بیست ءُ ھپت مارچ بلوچ راجدپتر ءِ تاکدیم ءَ پہ بلوچ راج ءَ ھما سْیاھیں روچ اِنت کہ نام گِپتیں اِسلامی ریاست پاکستان گوں وتی درندگیں لشکر ءَ کَیت ءُ مئے آجوئیں سرڈگار ءِ سر ءَ کْوزہ کنت۔
بلے بلوچ راج ءَ ھما روچ ءَ بگر دانکہ مرچی پاکستان ءِ زُوراکیں ھاکمی نہ منّ اِتگ ءُ وتی آجوئی ءِ جُھد ءُ جنگ ءَ گُلائیش اِنت۔ وھد ءِ ھمراھی ءَ اے جُھد الم نِزور ءُ کُنٹ گام بوتگ، بلے آئی ءِ رپتن کدی پُروش آماچ نہ بوتگ۔ اے ھبر ءِ مستریں منّانک چہ دو ھزار ءِ دْھک ءَ پد بلوچ راجی زرمبش ءِ تْرندیں گامگیج اِنت کہ داں مرچی گوں تْرندی ءَ دیم پہ مِنزل ءَ رھادگ اِنت۔
راستے کہ مرچی پاکستان گوں وتی وڑ وڑیں رِپک ءُ پندلاں پہ بلوچ راجی جُنز ءِ پُروش دَیَگ ءُ اِیرموش کنگ ءَ مُلمہ اِنت ، بلے ھر گام ءَ بے سوبی ءِ ارجان اِنت۔ چی ءَ کہ مرچیگیں بلوچ راج ءِ پدریچ اے ھبر ءَ شرّی ءَ سرپد ءُ شیوار اِنت کہ منی رُوژنائیں آکبت گوں سُھردپیں آجوئی ءَ ھمگرنچ اِنت، پمیشکا آ پہ گُلامی ءِ ولگوج کنگ ءَ جُھد ءُ جنگ ءِ پِڑ ءَ ایرکپتگ ءُ دُژمِن ءَ را بیھار دَیَگ ءَ اِنت کہ من پہ وتی مِسکیں گُلزمین ءَ مُرت کن آں بلے پہ ھلو ھالو ترا دات ئِے نہ کن آں۔
پرے ھاتِر ءَ گْوش اَنت کہ زُلم ءُ زُوراکی وتی مرگ ءَ وت نہ مِر اِیت ، بلکیں آئرا کُشگ لوٹ اِیت ، پمیشکا گُلامی ءِ بگیر ءَ جُھد کنگ ءُ
دیمونی دَیَگ ھژدری اِنت ، اگاں نا گُلامی ءُ ایردستی ءِ ریز ءُ سانکل چو پہ ارزانی ءَ کدی نہ سِند اَنت ، بلکیں پہ آیانی سِندگ ءَ پاد آیگ ءُ دیم ءَ درکپگ لوٹ اِیت۔
بَہ کَول ء بھگت سنگ: گلام بوگ ءُ آرامیں زندے ءِ گْوازینگ ءَ چہ گھتر اِنت کہ بدواہ ءَ گوں جنگ دیان ءَ یک کُنٹگ چکاریں زندے گچین بکن دانکہ پہ آیوکیں پدریچانی زِند ءِ پلگارگ ءَ وتی ساہ ءُ سر ندْر کنگ بہ بیت۔
ھمے وڑ ءَ بیست ءُ ھپت مارچ ءِ پُژدر ءَ تاریخ ءُ راجدپتر ءِ رِد ءَ اے راستی مئے ءُ گیدی ءِ دیم ءَ کَیت کہ آزات بلوچستان ءِ بابت ءَ چار اگست نوزدہ سد ءُ چِل ءُ ھپت ءَ وائسرائے ھِند ، مھمد اَلی جِنّاہ ءُ خان کلات یک کؤلبندے ءِ سر ءَ دزنِشان جن اَنت کہ یازدہ اگست نوزدہ سد ءُ چِل ءُ ھپت ءَ آل انڈیا ریڈیو دِھلی ءَ اے ھبر شِنگ ءُ تالان کُتگ کہ اِیشی ءَ را ریاست پاکستان ءَ ھم منّ اِتگ۔ چوش کہ بلوچستان ءِ سرجم ءَ آجوئی ءِ جار ءَ دوزدہ اگست یا پانزدہ اگست نوزدہ سد ءُ چِل ءُ ھپت ءَ خان آف کلات ءَ پرّینیت۔
