پاکستان تحریک انصاف (پی ٹی آئی) کے رہنما اور سابق وفاقی وزیر اطلاعات فواد چوہدری نے کہا ہے کہ اگر باہر کے کسی ملک نے گھڑی تحفے میں دی اور وہ سابق وزیراعظم نے حکومت سے خرید کر باہر جاکر فروخت کردی تو اس میں کیا جرم ہوا؟
نجی ٹی وی چینل ’جیو نیوز‘ سے بات کرتے ہوئے انہوں نے کہا کہ ابھی تک مجھے پتا نہیں ہے کہ شہباز شریف کیا کہہ رہے ہیں، اگر وہ یہ کہہ رہے ہیں کہ باہر کے کسی ملک نے گھڑی تحفے میں دی اور وہ سابق وزیراعظم نے حکومت سے خرید کر باہر جاکر بیچ دی تو اس میں کیا جرم ہوا؟
سابق وزیر اطلاعات کا کہنا تھا کہ مجھے ابھی تک سمجھ نہیں آیا کہ ان کا اعتراض کیا ہے، گھڑی 8، 9 کروڑ کی ہو، 5 کروڑ کی ہو یا 10کروڑ کی، اگر میری ہے اور میں نے بیچ دی تو اس پر کوئی اعتراض نہیں بنتا۔
انہوں نے کہا کہ میرے خیال میں شہباز شریف بہت کنفیوژڈ ہیں، ان کو سمجھ نہیں آ رہا کہ عمران خان پر کیسے الزامات لگائیں، کبھی وہ کوئی اور کریکٹر ڈھونڈ کر لے آتے ہیں کبھی گھڑی لے آتے ہیں۔
ان کا کہنا تھا کہ جتنا یہ عمران خان پر کیچڑ اچھالنے کی کوشش کر رہے ہیں اتنے ہی یہ خود گندے ہو رہے ہیں، شہباز شریف سطحی گفتگو سے پرہیز کریں اور ملکی مسائل پر توجہ دیں۔
