بیگاہ ءِ ھبیریں کَوش ءَ سرکشّ کُتگ اَت ءُ تُنّ پہ سارتیں آپے ءِ نِیمون ءَ گونجَنگ ءَ اَت کہ مھناز ءَ گْوانکو دست ءَ، ءُ چِڑکّھے کُت، ابّا ابّا ترا وشیں ھالے دیاں تو مِستاگی ءَ چے دئے۔۔۔۔۔۔؟
اول من اجکّا بوت آں، بلے پد ءَ پہ کندگ گْوشت مھنو جان تو چے کہ لوٹ ئے، پہ تو ساہ ءُ سر کولیگ۔۔۔۔۔۔۔۔۔۔۔۔۔
چاراں چہ مھناز ءِ کندگاں جلشکے بُتک ءُ گْوشگ ءَ لگ اِت، بچار ابّا بلوچ پہ زُبان۔۔۔۔۔۔۔۔۔۔۔۔، من کہ مھناز ءِ اے ھبر اِش کُت، پہ ڈکّ اِتگیں ھبر ءِ اِشکنگ ءَ گیش ھُدوکی بوت آں ءُ باتِن ءَ مارِشت ءِ تاس سنگران اَت کہ چہ زُبان ءَ در اتک، مھنو! تو زان ءَ وتی پِت ءِ ھبر ءَ باور نہ کن ئے۔۔۔۔۔۔۔؟
وھدے کہ مھناز ءَ منی اے ھبر اِش کُت، کندگ ءُ ٹھکانی توار ءَ آزمان جُمبینت ءُ زمین جکس اِت۔ کندگ کندگ ءِ تہ ءَ مھناز ءَ درّائینت ءُ گْوشت: ابّا من ءَ تئی گپّانی سر ءَ باور اِنت، بلے من چہ ترا یک انچیں لوٹے کن آں کہ تو باندا چہ گپّ ءِ جَنَگ ءَ پشومان مہ بَہ ئے ءُ زُبان ءَ مہ ور ئے ھاھاھا۔۔۔۔۔۔۔۔۔
وھدے من مھناز ءِ اے تب ءُ میل دیست، دِل ءَ جیڑ اِت ءُ سک بش بش ورگ لگ اِت آں، بِہ گِندئے مھناز من ءَ توازہ کنگ ءَ اِنت، بلے پد ءَ جیڑ اِت کہ مھنو گوں من ءَ کدی چو اے رنگ ءَ نہ کُتگ، اِد ءَ گپّے الم ھست۔۔۔۔۔۔۔۔۔۔۔۔۔۔
پمشکا من شاکارگے جت ءُ گْوشت: مھناز تو وتی گپّ ءَ بجن ءُ مِستاگی ءَ بِہ گِر، من اگاں ترا مِستاگی ندات تو رند بِہ گْوش کہ من وتی زُبان وارتگ، پیسر ءَ پرچا من ءَ چو اجکّا ءُ دلوارگ کُتگ۔۔۔۔۔۔۔۔۔۔۔
مھناز ءَ پہ لھمیں بچکندگے گْوشت: ابّا من ترا اجکّا ءُ دلوارگ کنگ نہ لوٹاں، بلکیں وتی مِستاگی ءِ گپّ ءَ جَنَگ ءَ آں، من اگاں ترا اے وشیں ھال ءَ دیاں، وتی تب ءِ مِستاگی یے لوٹ آں، بلکیں تو بِہ گْوش ئے کہ من ترا مِستاگی ءَ جارجٹ ءُ ویل ءِ گُشانے گِران ءُ دیاں، اِنّا، جُپتے سینڈل ءُ شوکیں گڑیالے گِراں دیاں اِنّا، چی ءَ کہ اے منی مِستاگی ءِ توجیل نہ اَنت ھاھاھاھاھاھا۔۔۔۔۔۔۔۔۔
مھناز ءِ اے ھبرانی اِشکنگ ءَ گوں من ءَ انچو سما بوت کہ مھنو نوں پھک گنوک اِنت، بلے پرچا۔۔۔۔۔۔۔۔۔؟
وھدے اے جُست کہ منی باتِن ءَ سرکشّان بوت، گُڑا سبر ءِ دامُن شِکّان ءُ گیش گوشدارگ ءِ ھاٹیگ آپ بُوھان اَت کہ من پہ زھرناکی درّائینت ءُ گْوشت: مھناز تو ھبر ءَ بِہ کن، من ترا مِستاگی ءَ وتی ارواہ ءَ داد دیاں، دِگہ ترا چے لوٹ اِیت۔۔۔۔۔۔۔۔۔۔۔۔۔
