بین الاقوامی مالیاتی فنڈ آئی ایم ایف نے کہا ہے کہ پاکستانی معیشت کو اب بھی شدید نوعیت کے خطرات لاحق ہیں۔
اپنی ایک اسٹاف رپورٹ میں بین الاقوامی مالیاتی فنڈ نے جمعے کے روز کہا کہ ابھی پاکستانی معیشت میں تنزلی کے خطرات بدستور انتہائی بلند ہیں۔
یہ رپورٹ آئی ایم ایف کے وفد کی پاکستان کے ساتھ ایک نئے قرضے سے متعلق بات چیت سے قبل سامنے آئی ہے۔ رواں ماہ آئی ایم ایف کا ایک وفد اس بات چیت کے لیے پاکستان جا رہا ہے۔
آئی ایم ایف کے وفد کا یہ دورہ پاکستانی حکومت کی جانب سے نئے سالانہ بجٹ کی تیاری کا عمل شروع کرنے سے قبل ہو رہا ہے۔ اسٹینڈ بائی ارینجمنٹ کے حوالے سے دوسری اور حتمی نظرثانی رپورٹ میں کہا گیا ہے کہ پاکستان میں سیاسی عدم استحکام بدستور موجود ہے، جس کی وجہ سے معیشت سنگین خطرات کا شکار ہے۔
اس رپورٹ کے مطابق سیاسی پیچیدگیاں اور مہنگائی کی بلند سطح پالیسیوں پر اثر انداز ہو سکتی ہیں، جب کہ بیرونی سرمایہ کاری میں کمی استحکام کی جانب بڑھنے کے راستے کو محدود اور ملکی کرنسی پر اضافی بوجھ جیسے معاملات کا پیشہ خیمہ بن سکتی ہے۔
اس رپورٹ میں مزید کہا گیا ہے کہ اشیائے صرف کی قیمتوں میں اضافہ اور عالمی مالیاتی حالات میں سختی کے علاوہ بین الاقوامی شپنگ میں رخنوں نے بھی پہلے سے مالیاتی مسائل کے شکار اس ملک کی معیشت پر اضافی بوجھ ڈالا ہے۔
پاکستان نے گزشتہ ماہ ہی تین بلین ڈالر کے ایک قلیل المدتی پروگرام کو مکمل کیا ہے۔ اس پروگرام کے تحت پاکستان دیوالیہ پن سے بچ گیا تھا مگر شہباز شریف حکومت نے زور دیا ہے کہ پاکستان کو ایک نئے اور طویل المدتی قرضے کی ضرورت ہے۔
واضح رہے کہ گزشتہ برس موسم گرما میں پاکستان دیوالیہ پن سے بال بال بچا تھا۔ آئی ایم ایف کے قرضے کے ذریعے تین سو پچاس بلین ڈالر حجم والی معیشت کے حامل پاکستان کی معیشت قدرے مستحکم دیکھی گئی ہے، جہاں گزشتہ برس مئی میں مہنگائی کی سطح 38 فیصد تھی جو اب گر کر 17 فیصد پر پہنچ چکی ہے۔ پاکستان نے درآمدات کے حوالے سے سخت اقدامات کے ذریعے خارجی اکاؤنٹ خسارے کو کسی طرح کم کیا ہے، تاہم اس سے ملکی شرح نمو جمود کا شکار ہے۔ گزشتہ برس یہ منفی میں تھی جب کہ اس برس یہی شرح نمو دو فیصد رہنے کا امکان ہے۔
پاکستان ممکنہ طور پر کم از کم چھ بلین ڈالر کے پیکج کے حصول کی کوشش میں ہے جب کہ آئی ایم ایف کے ریزیلیئنس اینڈ سٹیبیلیٹی ٹرسٹ سے بھی پاکستان اضافی سرمائے کی درخواست کر رہا ہے۔
