چینچو وھد گْوستگ کہ ترا نہ دیستگ۔ گوں ترا گپ ءُ تْران نہ کُتگ۔ کرنے گْوستگ کہ گوں ترا جنگ ھم نہ کُتگ ، تئی واتر بُوَگ ءِ دُرستیں واب چو کانچ ءَ پُرشتگ اَنت ءُ منی سینگ ءَ پیوست اَنت۔۔۔۔۔۔۔
دم کشّاں۔۔۔۔۔۔۔۔۔۔گُڑا گُمان بیت کہ تاکریچ ءِ موسماں مُرتگیں درچکے پہ پُرشگ ءَ دلمانگ اِنت ، وھدے من جیڑ آں۔۔۔۔۔۔۔وت ءَ وت جُست کن آں کہ پرچا من ترا رَوَگ ءَ اِشت۔ شالا من ترا بہ داشتیں روگ ءَ مہ اِشتیں۔۔۔۔۔۔۔۔۔پد ءَ وتار ءَ وت ، تسلہ دے آں کہ آ کس ءَ کہ رَوَگی اِنت۔۔۔۔الم روت۔۔۔۔۔۔
اے جُتائی ءِ دْراجکشّیں سالانی تہ ءَ بازیں چیز مٹ بوت ، بلے من انگت ھما وڑ ءَ آں کہ ھما داب ءَ تو منا یل کُتگ ءُ شُتگ اِت ئے۔ منی رنگ ءُ داب، گردگ ، واب دْرست ھما وڑ ءَ اَنت کہ تئی ھمراھی ءَ بیتگ اَنت۔۔۔۔۔۔بس نی ھمے پرک اِنت کہ پیسر ءَ من وتی ھاتر ءَ کند اِتگ نی من مردُمانی ھاتر ءَ کند آں۔۔۔۔۔۔۔
گْوش اَنت وھد ءِ ھمراھی ءَ اِنسان وتار ءَ ھم مٹ کنت ، من ھم وتار ءَ بدل کنگ ءِ جُھد ءَ آں۔ ھما دُرستیں چیز ، گپ یل داتگ اَنت کہ ترا دوست نہ بوتگ اَنت۔ ھما کتاب کہ تو گْوشتگ اِت اَنت کہ بِہ وان اِش ، دُرست ونتگ۔۔۔۔۔۔۔۔۔
ھمے کہ روچ وتی بْرانزاں زمین ءِ دِلبند ءَ تالان کنت ، دو پیالہ چاہ زیران ءُ تھنا نِنداں وراں۔ ھیالانی تہ ءَ ترا وتی دیم ءَ نادیناں گوں ترا گپ کن آں۔۔۔۔۔۔۔ٹھک دیان ءُکند آں۔۔۔۔۔۔۔
گوں ترا ھما دْراجیں سپر ءَ نہ رَوَگ ئے مرچی ھم منا اپسوز ءُ ارمان اِنت۔۔۔۔۔۔۔۔، ھردیں دْراجیں سپرے ءَ درکپ آں گُڑا تو بے کساس گیر کائے۔ تئی کمّی ءَ مروچی ھم ، من ھما وڑ ءَ ماراں۔۔۔۔۔۔۔
گوں ترا گْوازینتگیں ھمُک ساھت ءُ دمان مروچی ھم ، من ءَ ھما وڑ ءَ یات اَنت۔۔۔۔۔گْوش ئے کہ زیکیں گپ اَنت۔ من ءَ یات اِنت وانگجاہ ءِ دَور کہ چِہ پیم من ءُ تو سبکّ ءِ ھمراھی ءَ مھر ءِ سبک دربرت گوں ، من ءَ انگت یات اِنت کہ من ءُ تو چِہ پیم سرجمیں شپ موبائل ءِ سر ءِ گپ جتگ۔ گپ گپ ءَ ھچ سما نہ بیتگ کہ تھاریں شپ مھلبیں بامے ءَ بدل بوتگ ، بلے منی ءُ تئی گپ ھلاس نہ بیتگ اَنت۔۔۔۔۔۔۔۔۔۔۔
ھما اِنت کہ تو چِدا چہ رپتگ ئے ، ھچ چیز پیسری داب ءَ نہ اِنت۔ نی دل ھم نہ گْوش اِیت کہ چیزے نبشتہ بہ کن۔ وھدے نبشتہ کن آں گُڑا ھمے مارِشت ودی بیت کہ منی نبشتانکاناں مرچاں آ تام ءُ شیرکِنی مان نیست کہ پیسر ءَ بیتگ۔۔۔۔۔۔۔۔۔۔