چریشی ءَ پد ریاستی نِزام ءِ گامگیج کنگ ءِ ھاتِر ءَ برتانیہ ءِ رنگ ءُ داب ءَ دارالعوام ءُ دارالامرا ءِ بُنھِشت ٹھینگ بوتگ ءُ آئی تہ ءَ سرکاری کارانی دیمروئی ءِ واستا الیکشن برجاہ داشتگ کہ اے درگت ءَ کلات اسٹیٹ نیشنل پارٹی سوبین بوتگ ، ءُ اے سوبینی ھمے گپ ءَ پدّر کنت ءُ مارا سرپدی شکسا اِیت کہ بلوچ راج سوھو ، زانتکار ءُ سنڈیمن سردارانی ھِلاپ اِنت۔
بلے ریاست پاکستان چہ کْوزہ ءِ روچ ءَ پد ریاست کلات ءِ ھِلاپ ءَ گوں ھمے چِست ءُ ایراں گُلائیش بوتگ دانکہ وتی کْوزہ ءَ رھبدی دْروشمے بِہ دیاں، بلے اے گپّ وت پدّر اِنت کہ جِنّاہ ءَ ھاران ، لسبیلہ ءُ مکران ءِ سرداراناں پہ رِپک ءُ پندل الحاق کنگ ءِ واستا رازی کُرتگ۔
چوش کہ اے درگت ءَ ڈاکٹر تاج مھمد بریسگ وتی نبشتانکے ءِ تہ ءَ نبشتہ کنت کہ 2006 ءَ یک نامداریں یورپی تھنک ٹینک ئے بُنتران ” فارن پالیسی سینٹر ” برتانیہ ءِ وزیر اعظم ٹونی بلیئر ءِ سرکماشی ءَ بُنگیج کُتگ۔ چریشی ءَ یک پنتاکے ، بزاں پمفلٹے ءَ ھمے گپّ پدّر بیت کہ 1948 نوزدہ سد ءُ چِل ءُ ھشت ءَ کلات ءِ گوں پاکستان ءَ پہ زُورانسری ءُ جبری الحاق برتانیہ ءِ گْوشگ ءِ رِد ءَ بوتگ۔
چوش کہ برتانیہ ءِ سرکار ءِ ھوالہ ءَ دنت ءُ نبشتہ کنت کہ ” فارن پالیسی سینٹر ” ءِ گْوشگ اِنت کہ ستمبر 1948 نوزدہ سد ءُ چِل ءُ ھشت ءَ سیکریٹری اسٹیٹ لارڈ لیسٹوویل ماونٹ بیٹن ءَ شَور ءُ سلاہ دنت ءُ گْوش اِیت کہ کلات اے سَوَب ءَ نُکس ءُ تاوان ، ھترناک بیت کہ اِیشی ءَ انچو پہ آجوئی بِل اِیں۔
پد ءَ ماں پاکستان ءَ نادینتگیں برتانیہ ءِ ہائی کمشنر ءَ را ھم ھمے وڑ ءَ نبشتگ کنگ بیت کہ پاکستان ءَ را یک آزات ءُ وتواجہ ، کلات ریاست ءِ بُنھِشت ٹھینگ ءِ کؤلبند ءَ دُور دارگ ءِ ھاتِر ءَ پہ اِیشی ءَ چے کہ کنگ کپ اِیت ، پاکستان ءِ رھنمائی ءُ کُمک ءَ بکن اِت۔
ھمے وڑ ءَ جِنّاہ ءِ جِند گوں خان اھمد یار خان ءَ گْوش اِیت: تو ھما کار ءَ کنگ ءَ ئے آ کار ءَ مسلم لیگ ءُ کانگریس کنگ لوٹ اَنت، چوش کہ مئیگ ءُ تئی مْیان ءَ پرک ھمیش اِنت کہ ما سیاسی لیڈر اِیں ءُ تو یک راجی ھُکمرانے ئے۔
چہ جِنّاہ ءِ اے گپّاں ھمے پدّر ءُ سھرا بیت کہ آئی خان کلات ءَ را یک یک راجی ھُکمرانے منّ اِتگ ، چریشی ءَ مُول ءُ مُراد ھمے بیت کہ بزاں یک ریاستے ءِ ھاکم!
ھمے وڑ ءَ رِپک ءُ پندل سازیں جِنّاہ خان کلات اھمد یار خان ءَ بلوچستان ءِ ارزِشت ءِ درگت ءَ اے ھم گْوش اِیت کہ ” شُمئے مُلک سیاسی ، جُگراپیائی ءُ اِکتسادی ءِ ھوالہ ءَ ماں اِیشیا ءِ اندر ءَ یک ارزِش داریں خطہ ءُ دمگے!
