجان کرد، ادّیرہ ءِ ٹکانہ، سالونک ءُ بانور ءِ دیمدار، چارپادگو، گوادر ءِ شاھی بازار، کمٹّی، پٹوک ءُ دگہ بازیں کْوھنیں جاہ دُبر نوک بیت اَنت۔
گُڈسر ءَ من گوں بلوچ راج ءَ دزبندی کناں کہ اے جُنز ءِ بزاں بلوچ یکجھتی کمیٹی ءِ پلیٹ پارم ءَ مھکم بہ کن اَنت ءُ آئی ءِ ھمراہ بہ بنت۔ اے یک پارٹی یے یا کہ گروپے نہ اِنت۔ اے سرجمیں راج ءِ دردانی جھگیر اِنت۔ گْوستگیں دلرنجی ءُ آزاریاں بہ شموش اِت BYC ءَ مھکم بہ کن اِت۔ BYC ھرچ ھما بلوچ ءِ جھگیر اِنت کہ وت ءَ بلوچ گْوش اِیت ءُ بلوچستان ءِ درد ءَ مار اِیت۔ اگاں کسے BYC ءِ پلّامرزی ءَ گپّے نہ کنت تُرس ءَ بے توار اِنت ءُ نشتگ۔ دژمن ءِ ھمراہ نہ اِنت بزاں کہ آ بلوچ ءِ دوزواہ اِنت۔
چہ BYC ءِ رھشوناں منی دزبندی ھمیش اِنت کہ راج ءِ ھرچ مردم ءَ وتی ھمراہ کن اِت۔راج ءِ ھرچ مردم ءَ سر ءُ سوج کن اِت۔ راج ءِ ھچ مردم ءَ چہ وت ءَ ءُ چہ وتی کرداں دلگران مہ کن اِت۔ وتی راج ءَ وتی ھمراہ کن اِت۔سر ءُ سوج ئِے بہ کن اِت۔ بلے الّم گوں وت ءَ ھوار ئِے کن اِت۔ کہ اے راج ءِ گُڈّی امیت شما اِت۔
(من وتی سنگت سدّیک رمزان ءِ منّتواراں کہ من ءَ اے کْوھنیں جاگھانی ناماں کُمک ئِے کُتگ)
تپاکی آجوئی ءِ مانزمان اِنت
بلوچستان آجو بات
٭٭٭
