پاکستانی فوج نے دعویٰ کیا ہے کہ جعفر ایکسپریس پر حملے کے بعد سکیورٹی فورسز کی جانب سے کیا جانے والا کلئیرنس آپریشن مکمل ہو گیا ہے اور تمام عسکریت پسندوں کو مار دیا گیا ہے۔
ان کا مزید کہنا ہے کہ اس آپریشن کے دوران کسی مسافر کا جانی نقصان نہیں ہوا۔ تاہم انھوں نے تصدیق کی کہ اس سے قبل 21 مسافر ہلاک ہوئے۔
نجی ٹی وی چینل سے گفتگو میں آئی ایس پی آر کے ترجمان لیفٹیننٹ جنرل احمد شریف نے بتایا کہ ایف سی کے 4 جوان بھی ہلاک ہوئے جنھیں پکٹ کے پاس شدت پسندوں نے حملہ کر کے مارا۔
انھوں نے بتایا کہ کلئیرنس آپریشن ہو چکا ہے تاہم ابھی علاقے میں پروٹوکول کے مطابق جانچ پڑتال کی جا رہی ہے۔
ان کا کہنا تھا کہ کچھ مسافر جو بھاگ کر دائیں بائیں چلے گئے تھے انھیں اکٹھا کیا جا رہا ہے۔
ان کا کہنا تھا کہ عسکریت پسندوں نے معصوم مسافروں کو انسانی ڈھال کے طور پر استعمال کیا۔
فوج کے ترجمان نے بتایا کہ ایس ایس جی کے کمانڈوز، ایف سی اور سکیورٹی اہلکاروں سمیت پاکستانی فضائیہ نے بھی آپریشن میں حصہ لیا۔
ان کا کہنا تھا کہ سب سے پہلے آپریشن کے دوران خودکش حملہ آوروں کو مارا گیا۔