اے گیدی ءِ راست ءُ گْواچنیں ھبر ئِے کہ کسے ءَ مات ءِ لاپ دیستگ آ الم کبر ءَ گِند اِیت ، بلے راجانی تہ ءَ لھتیں انچیں تمردیں سر بَہ اَنت کہ آوانی مرگ ءَ پد ھم دانکہ اے دنیا ھست مان اِیت آوانی کُتگیں کارِست گیر آرگ بَہ اَنت ، آوانی نام ماں راجدپتر ءِ تاکدیماں نبیسگ بَہ اَنت ۔ راج ءِ آؤکیں پدریچ چہ ھما تمردیں سرانی سَسّا ءُ پِگر ءَ شُون زُور اَنت وتی راج ءُ سرڈگار ءَ چہ کْوزہ گیراں آجو کنگ ءِ واستا پہ مادنیں راھاں در کپ اَنت دانکہ ایردست ءُ گُلامیں راج ءِ آکبت وشھال بہ بیت ءُ ماتیں سرڈگار چہ دری کومانی ایر دستی ءَ بہ رکّ اِیت۔
بلوچ ماتاں ھم انچین گھِمَرد ءُ سرمتابیں بچّ ودی کُتگ کہ آ مُدام پہ بلوچ گُلزمین ءِ پَدجَنّگ ءُ وتی مات ءُ گْوھارانی اِزّت ءُ شّرپ ءِ پھازگ ءَ دائم ءَ جاڑی بوتگ اَنت۔۔۔
من بلوچ گُلزمین ءِ ھما سرمتابیں بچّاں چِہ یکّے ءِ بابت ءَ مرچی کاگد ءِ تاکدیمے سیاہ کنگ ءِ جُھدے کنگ ءَ اُوں بِہ گِندئے منی وڑیں یک کم سّسا ءُ زانشتیں مردمے ءِ کِرّ ءَ لبزانی ڈُکّال ھم بہ بیت ، بلے پہ یک بلوچ ءِ نمیرانیں بچّے ءِ بارو ءَ نبیسگ ءِ ھاتر ءَ یا کہ منی پُرشتگیں لبزانی کَد ھم کسَان بِہ بیت ، چی ءَ کہ آ نمیرانیں بچّ بلوچ گُلزمین ءِ ملّیں پُسّگ اِنت ءُ پہ بلوچ راج ءِ ھاتر ءَ داتگیں دیم ھُونیانی دیم ءَ منی لبزانی چے بسات۔۔۔۔؟
من اے ھبر ءَ سدّکاں کہ آئی ءِ پہ وتی ایردستیں راج ءِ ھاتر ءَ داتگیں دیمھُونی پہ منی چار پُرشتگیں لبزانی کمایگ ءِ مھتاج ھم نہ اِنت۔۔۔۔۔
آ بچّ نمیرانیں ناجد جان پنّام ء سلیم جان اِنت ، نمیرانیں ناجد جان 1996 ءَ ماں بلوچستان ءِ زیبائیں ھند جاہ ء آھُو کوھڑو ءَ اُستاد دلمراد بلوچ ءِ گِس ءَ ودی بیت۔ دانکہ پنچ تبک ءَ وتی میتگ ءِ وانگجاہ ءَ وان اِیت پہ گیشیں وانگ ءِ ھاتر ءَ شال{کوئٹہ } ءَ رُوت ، بلے تنگدستی ءُ گریبی دیمتِر ءَ آئرا وانگ ءِ موکل ءُ موہ نہ دنت کہ بِہ وان اِیت ، گُڑا آئی ءِ وانگ ماں وانگجاہ ءَ ھمے ھدّاں توام بیت ۔ شھید چہ درکسانی ءَ وتی بلوچ راج ءِ تنگدستی ءَ گِند اِیت وتی جُھد ءِ بُنگیج ءَ چہ بلوچ وانندہ گل آزات {بی ایس او آزاد} ءَ کنت ءُ بلوچ وانندہ گل آزات ءِ یک باسکے ءِ بِستار ءَ کار کنت ءُ گل ءِ ھپتگی (ھفتہ واری) اسٹڈی سرکل ءُ دیواناں بھر زُور اِیت چہ ھمدا آئی ءِ گلامی ءِ ھِلاپ ءَ نپرت کنگ ءِ سسّا توان تِر بوھاں بیت ءُ شھید ءَ را گیشتر گُلامی ءِ مارِشت بیت کہ منی راج یک دری راجے ءِ گُلام اِنت ءُ مئے ڈیھ ءِ سر ءَ دگہ راجے ءَ کْوزہ کُتگ ۔ شھید ناجد جان کہ وانگ ءَ یلہ کنت گُڑا زمینداری ءَ بِندات کنت ، ھمے رنگ ءَ بلوچستان ءِ توک ءَ اِستان ءِ زالمیں پوج ءِ زُلم ءُ زالمی گیشتر بُوھان بنت کہ یک چُوشیں میتگ ءُ ھلکے ، لوگ ءُ گِدانے ، کوہ ءُ کُوچّگ ءِ پش نہ کپ اِیت کہ اُود ءَ پاکستانی پوج ءُ آئی ءِ داشتگیں چانوگِراں وتی زُلم ءُ زالمی ءِ نشان ایر نہ کُتگ۔ ھمے ڈول ءَ جاہ ء آھُو ءَ ھم پاکستانی پوج گوں وتی کاسگ چٹّیں بلوچ آجوئی لوٹوکیں سنگتانی چِست کنگ ءُ شھید کنگ ءَ بندات کنت دانکہ بلوچ آجوئی ء جُھد ءَ گوں وتی یزیدی زُلم ءُ زوراکیاں ھلاس بِہ کنت دانکہ پد ءَ کسے پہ بلوچستان ءِ آجوئی ء جُھد کنگ ءِ واستا لانک ءَ مہ بند اِیت۔ بلے اے کْوزہ گیریں پاکستان ءِ وتی نازانتی اِنت کہ یک راجے ءَ را ءَ پہ زور ءُ تاکَت کدی ھم بے توار کُت نہ کن ئِے ، مرچی راجدپتر اے گپ ءِ گواہ اِنت کہ ایردستیں راج ھما وھد ءَ گار ءُ گُمسار بَہ اَنت کہ زوراک ءِ دیم ءَ وتی سر ءَ جھل بِہ کن اَنت ، بلے پہ کُشگ ءُ بیگواہ کنگ ءَ راج کدی ھم ھلاس نہ بوتگ اَنت نیی بَہ اَنت ۔ اگاں ما بلوچ ءِ گْوست ءُ راجدپتر ءَ بِہ چار اِیں گُڑا ما ھمے دانک ءَ آژناگ بَہ اِیں کہ بلوچ ءَ کدی ھم زُلم ءِ دیم ءَ وتی سر جھل نہ کُتگ گوں دُژمن ءَ زان پہ زان نہ نِشتگ ، ءُ دژمن ءَ را پہ اِیمنی وتی ڈیھ ءِ سر ءَ کْوزہ کنگ ءَ کدی رازی نہ بوتگ ، بلکیں گوں زُورآوریں دُژمن ءَ جنگ کُتگ ءُ وتی ھیسی ئیں سر ببا داتگ ءُ ماں گیدی ءِ راجدپتر ءَ پہ مُجّتی اَبدمان بوتگ۔۔
ھمے داب ءَ وھد ءُ پاس گْوزان بَہ اَنت اِستان ءِ نیمگ ءَ چہ بلوچ آجوئی دوستیں گُل ءُ پارٹیانی سنگت ءُ دوزواھانی بگیری ءَ وتی دْراج کشیں پوجی آپریشن بِندات کنت دانکہ روچ ء مروچی ھما پوجی آپریشن جاری اَنت۔۔ اِستان ءَ بلوچ ءِ پہ وتی ڈیھ ءِ آجوئی ءِ واستا پاک ءُ پلگاریں جُھد ءَ را ھلاس کنگ ءِ واستا وڑ وڑیں رِپک ءُ ھُنر ساز اِت ، کدی اے جنگ ءَ را مزھبی نامے دات ءُ کدی اے جنگ ءَ را دنیا ءِ دیم ءَ لھتیں ٹکّ ءُ بولکانی جنگ ءِ نام دَیَگ ءِ ناکامیں کُوشست کُت۔۔۔کدی بلوچ ءِ جنگ ءِ دیم ءِ دارگ ءِ واستا وتی لھتیں داشتگیں چانوگِر ءُ مزھبی مُلّا کارمرز کُتگ دانکہ اے بلوچ ءِ آجوئی ءِ جُھد ءِ دیم ءَ ڈنگر بِہ بَہ اَنت بِہ گِندئے بلوچ ءِ جُھد ھلاس بِہ بیت ۔۔۔ بلے بلوچ ءِ ھما سیاسی ءُ جنگی گلانی رھشُون ءُ بلوچ ءِ ھما نرمزار ءُ تمردیں بچّانی جُھد ءُ دیم ھُونیانی برورد اِنت کہ انگت ءَ بلوچ ءِ آجوئی ءِ جُھد دیم پہ وتی رژُناھی ءِ مِنزل ءِ نیمگ رھادگ اِنت۔۔۔۔