مھناز کندگے جت ءُ گْوشت: ابّا تو پہ بچکندگے بِہ گْوش، بلکیں پہ زھرناکی من ءَ تئی داتگیں مِستاگی ھِچّ رنگ ءَ پکار نہ اِنت۔ من کہ مھناز ءِ گال ءُ گُپتار، ھوشامی ئیں چمّانی تہ ءَ مھروانی ءِ زِر چَول جَنَگ ءَ دیست، تہ سبر ءَ موہ ندات ءُ من مھنو بگلگیر کُت ءُ دست سر ءَ سماران ءَ گْوشت: بِہ لوٹ مھنو! تو چے کہ مِستاگی ءَ لوٹ ئے ترا دیاں، بس وتی وشیں ھبر ءَ بِہ گْوش۔۔۔۔۔۔۔۔۔۔
چاراں ارسی تْرمپے مھنو ءِ انارکاں جھلاد ءُ چہ لُنٹانی سْرپتگیں بچکند ءَ ھبیریں کِسّھے تالان۔۔۔۔۔۔۔۔۔۔، بلے پہ لُنٹانی سُرینگ ءَ مھتل، پمشکا منی ھاٹیگ ءَ جواب دات ءُ من بے توار بوت آں۔ ساھتے ءِ پِرگْوزگ ءَ پد مھناز ءَ چمّ منی چمّانی تہ ءَ سک دات اَنت ءُ گْوشگ ءَ لگ اِت،
ابّا وشیں ھبر چو اے وڑ ءَ اِنت کہ مرچی شاری ( پنّام بْرمش ) بلوچ ءَ کراچی ءَ پِدائی اُرشے کُتگ ءُ مارا دیمونی دَیَگ ءِ واناکیں درونتے شکساتگ،
بس! مارا ھمے دگ ءَ سرگِرگی اِنت۔۔۔۔۔۔۔۔۔۔۔۔
من چہ مھناز ءِ زُبان ءَ اے ھبر اِش کُت، دِل ءَ پھم اِت کہ مھناز من ءَ مِستاگی ءَ چے لوٹ اِیت۔۔۔۔۔۔۔۔۔۔۔۔، بلے من کزدن چہ مھناز ءَ پول کُت ءُ گْوشت: ھاں مھنو! تو اے وشیں ھبر من ءَ ھال دات، نُوں بِہ گْوش کہ مِستاگی ءَ چے لوٹ ئے۔۔۔۔۔۔۔۔۔۔۔۔۔۔؟
چاراں مھناز ءِ کندگاں پد ءَ چو جلشکے ءَ بُتک ءُ گْوشگ ءَ لگ اِت، ابّا من ترا چہ مِستاگی ءَ بس ھمے لوٹ آں کہ تو من ءَ چو شاری ءَ موکل بِہ دئے دانکہ من ھم راجدپتر ءِ تاکدیماں چو دْرپشوکیں اِستالے ءَ پہ مُدیمی جڑکگ ءَ بِہ بَہ آں۔ کُجام راھی کہ اے دمک ءَ پہ رَوَگ اُومان کنت، گُڑا من ھم آئی چمّانی دیم ءَ چو شاری ءَ سھرا بِہ بَہ آں۔۔۔۔۔۔۔۔۔۔۔
من وھدے مھناز ءِ اے ھبر اش کُت، مئے مْیان ءَ کسانیں بے تواری یے رُست ءُ منی چمّاں مھناز شاری ءِ چھرگ، رنگ ءُ دْروشم ءَ جَنَگ ءَ اَت، بلے راستی انگت چہ کنڈگ ءَ آ دیم اَت۔
چہ اے کسانیں بے تواری ءَ پد من وت ءَ گیگ ءُ گوم کُت ءُ گْوشت: مھنو کولیگاں من ترا تئی مِستاگی ءَ دیاں، بلے تو دنیگا اُمر ءَ کسان ءُ آ جاہ ءَ سر نہ ئے کہ شاران ءِ داب ءَ پہ ھزار مُرادیں ڈیھ ءَ کولیگی بِہ بَہ ئے، تو کہ چو شاران ءَ مزن بَہ ئے، گُڑا چہ من ءَ موکل مہ گِر کہ من کُجام دیمونی ءِ دَیَگ ءَ جاڑی آں، بلکیں اَمَل بِہ کن ءُ پیش بدار کہ من ھم شاری آں۔۔۔۔۔۔۔۔