چوش کہ چہ جِنّاہ ءِ اے دانکاں ھمے زانگ بیت کہ چوشیں یک پُرارزِشتیں دمگ ءُ ریجنے ءَ ما چتور سرگْوز کن اِیں ، پرے ھاتِر ءَ اے گپ سددرسد راست اِنت کہ بلوچستان ءَ را وتی کْوزہ ءِ پنجگاں آرگ ءِ واھشت جِنّاہ ءَ را بِندات ءَ بوتگ۔
چی ءَ کہ جِنّاہ ھمے ھبر ءِ درشان ءَ گوں اے دانکاں کنت” کہ یک انچیں وکتے پیداک اِنت تیوگیں اِسلامی مُلک، اِسلامی رھبندانی مُتابِک ءَ یک فیڈریشنے ءِ دْروشم ءَ وت ماں وت ءَ یکجا ءُ یکمُشت بَہ اَنت ، بلے چرے دُرستاں آ ارزِشت ءُ بِستار کہ کُجام راج ءُ مُلک ءَ را ھاسِل اِنت ، آ بلوچ ءُ بلوچستان اِنت۔
وھدے بلوچ راج وتی ڈیھ ءُ ڈگار ءِ پانک جنی ءُ آجوئی ءِ برجاہ دارگ ءِ ھاتِر ءَ اَمَلی گامگیج زُور اَنت ، گُڑا پندل سازیں جِنّاہ ءَ اے ھبر وش نہ بیت ءُ وتی بے سوبیں مکسد ءِ پیلو کنگ ءَ دیم ءَ پہ بلوچستان ءَ دنت۔
5 فروری 1948 جِنّاہ ماں ڈھاڈر ءَ گوں خان کلات ءَ مُلاکات کنت ءُ آجوئیں ریاست بلوچستان ءَ گَیر فطری مُلک پاکستان ءَ شامِل ءُ ھوار کنگ ءِ دِرکّ ءُ دور جنت۔ اے دوران ءَ میر اھمد یار خان آئی ءَ چہ پارلیمنٹ ءِ پیسلہ ءَ سرپد ءُ وتی بیواکی ءِ درشان ءَ کنت ، چی ءَ کہ کلات پارلیمنٹ ءِ دوئیں ایواناں گوں پاکستان ءَ الحاق ءِ داتگیں سلاہ ءُ تجویز گوں مزنیں اکسریتے ءَ ایرجتگ ءُ نہ منّ اِتگ ، بزاں مسترد کُرتگ۔
21 فروری1948 ءَ بلوچ ریاستی پارلیمان دارالعوام ءِ پد ءَ دیوان بیت کہ آئی تہ ءَ الحاق ءِ بابت ءَ گپ ءُ رپ بیت ، بلے گَیر فطری الحاق ءِ تجویز ءَ دوبر مسترد کن اَنت ۔ چرے آسر ءَ پد جِنّاہ ریاست کلات ءِ معاملاتانی فائل ءَ دپت خارجہ ءِ ھوالہ ءَ کنت ءُ پد ءَ 9 مارچ 1948 ءَ یک نِمدی یے ءِ دْروشم ءَ خان کلات ءَ آگاہ کنت۔
ھمے وڑ ءَ 17 مارچ 1948 ءَ پندل سازیں جِنّاہ جام گُلام کادِر ، دارالامرا ءِ باسک نواب بائیان گچکی ءُ نواب ء ھاران میر ھبیب اللہ نوشیروانی ءِ ریپینگ ءَ سوبین بیت کہ چریشی ءَ پد آ گوں نام گِپتیں پاکستان ءَ ھواری ءِ جار ءَ جن اَنت ، بلے دُگنیا ءِ ھِچّ کانود ءُ رھبند اے گپّ ءَ نہ منّ اِیت کہ تو یک مُلکے ءِ بھر ءُ ٹُکّرے چہ آ مُلک ءِ جمھوری ادارہ ، رھبند ءُ کانود ءَ در بِہ چامپ ءُ وتی بکن ، بلے وتگڑیں پاکستان ءَ برتانیہ ءِ کُمک ءَ اے گَیر کانودی اَمَل کُتگ ءُ مئے آجوئیں سرڈگار کْوزہ کُتگ۔ اے درگت ءَ ریاست کلات ءَ پاکستان ءِ گَیر کانودی اَمَل ءِ بگیر ءَ اِھتجاجی مراسلہ نبشتگ کُتگ ، بلے پنجابی سرکار وتی گُروناکی ءُ تاکت ءِ زُور ءُ واک ءَ ھِچّ وڑیں کانود ءُ رھبند دیم ءَ نیارتگ۔
