پاکستان کے قومی اسمبلی میں اپوزیشن لیڈر عمر ایوب، شبلی فراز، زرتاج گُل سمیت پاکستان تحریک انصاف ( پی ٹی آئی)کے 108 رہنماؤں اور کارکنوں کو قید کی سزائیں سنائی گئیں۔
فیصل آباد کی انسداد دہشت گردی کی عدالت نے نو مئی کے مقدمے میں جرم ثابت ہونے پر 108 مجرمان کو سزائیں سنائی ہیں۔
عدالت کی طرف سے سنائے گئے فیصلے میں قومی اسمبلی میں اپوزیشن لیڈر عمر ایوب، قومی اسمبلی میں پاکستان تحریک انصاف کی پارلیمانی لیڈر زرتاج گل اور سینیٹ میں پاکستان تحریک انصاف کے پارلیمانی لیڈر شبلی فراز کو دس دس سال قید کی سزا سنائی ہے۔
سنی اتحاد کونسل کے چیئرمین حامد رضا کو بھی 10، 10 سال قید کی سزا سنائی گئی ہیں جبکہ انسداد دہشت گردی کی عدالت نے سابق وفاقی وزیر فواد چوہدری اور رکن قومی اسمبلی زین قریشی کو بری کردیا ہے۔
یاد رہے کہ نو مئی 2023 میں فیصل آباد میں واقع ایک حساس ادارے کے دفتر پر حملہ کیا گیا تھا جس کا مقدمہ انسداد دہشت گردی کی دفعات کے تحت درج ہوا تھا۔
اس مقدمے میں 185 ملزمان تھے جن میں سے 108 ملزمان کو مجرم گردانتے ہوئے عدالت نے جمعرات کے روز سزائیں سنائی ہیں۔
یہ بھی واضح رہے کہ سپریم کورٹ نے انسداد دہشت گردی کی عدالتوں کو حکم دیا تھا کہ وہ 9 مئی کے مقدمات میں عدالتی کارروائی مکمل کرتے ہوئے ان پر فیصلہ سنائیں اور سپریم کورٹ کی طرف سے دی جانے والی ڈیڈ لائن اگلے ماہ ختم ہو رہی ہے۔
چند روز قبل بھی انسداد دہشت گردی کی عدالت نے پی ٹی آئی کے احمد چٹھہ، احمد خان بھچر، ڈاکٹر یاسمین راشد اور میاں محمود الرشید سمیت دیگر ملزمان کو نو مئی کیس میں مجرم قرار دیتے ہوئے 10 سال کی سزا سنائی تھی۔
تجزیہ کاروں کا کہنا ہے کہ عسکری اسٹیبلشمنٹ عمران خان سے اتنا خوفزدہ ہے کہ وہ انہیں جیل میں رکھنے کے لئے اس کی پوری پارٹی سمیت رہنمااور کارکنان کو انتقامی کارروائیوں کا نشانہ بنا رہی ہے ۔
وہ کہتے ہیں کہ سزا پانے والے افراد وہ ہیں جو عمران خان سے بہت قریب ہیں اور ان سے جیل میں ملاقات بھی کرتے رہے ہیں۔
