ملاریں شپ ءَ ماھِکانی ءِ سرکیلیں تاس تِنگ اِتگ اَت ءُ ھمُک پاند ءَ تھاری ءَ وتی پدیانک جتگ اِت اَنت۔ بنی آدم ءُ سُرندگانی بْرمش ءُ چِڑکّہ سْرپتگ اَت ءُ بیمّ ءِ کوھے رُستگ اَت، ھرکس ءَ چہ لدیگ ءُ ھپتارانی تُرس ءَ وتی کُڈُک شبند کُتگ اَت ءُ چمّ پہ اِیمنیں وابے ءَ چیرگیج کُتگ اِت اَنت، بلے وائے پہ ساھار ءِ شِنگ اِتگیں شار ءَ کہ ھرکس ماں پتاتگ اِت ئے، پمشکا سرجمیں دوار چو کبرِستانے ءَ سھرا بوت ءُ سک بیمّناک اَت۔۔۔۔۔
وھد مدان مدان ءَ دیم ءَ کِنزان اَت کہ چہ کبرِستان ءَ توارے جکس اِت ءُ تیوگیں مُردگ چہ وتی کبراں جھ سِرّ اِت ءُ پاد آیان بوتاں، بلے ھر یکّے ءَ وتی گُوش رُپتگ اِتاں کہ اے توار چہ کُجام پاند ءَ پیداک اِنت۔۔۔۔۔۔۔۔۔
ھرکس ءَ کہ وتی دلگوش گْور کُت ءُ چمّانی تیرکمان کار بست، تہ لاگریں ورنایے سھرا بوت کہ سئے ءُ چار کس ءِ ھمراھی ءَ ڈیکی یے ءِ سر ءَ اُوشتاتگ ءُ گُشتانک دَیَگ ءُ گْوشگ ءَ ات کہ مارا وتی گُنگی ءُ شبندیں کُڈُک ءِ در بوجگی اِنت، اگاں نا اے لدیگ ءُ ھپتاراں بِل، اے شپ ءِ تھاری ءِ بیمّ مارا پلِکّ اِیت ءُ مئے زیبائیں دوار پہ ما مُدیمی ئیں کبرِستانے جوڑ بیت۔۔۔۔۔۔
گوں لاگریں ورناہ ءِ اے دانکاں ھور ھمُک نیمگ ءَ ٹھکّانی توارے رُست ءُ ھرکس ھمے گْوشگ اَت کہ اے گنوک اِنت، وت پہ راستی گنوک اِنت بلے وتی ھمراھی ءَ دِگہ سئے ءُ چار ھم گنوکے کُتگ گوں ھاھاھاھاھاھاھا۔۔۔۔۔۔۔۔۔۔
بلے! لاگریں ورناہ ءَ دست شانت ءُ پد ءَ چِڑکّہ کُت ءُ گْوشت: بِل کہ مرچی اے من ءَ گوں شُمئے ھواری ءَ گنوک گْوشگ ءَ اَنت، چی ءَ کہ اِیشانی دِل ءُ مجگاں لدیگ ءُ ھپتارانی ساھار ءَ وتی میھ جتگ اَنت، پمشکا اِیشاناں کبرِستانیں دوار ءُ شبندیں کُڈُک دوست بَہ اَنت، بلے مارا گوں وتی زیبائیں ڈگار ءَ اھد کنگی اِنت کہ ما اے کبرِستانیں نوبت ءَ گوں وتی ھوناں سمبرینیں ءُ ھمُک دگ ءُ رھسراں وشبوئیں پُلّ کِشّ اِیں کہ آیانی وشبوئی مئے ھستمان ءِ گواھی ءَ دنت دانکہ آیوکیں پدریچ سربتگی ءِ بدل ءَ مادنیں دگ ءَ رھادگ بِہ بیت ءُ وت ءَ وتی ھونکّیں مِنزل ءَ سر بِہ کنت۔۔۔۔۔۔۔۔
ھمے وڑ ءَ وھد گوں وتی تْرندیں رواجاں جُنزان اَت کہ لاگریں ورناہ گوں وتی لھتیں ھمبلانی ھمراھی ءَ گِرگ ءُ زِندانی کنگ بوت، وھدے گوں مُردگیں جون ( چہ زِند ءِ کٹّ ءَ بُرتگ اَت ) ءَ یلہ کنگ بوت، گُڑا رستراں شادمانی کُت کہ ما اِیشی ءَ را چو نہ کُتگ کہ آ کبرِستانیں دوار ءِ سمبھینگ ءَ در بَہ کپ اِیت ءُ مارا بیھار بِہ دنت، چی ءَ کہ اے کبرِستانیں دوار ءَ ابید ء مئے ساھار ءَ دِگہ کس پہ کلّھے گِندگ نہ بیت۔۔۔۔۔۔۔۔۔۔۔
بلے! اے رسترانی گُروناکی اَت کہ آیاں وتی زُور ءُ واک ءِ دیم ءَ کس بَئے نہ کُت، چوش کہ ھما آس لاگریں ورناہ ءِ باتِن ءَ جمبور اَت۔۔۔۔۔۔۔۔۔پہ آئی ءِ تُوسگ ءَ رسترانی آھِنیں دِیوال ءُ پُوپل ءِ سانکل آپ بوت اَنت ءُ بْرمش ءِ پُٹّواں تانسریں آزمان سھاتگ کُتگ اَت۔۔۔۔۔۔۔۔۔
چہ لاگریں ورناہ ءِ زِندان ءِ درکپگ ءَ پد۔۔۔۔۔، کبرِستانیں دوار ءَ لدیگ ءُ ھپتارانی بیمّ ماں آکوٹے ءَ کپتگ اَت ءُ زْرمبشتے ءِ گامانی پادبرمشاں شبندیں کُڈُکانی در بُتکگ اَت۔۔۔۔۔۔۔۔، شپ ءِ تھاری ءِ رنگ ھوادگ ھوادگ اَت۔ ھمیشاں کہ زِی ٹھک داتگ ءُ کند اِتگ اَت، چہ وتی پَژمُردگیں بالاد ءَ پشل پشل ءُ سر اِش چہ ملامتی ءَ جھل اَت۔ لسّ مھلوک ءِ کچاریاں یکرّ ءُ چو تولگ ءَ سْراپ اِش کُت۔۔۔۔۔۔۔۔۔۔۔
ناگت ءَ بے بْرمش ءُ چِڑکّہ توارے جکس اِت کہ لاگریں ورناہ گوں وتی ھمبلاں دیم پہ کوہ ءَ رپتگ ءُ سنگر اِنت۔۔۔۔۔۔۔۔۔۔۔۔، گُڑا اے ھبر چو وشبو ءَ گْوات ءِ چنکّاں بوت ءُ ھر ھمُک بالاد ءِ باتِن ءَ زیبائیں وابے پہ مانا کنگ ءُ کبرِستانیں دوار ءِ سمبھینگ ءَ تیجار بوت۔۔۔۔۔۔۔۔۔۔۔
چہ اے توار ءِ جکسگ ءَ پد روچ ء مرچی لدیگ ءُ ھپتارانی واب پْرشتگ ءُ آھِنیں نپت گْوارگ ءَ اَنت۔۔۔۔۔۔۔۔۔۔۔۔۔۔۔۔۔، بلے اے توار ءَ تانسریں گیدی جکسّینتگ ءُ لاگریں ورناہ انگت رھادگ اِنت۔۔۔۔۔۔۔۔۔۔۔۔