وھدے دُگنیا ءَ پاکستان ءِ اے گَیر کانود ءُ رھبندی گامگیج ءِ ھِلاپ ءَ ھِچّ وڑیں توار کہ چِست نہ کُتگ ، گُڑا 26 مارچ 1948 ءَ پاکستان ءِ بری ءُ بحری لشکر تیاب دپی ھند ءُ دمگاں ھوار کیچ ءُ پنجگور ءَ لشکرکشّی کنت۔ اے درگت ءَ پروپیسر واجہ فاروق بلوچ وتی کِتاب ” بلوچ اور ان کا وطن ” ءِ تہ ءَ نبشتہ کنت کہ 27 مارچ 1948 ءَ پاکستان گوں وتی وڑ وڑیں رِپک ءُ پندلاں ، لب ءُ لالچاں ، پوجی تاکت ءِ زُور ءَ بلوچستان ءِ سر ءَ پہ زُورانسری کْوزہ ءَ سرجم کنت ، ءُ برتانیہ وتی اے نابکاریں اَمَل ءِ پیلو کنگ ءَ سوبین بیت ، چی ءَ کہ آئی ءَ پہ وتی سیت ءُ نپّانی پھازگ ءَ پاکستان ءِ دْروشم ءَ یک چوکیداریں مُلکے دست کپ اِیت۔ ءُ ھمے وڑ ءَ آئی ءِ ھمراھی ءَ لھتیں بلوچ نواب ءُ سردارانی راج دُژمِنی ءُ وتن ءَ گوں بے وپائی ءِ داستان ھم راجدپتر ءِ تاکدیماں نبشتگ بیت کہ مرچی ھم آ داستان گیر آرگ بیت ءُ پہ آیوکیں پدریچ ءَ یک درونتے۔
بلے! 27 مارچ 1948 ءَ وھدے پاکستان وتی کْوزہ ءَ بلوچستان ءِ سر ءَ سرجم کنت ءُ بلوچ راج ءَ را یکرندے پد ءَ چو پرنگیانی داب ءَ گُلامی ءِ سانکلاں کہ دست ءَ دنت ، بلوچ راج ھما روچ ءِ بگر دانکہ مرچی وتی ببا داتگیں آجوئی ءِ دزگِرگ ءَ جُھد ءُ گوں پاکستان ءِ درندگیں لشکر ءَ جنگ کنگ ءَ اِنت۔
چی ءَ کہ پاکستانی کْوزہ ءَ پد آگا ابدُلکریم ءِ ھمراھی ءَ سِلاھبندیں جُھد ءَ بلوچ کواس ءُ شائِر واجہ مھمد ھُسین عنقا ، ملک سئید دِھوار ، کادِربکش نِزامانی ، مولوی مھمد اپزل مینگل ءِ ھواری ءَ بازیں کسّے آگا ابدُلکریم ءِ ھمراہ ھمسپر بیت۔
مرچی اے ھما جُھد ءُ جنگ ءِ رپتن ءُ روان اِنت کہ برجاہ منتگ ءُ بلوچ راج گوں پاکستانی لشکر ءَ پہ وتی آجوئی ءِ پچگِرگ ءَ جنگ ءَ اِنت۔ چوش کہ مرچی برتانیہ ءِ بدل ءَ پاکستان ءِ کشّ ءَ ماؤ ءِ چین اُوشتاتگ ءُ بلوچ راج ءِ چُکچینی ءَ ھوار ءُ ھمدست اِنت۔ بلے بَہ کَول ء بلوچ راجی رھشُون واجہ ڈاکٹر اللہ نِزر : چین ءَ را وتی آشوبی سبکّ یات کنگی اِنت ، چی ءَ کہ کوم ءِ ھِلاپ ءَ جنگ ءَ ھِچّ وڑ ءَ کٹ اِت نہ کنت۔ اگاں اُرش کار چینچو تاکت ور بِہ بیت۔
پمیشکا! بلوچ راج ءَ پاکستان ءِ ھمراھی ءَ چین ءَ را ھم اے باور کنائینتگ کہ راجی جُھدانی تیلانک ءِ دیم ءَ گیدی ءِ ھِچّ تاکت ءُ زُورمند داشت نہ کنت ، نیکہ بلوچ راج چہ وتی آجوئی ءِ جُھد ءُ جنگ ءَ دزکشّ بیت۔ چی ءَ کہ شھیدانی رِتکگیں ھونانی مُزّ، زِندانی ئیں پُسّگانی دیستگیں واب ءِ مانا ، راجی جُنز ءِ پِڑ ءَ جُھد ءُ جنگ کنوکیں بلوچ پُسّگانی زِند ءِ گُڈّی مِنزل گُلامیں راج ءُ ڈیھ ءِ آجوئی اِنت۔ گُڑا سِدکاں بلوچ راجی جُھد ءِ دیم ءَ پاکستان ءُ چین نہ ، بلکیں گیدی ءِ ھِچّ تاکت داشت نہ کنت۔ بلے دیمونی دَیَگ ءِ لیکہ ءُ پلسپہ برجاہ دارگی اِنت ، چی ءَ کہ مرچی کُجام راج آجوئی ءِ بیٹ سراں نِشتگ اِیمن ءُ وشھالیں زِندمانے گْوازینگ ءَ اِنت ، اے ھمے داتگیں کُربانیانی برورد اِنت۔
