کوئٹہ کی یخ بستہ سردی اور بارش کے باوجود جبری گمشدگیوں کے خلاف اور لاپتہ بلوچوں کی بازیابی کے لیے وائس فار بلوچ مسنگ پرسنز (VBMP) کے زیر اہتمام کوئٹہ پریس کلب کے سامنے قائم احتجاجی کیمپ 6123ویں روز بدستور جاری ہے۔
اس دوران مختلف مکاتبِ فکر سے تعلق رکھنے والے افراد نے احتجاجی کیمپ کا دورہ کیا، جبری گمشدگیوں کے خلاف اپنا احتجاج ریکارڈ کرایا اور لاپتہ افراد کے لواحقین سے اظہارِ یکجہتی کیا۔
شرکاء نے بلوچستان میں جبری گمشدگیوں اور ماورائے آئین اقدامات پر گہری تشویش کا اظہار کرتے ہوئے ان کے فوری خاتمے اور لاپتہ افراد کی بازیابی کا مطالبہ کیا۔
اس موقع پر نیاز محمد نے گفتگو کرتے ہوئے کہا کہ ہماری یہ پرامن اور آئینی جدوجہد بلوچستان میں جبری گمشدگیوں اور ماورائے قانون اقدامات کے خاتمے اور لاپتہ افراد کی بازیابی تک جاری رہے گی۔