گُڑا شھید ناجد جان ءَ ھم کَوم ءِ دوستی ءُ گُلزمین ءِ مھر ءَ پہ اِیمنی لوگ ءِ نندگ ءَ نیشت ءُ آ بلوچ راجی گل بلوچ لبریشن آرمی( BLA) ءَ ھوار بیت وتی راجی ڈبّہ ءَ گوں وتی نِزور اِیں کُوپگ ءَ زُور اِیت۔۔۔ گوں وتی ھم تبیں بیلانی ھمراہ بیت ءُ وتی ڈیھ ءِ پد جَنّگ ءَ مادنیں راھاں راھی بیت۔۔۔
شھید ناجد جان چہ وتی گُلزمین ءِ مھراں یک آژناگیں زمین زادگے اَت ، شھید باز مھروان ءُ دل پھکیں سنگتے اَت ۔تو مُدام بِہ دیست اِیں گوں ھر مردُم ءَ یکیں تب ءُ میل ءَ ، شُگُل ، کندگ ءُ مزاک کنگ ءَ اَت کدی ھم تو اے نہ دیست کہ یک روچے گوں سنگتے ءَ دلپدردی یے درشان کُتگ یا کہ گوں سنگت ءَ زھر ئِے کُتگ۔۔ چونیں ھم اگاں سنگتے ءَ اولی رند ءَ بِہ دِیست اِیں الم گوں آئی ءَ دُرستی ءُ راستی بُوت ، دگہ کس ھم اے سرپد نہ بوت کہ اِیشی ءِ اولی رند اِنت کہ منا گنِدگ ءَ اِنت ، تو گْوش ئے زان ءَ سالے ءَ پیسر منی ءُ اِیشی ءِ گنِد ءُ نِند ءُ دیوان بوتگ ۔۔۔مُدام دپ ءِ کندگ ءَ پُر اَت ۔۔۔ شھید ءَ را بلوچی کِتاب وانگ ءِ سکیں بلاھیں ھب ءُ واھگے ھست اَت ءُ وت ھم شھید ءَ بلوچی زُبان ءَ کم ءُ باز شائِری ھم کُتگ اَت۔۔۔۔شھید ءَ رمس 24 اکتوبر 2019 آروس کُت کساس دو ماہ وتی لوگ ءَ نِشت ، گُڑا شھید سالونک ناجد جان ءِ ھمگنگلیں یار سالونک اِیسُپ جان پنّام ء دُودا جان دیم پہ ھند ءِ نیمگ ءَ سپر ءَ در کپگی اَت گُڑا شھید ناجد جان ھم گوں اِیسُپ جان سر گِپت پہ ھند ءِ نیمگ ءَ ، بازیں سنگت ناجد جان ءَ گْوشت کہ تو اَنوں آروس کُتگ انگت تئی دست گوں آروس ءِ ھِنّیاں سُھر اَنت تو ھند ءِ نیمگ ءَ انوں مرو ، بِہ جل کمیں وھد ءَ رند برو تو نوک سُور ئے۔۔۔گُڑا شھید ءَ ھمے گْوشت کہ گُلامیں راج ءَ را سور ءُ وشی ، اِیمنی ءَ زِند گْوزینگ زیب نہ دنت ۔ من اَلم گوں اِیسُپ جان ءَ ھوار رَو آں ، زند ءَ وپا کُت گُڑا واتر بَہ آں۔۔۔۔۔۔۔اگاں نا من چہ سالونکیں ریھان جان ءَ دیم ءَ تِر نہ آں ، بلے بژن کہ 29 جنوری 2020 ءِ روچ ءَ شھید سالونک ناجد جان گوں سالونکیں ھمراہ شھید اِیسُپ جان ءَ ھوار دگہ وتی لھتیں سنگتانی ھمراھی ءَ دیم پہ سپر ءَ درکپ اِیت گُڑا اِستان ءِ داشتگیں مزھبی چانوگِر بلوچستان ءِ ھند بُلیدہ ناگ ءَ پیسر سنگتانی راہ ءَ بند اَنت ءُ پیش تیر بنت ، سنگتانی سر ءَ ارُش کن اَنت گُڑا شھید ناجد جان ، شھید اِیسُپ دُودا جان، شھید دولت جان، شھید شکیل جان ءُ شھید میران جان گوں دُژمن ءِ لشکر ءَ جنگ دیان بنت وتی آ دگہ سنگتاں چہ دُژمن ءِ انگیر ءَ کَشگ ءَ کامیات بنت ءُ دژمن ءِ مزنین کساسے ءَ چانوگِر مُردار کن اَنت ءُ پنچیں سالونکیں بچّ پہ وتی مکھیں ڈیھ نُگرھیں بلوچستان ءِ واستا وتی ھیشی ئیں سراں کُربان کن اَنت ءُ پہ مجتی نمیران بَہ اَنت۔
