نامرد ءِ دست گْوھار ءَ رس اِیت | میجر مجید

شھیدیں شْوانگ گُلام جان ءِ یات ءَ

شھید کُت ازابیں شْوانگے
اے زالماں، ھونوار ءُ دھر ءِ رستراں
انسان دابیں جانوراں
شْوانگ شھید کُت بزّگیں
زلماں تئی ارش ھم سُرینت
چنگیز چہ واب ءَ پچگُڑینت
کُلّیں تجابان پُرسیگ اِنت
ھرجاہ بلوچ مئے ارسیگ اِنت
اے زالمانی ربیت اِنت
زلمانی مکّیں چیدگ اِنت
شوانگ گوں ھاریں بُزگل ءَ
چہ واجہ ھدا ءِ کُدرتاں
چہ زانگ ءُ ھوش ءَ زبھر
نَے جند ءِ گم نَے آتراپ ءِ سُد
گوں بزگل ءَ گوں چاگل ءَ
نَل وشتواریں زیمل ءَ
گوں کپات ءُ سارتیں کلیگ ءَ
بڈّ ءِ وتی شپانکو ءَ
دست ءِ شپارکیں مُکّی ءَ
پانک ءِ جنوک اَت بزگل ءِ
نشتگ بُزاں گوں گپ جنت
مَل شانیں تومی پاچناں
گوں ھُردیں شنکّاں لیب کنت
نَے گرم زانت نَے سرد زانت
نَے چلھڑ ءُ تبدیں لوار
پاداں شپاد ءُ سردر اِنت
سک کم نکان ءُ لاگر اِنت
رھمان ءِ نیکیں بندہ اِنت
ھاکم وت اِنت رَیّت وت اِنت
موجیں دل ءِ مالک وت اِنت
نَے زانت زند ءِ لزّتاں
پھک ءَ زبھر اِنت وشّیاں
نَے آرام ماں نرمیں گندلاں
نَے آپ ءُ تام ءُ وردناں
گرد اِیت گوں ھاریں بزگل ءَ
گیابان ءُ پٹّ ءُ جنگل ءَ
نَے دژمن اَت ، نَے یاگی اَت
مُلما گوں گوسپنداں وتی
دائم پہ مھر ءَ تُنّیگ اَت
تو گیر کائے دائم ءَ
ڈیھ ءِ شھیدانی رم ءَ
گوں پُلدْروشمیں بچکندگاں
مرگ ءَ دوگام دیم ءَ شُت ئے
کُشتگ یزید ءِ لشکر ءَ
جون اِش چگل دات جنگل ءَ
اے لاش پاھو داتگیں
چو کہ کَٹَمب ءَ چُپتگیں
اے جسم ءُ جان تیر سُپتگیں
اے دست ءُ پاد پیلُشتگیں
گنداں اے لاش ءَ کپتگیں
جیگ بند ءِ تُھمَک سستگیں
سنگ دْروشمیں دل کپ بیت
کوھیں جگر ٹَپ ٹَپ بیت
زالم تئی زلم ءِ زراب
انسانیت بیتگ کباب
باریں کدی بیت مئے ھساب
بیگْواہ بیت زلم ءِ کتاب
باریں کدی ھَک، ھَک بیت
زُلم سرنگین ءُ چپ بیت
انسان ءِ بَیرک مِک بیت
انسان ءِ بیرک مک بیت