مھناز پہ بچکند پسّو دات ءُ گْوشت: ابّا! پہ ڈیھ ءَ کولیگی ءُ دیمونی ءِ لوٹ اُمر ءِ رِد ءَ مزن ءُ کسان نہ چار اِیت، بلکیں بودِشت ءُ بودناکی ءَ چار اِیت، چی ءَ کہ بے بودِشتیں مردُم ابید ء جِند ءَ دِگہ تک ءُ پھنات ءَ نہ جیڑ اِیت، شاری ءَ اے کار پہ مزن اُمری نہ کُتگ کہ منی اُمر سی سال اِنت، بلکیں آئی ءِ پِگر رُستگ ءُ مزن بوتگ کہ آئی اے دیمونی دَیَگ ءِ دگ پہ وت گچین کُت ءُ مارا شون دات کہ زِند ءِ ابدمانیں مانا، مُول ءُ مُراد، شیشاریں مکسد چی اِنت۔۔۔۔۔۔۔۔۔۔۔۔۔
بلکیں پہ ایردستیں راج ءُ گُلامیں سرڈگار ءِ موکگ ءَ اُمر انچوکیں بِستارے نہ دار اِیت، چی ءَ کہ جھانی راجدپتر چہ اے دابیں داستاناں سرّیچ اِنت کہ اُمر نہ، مُھکمیں دِیدانک ءُ آھِنیں توکلے لوٹ اِیت، اگاں نا اے اُمر اُمر ءِ چاچ ءِ جَنَگ ءَ زِندگی مارا انچو پِلِکّ اِیت، سما نہ کپ اِیت۔۔۔۔۔۔۔بلکیں من ءَ اے زانت ءُ زانگ ھست کہ من ءُ راج، منی ماتیں گُلزمین گُلام اِنت، گُڑا پرچا من اُمر ءِ چاچ ءَ بجن آں۔۔۔۔۔۔۔۔۔؟؟
مھناز ءِ کسانیں بالاد ءُ شھپگریں دانکانی اِشکنگ ءَ پد شاری ءِ مھروان ءُ پُربچکندیں دْروشم وت ءَ منی چمّانی دیم ءَ سھرا کنگ ءَ اَت کہ دیمونی دَیَگ ءِ لوٹ اُمر، کسان ءُ مزن، چوشیں زانت ءُ زانگے نہ لوٹ اِیت کہ آ زانت ءِ چکّاس ءَ تو ایم پِل ( ایم فل ) ءُ پی ایچ ڈی ءِ ڈگری ءُ سند نہ گِپتگ، بلکیں پہ وتواجھی ءُ راج مستِری ءِ جنگ ءَ گُلامی ءِ مارِشت دُگنیا ءِ مستریں ڈگری ءُ سند اِنت، اگاں تو چہ کالج ءُ یونیورسٹی ءَ زانت ءُ زانگ دربُرتگ بلے گُلامی ءِ مارِشت کہ نسیت، گُڑا ھِچّ پہ ھِچّ۔۔۔۔۔۔۔۔۔۔۔۔
پمشکا! مھناز ءَ اے مِستاگی دَیَگ پمّن سک گْرانیں گامگیجے اَت، بلے مھناز ءِ جھ جتگیں واھگ ءُ ارمان ءِ دیم ءَ منی چے مجال کہ من میلانک بِہ بَہ آں، چی ءَ کہ مھناز ءِ دانکانی دیم ءَ منی زانت ءُ زانگ ءِ کانیگ ھُش اِتگ اَت، پرے ھاتِر ءَ من وتی تلکاریں لُنٹانی سر ءَ پُرشتگیں بچکندے مُشت ءُ گْوشت: مھنو! ترا چہ پیریں پِت ءِ نیمگ ءَ اے مِستاگی مُراد بات، شالا تو چو شاری ءَ بلوچ راجدپتر ءِ تاکاں نامے نوک کن ئے۔۔۔۔۔۔۔۔۔۔۔۔
مھناز ءَ کہ منی اے ھبر اِشکُت، کندگانی مھر ءِ پیاپیں اِستین ءَ گْوارگ بِندات کُت ءُ گْوشگ ءَ لگ اِت، ابّا! تو منی زِرد ءِ لکّی ئیں ارمان پیلو کُت، نُوں آ منی کار اِنت کہ من اے ارمان ءِ رجگ ءُ گوناپ دَیَگ ءَ وت ءَ چینچو سوبین کن آں، دانکہ شاری ءِ نام ءِ کش ءَ تئی ھُردُکیں مھنو ءِ نام نبیسّگ بِہ بیت۔۔۔۔۔۔ھاھاھاھاھاھاھا۔۔۔۔۔۔۔
گوں مھناز ءِ اے پیاپیں بچکنداں چہ دِل ءَ سارتیں آسردے درکپت ءُ شاری ءِ بانوریں بالاد پہ وتن جڑکّگ ءَ اِت۔۔۔۔۔۔۔۔۔۔، داں من سما کُت منی ھر نیمگ ءَ ابید ء شاری ءِ گْوانگ ءَ دِگہ ھِچّ سھرا نہ اَت۔۔۔۔۔۔۔۔۔۔۔۔۔
***