اگاں من چیزے نبشتہ کُتگ ، گُڑا اول تئی سر ءَ روان داتگ ءُ پد ءَ شِنگ کُتگ۔ نی بس نبشتہ کنان ءُ گْوات ءِ دست ءَ دیانے۔۔۔۔۔۔۔۔۔
نی مئے بازار ھم مٹ بیتگ۔ کس کسی وشی ءُ شاتکامیاں ، گم ءُ موتکاں ھوار نہ اِنت۔ گام گام ءِ سر ءَ بوٹ پادیں سِپاھیگ اُوشتاتگ اَنت کہ ترا چو جِنّ ءَ تُرسین اَنت۔ آ دَور ءُ باریگ گْوست اَنت کہ ھمُک سیری شادِھاں چاپ ءُ نازینک اَت ، کندگانی زیمر شِنگ اِت اَنت۔۔۔۔۔۔۔۔۔۔۔
یات اِنت ترا ھمُک سیرانی ھِنّی بندیں شپ چِہ پیم سرگْوپ ءَ ھِنّیانی تال سر ءَ اَت۔۔۔۔ءُ ما اگربتیانی دُزّگ ءَ چون چونیں ھُنر ساز اِت۔۔۔۔۔۔۔۔
ھو! آ کسانی اَت کہ آسر بوت ، چونائی ءَ ھر چیز وتی وھد ءُ نوبت ءَ آسر بیت۔۔۔۔۔بلے مروچاں چوش نہ اِنت ۔ انیگیں دَور ءِ کسانی چہ وھد ءَ پیسر آسر بنت۔ آ دَور ءَ کسانی گوں لیب ءُ گْوازیاں گْوست ، مروچاں شُد ھڑتالی بُنجلاں (کیمپاں) پہ وتی آریپانی ودار ءَ گْوز اَنت۔۔۔۔۔۔۔
تئی اے ھپتیں سالانی جُتائی ءِ سَوَب انگت من زانت نہ کُتگ ، بِی گِندئے تئی مکسد دِگر اِت اَنت ءُ منی اِرادہ دگہ۔۔۔۔۔۔ من زانتگ اَت کہ ھمے راہ ءِ من مُساپر آں ، اِشی ءِ مِنزل مرگ اِنت۔ ترا ھم سما اَت ، گُڑا اے کُنٹگ چکاریں کِشکاں من ءَ تھنا چی ءَ یل کُت ، وتی کِشک جُتا کُت ءُ انچو پہ بے تواری ءَ رپت ئے کہ پد ءَ چکّے ھم نہ جت۔۔۔۔۔۔۔۔۔۔
بلے! من ءَ گوں تو ھچ گِلگ نیست ، بس من ءَ درد ھمیش اِنت کہ تو منی ھمراھی ءَ ھما زمین ھم شموشتگ کہ من ءُ تو یکجاہ آئی ءِ سر ءَ رُستگ ءُ مزن بیتگیں ۔ آئی ءِ تیاب ءِ چَولاں گوں لیب کُتگ۔ آئی ءِ نِھنگیں کَوراں جان شُشتگ۔ آئی ءِ مچکدگاں گْوازی کُتگ ءُ ترشتیں تلاراناں سیل ءُ ندارہ۔۔۔۔۔۔۔مِھلبیں زیداں گوں مُلمہ بیتگیں۔۔۔۔۔۔۔۔۔
ھردیں ترا منی ءُ منی زمین ءِ یات اَتک اَنت ، گُڑا سنج رنگیں بچکندے وتی زیبائیں لُنٹانی سر ءَ تالان کن۔۔۔۔۔۔۔۔۔مدامی ئیں رنگ ءَ تو منا ءُ منی زمین ءَ وتی کش ءُ کِرّاں گِندئے۔۔۔۔۔۔۔۔
یات اِنت ترا۔۔۔۔۔! تو من ءَ مُدام گْوشتگ اَت کہ بے پکر بو ترا کدی ھم تھنا نہ کناں ، مروچی من وتی زمین ءَ گْوشگ لوٹاں کہ گم مکن من کدی ھم بے وپا نہ بَہ آں ءُ ترا تھنا یل نہ کن آں۔۔۔۔۔۔۔
داں گُڈّی ساہ ءُ گُڈّی وھد ءَ ، دانکہ پُلّیں آجوئی ءَ۔۔۔۔۔۔۔۔۔۔۔۔تئی ءُ تئی مزاریں بچّانی ھمراھاں۔۔۔۔۔۔۔۔۔۔۔
تو مُدام سلامت ءُ وشیانی منگیراں بات ئے ، منی زمین آجو بات۔۔۔۔۔۔۔۔۔۔
تئی ءُ زمین ءِ شیدا۔۔۔۔۔۔۔مھروان کمبرو
