لچھکار ۔۔۔۔۔۔۔ شے مرید شاد
تو پد ءَ واتر بہ بو
بیا ماں جند ءِ میتگ ءَ
شھر ابیتک اِنت بے ترا
موسم دل لکش ھم نہ اِنت
درچُک ءُ دار گیمرتگ اَنت
دمک اوں پُرسیگ اِنت پہ تو
جیڑ اِیت ھرکس گوں ترانگاں تئی
جیگ ماں جیگاں گوں وت ءَ
پْروشتگاں اَنچو من پہ تو
باتن ءَ چہ من وتی
نہ پُرس اِتگ تو ھال منی۔۔ ؟
باریں پرچا من چوشاں
جستے اوں تو یار نہ کت
کئی زھیر ءُ ترانگ اَنت
تو شُت ئے اَنچوش چِداں
پُشت ءَ چَکے اوں نہ جت
ھچ کلوہ تو ھم نہ دات
گم پہ کے تو اِشتگ اَنت
بار تو کئی دات کوپگاں
تو شت ءُ مھتل نہ کرت
پرچا چو زوت ءَ شت ئے ؟
وش نہ اِنت بے تو سپر
نوں بہ شوھازاں کجا من
تئی وڑیں یک ھمبلے
بیاراں من نوں چہ کجا
تئی وڑ ءَ مُھکم بہ بیت
اَنچو دیوانگ بہ بیت
گلزمین ءَ پہ وتی
روچ ءُ شپ ھچبر مہ زانت
بس دل ءَ درد اِنت ھمے
ننداں جیڑاں من ترا
