بلوچستان بھر میں تھریٹ الرٹس اور دفعہ 144 کے نفاذ کے دوران کوئٹہ شہر میں بلدیاتی انتخابات کے شیڈول کا باضابطہ اعلان کردیا گیا ہے۔
شہر کی 172 یونین کونسلز اور 641 وارڈز میں بلدیاتی انتخابات ہونگے۔
دوسری جانب جمعیت علمائ اسلام کے زیر اہتمام آل پارٹیز کانفرنس کا کہنا ہے کہ کوئٹہ میں بلدیاتی انتخابات،خوف ، تھریٹ الرٹس اور دفعہ 144 کی پابندیوں کے سائے میں بلدیاتی انتخابات کا انعقاد ایک بڑا سوالیہ نشان ہے حکومت اور الیکشن کمیشن شفاف انتخابات کے بجائے محض خانہ پری پر تلے ہوئے دکھائی دیتے ہیں ۔
انہوں نے کہا کہ عام انتخابات کی طرح بلدیاتی الیکشن بھی اگر فارم 47 کے طرز پر کرانے کی کوشش کی گئی تو اسے کسی صورت قبول نہیں کیا جائے گا۔
دسمبر میں ہونے والے ان انتخابات کی تیاریاں شروع کردی گئی ہیں جب کہ اس سلسلے میں ریٹرننگ افسران اور ڈسٹرکٹ ریٹرننگ افسران کے دفاتر کے باہر عوامی نوٹس آویزاں کردیے گئے ہیں۔
کاغذاتِ نامزدگی کی وصولی اور اجرا 13 سے 17 نومبر تک کی جائے گی، نامزد امیدواروں کے ناموں کی فہرست 18 نومبر کو شائع کی جائے گی جب کہ کاغذاتِ نامزدگی کی جانچ پڑتال 19 سے 24 نومبر تک کی جائے گی۔
کاغذاتِ نامزدگی کی منظوری یا مسترد کیے جانے کے خلاف اپیل دائر کرنے کی آخری تاریخ 28 نومبر مقرر کی گئی ہے۔
اپیلٹ ٹربیونل کی جانب سے اپیلوں پر فیصلے کی آخری تاریخ 3 دسمبر مقرر کی گئی ہے، امیدواروں کی نظرثانی شدہ فہرست 4 دسمبر کو شائع کی جائے گی جب کہ امیدواروں کی دستبرداری کے بعد نظرثانی شدہ فہرست 5 دسمبر کو شائع کی جائےگی۔
امیدواروں کی حتمی فہرست اور انتخابی نشان 6 دسمبر کو الاٹ کیے جائیں گے جب کہ بلدیاتی انتخابات کے لیے پولنگ 28 دسمبر بروز اتوار کو ہوگی۔
ادھر آل پارٹیز کانفرنس کے شرکا نے کہا کہ ضلع کوئٹہ کے بلدیاتی انتخابات کی صورتحال گیس بجلی کی بدترین لوڈ شیڈنگ پینے کے ساتھ پانی کی قلت امان کی مجموعی صورتحال و دیگر عوامی و سماجی مسائل پر غور و خوض کے لیے تمام سیاسی جماعتوں کا ال پارٹیز کانفرنس ضلعی امیر مولانا عبدالرحمن رفیق کے زیر صدارت ضلعی دفتر انگل روڈ کوئٹہ میں منعقد ہوا ۔
اجلاس میں جمعیت علما اسلام ضلع کوئٹہ کے جنرل سیکرٹری حاجی عین اللہ شمس مولانا خورشید احمد بلوچستان نیشنل پارٹی کے صوبائی ڈپٹی ضلعی صدر وہ مرکزی سینٹرل ایگزیکٹو کمیٹی ممبر غلام نبی مری پشتونخواہ نیشنل عوامی پارٹی کےصوبائی ڈپٹی سیکرٹری عبدالرزاق بڑیچ ،ندا محمد خان سنگر ،عوامی نیشنل پارٹی کوئٹہ کے صدر ثنا اللہ خان کاکڑ ،حمزہ خان کاکڑ، اخلاق بازئی، نیشنل پارٹی کے ملک نصیر شاہوانی، سعد دہوار، پاکستان پیپلز پارٹی ضلع کوئٹہ کے صدر میر نصیب اللہ شاہوانی، میر ولی محمد قلندرانی، محمد اسماعیل بنگلزئی، میر جہان زیب ،مرکزی جمعیت اہل حدیث کے صوبائی نائب امیر مولانا عصمت اللہ سالم، مولانا حزب اللہ عثمانی، پاکستان مسلم لیگ ن کے حیدر خان اچکزئی، جماعت اسلامی کے نائب امیر عبدالاحد منصوری، جنرل سیکرٹری اعجاز محبوب، کنزیومر سوسائٹی بلوچستان کے خیر محمد شاہین مرکزی مسلم لیگ کے صوبائی صدر محمد ادریس مغل اور حافظ خلیل اللہ نے شرکت کی۔
اجلاس آل پارٹیز کانفرنس نے بلدیاتی انتخابات اور کوئٹہ کے دیگر بنیادی مسائل کی حل کے لیے ال پارٹیز کا مشترکہ کمیٹی بھی بنانے پر اتفاق ہوا جو کوئٹہ شہر کی مسائل کی حل کے لئے مشترکہ جدوجہد کریگی اور بہت جلد سیاسی جماعتوں کی مشاورت سے دوسرا اجلاس کسی اور جماعت کے دفتر میں منعقد کریگی جس میں باقی ماندہ جماعتوں کو بھی مدعو کیا جائے گا جو اج کے اجلاس میں شریک نھیں تھے۔
آل پارٹیز کانفرنس نے پی ٹی آئی کے مقامی رہنمائوں کی گرفتاری کی شدید الفاظ میں مذمت کرتے ہوئے کہا کہ کسی بھی سیاسی جماعت کو اپنی آئینی جدو جہد سے روکنا آمریت کی ہی شکل ہے۔ایسے ماحول میں بلدیاتی انتخابات کا انعقاد ناممکن بلکہ شکوک وشبہات سے خالی نہیں ہے۔