وھدے کہ سُرمگیں ڈیھ ءِ سالونکیں بچّ ناجد جان ءِ گوں سنگتاں شھیدی ءِ ھال ءَ شھید ناجد جان ءِ شیرزالیں مات بی بی زیبا بلوچ اِش کنت گُڑا وتی تیوگیں بلوچ راج ءَ را کلوہ تامر ءِ تہ ءَ ھمے پیام ءَ دنت ءُ پہ شان وتی بلوچ راج ءَ را وتی شھید ءُ سالونکیں بچّ ناجد ءِ گوں وتی شھیدیں سنگتانی شھیدی ءَ مبارک باتی دنت ءُ ھمے گْوش اِیت کہ من وتی زھگ ناجد جان چار ماہ پیسر گوں وتی دستاں سالونک کُتگ ءُ سُور داتگ ، بلے مرچی ناجد جان آئی ھکّی ئیں مات ءَ سالونک کُتگ بِزاں پہ ماتیں سر ڈگار ءَ منی بّچ ناجد جان شھید بوتگ۔ناجد جان ءِ مکھیں مات زیبا بلوچ آدگہ شھیدانی مات ءُ گْوھاراناں ھمے کُلوہ ءَ دنت کہ پہ وتی زھگانی شھیدی ءِ ھاترا موتک میار اِت ءُ پریشان مہ بَہ اِت ، پرچا کہ مئے زھگ پہ وتی مکھیں سرڈگار ءِ واستا ندْر ءُ کولیگ بوتگ اَنت۔ دیمتِر ءَ شھید ناجد جان ءِ مات ھمے گْوش اِیت کہ ناجد جان ءِ گون ءَ شھید بوتگیں کُلیں زھگ منی زھگ اَنت ، کُلانی درد ءُ گم پہ منی واستا یک اَنت ، بلے سرڈگار ءِ آجوئی ءِ واستا سرانی ببا دَیَگ المّی اِنت۔ اگاں مرچی ناجد جان شھید بوتگ ماتیں سرڈگار ءِ آجوئی ءِ واستا، باندا زلورت بوت من ءَ دگہ چار بَچّ ءُ دو جَنِکّ ھست من پہ سرزمین ءَ کُربان اِش کن آں۔ وتی گپانی تہ ءَ دیمتِر ءَ مات زیبا گوں شھید ناجد جان ءِ سنگت ءُ ھمراھاں ھمے دست بندی کنت کہ لگور مہ بَہ اِت ءُ وتی تہ ءَ تُرس ءَ جاگہ مہ دئے انِت۔ اے دژمن مارا ھِچ کُت نہ کنت ، یکروچے کیت الم ما آجو بَہ اِیں ، شھید ناجد جان ءِ شیرزالیں مات وتی ویڈیو کلُوہ ءِ گُڈّ سر ءَ کُلیں شھیداناں سُھریں دْروت ندْر کنت۔۔
وھدے شھید ناجد جان ءِ مکھیں مات زیبا بلوچ ءِ وتی سالونکیں بچّ ءِ شھیدی ءِ دومی روچ ءَ بلوچ راج ءِ نام ءَ مبارک باتی ءُ گوھریں پنتانی ویڈیو کُلوہ منی دیم ءَ گْوست منی دِل ءَ گرکے جت ءُ سک ءَ باز وش بوت آں ، من سدّکاں ءُ پہ پھر ءُ شان گْوش آں کہ مئے راج ءِ توک ءَ مات زیبا ءُ مات یاسمین ءِ وڑیں شیرزالیں مات ھست اَنت گُڑا الم ءَ شھید ناجد ءِ وڑیں تمردیں بچّ ءُ پِدائیگیں شھید ریھان جان ءِ وڑیں سرمتابیں ورنا ودیگ کن اَنت ءُ من جزماں منی بلوچ ءَ را ھِچ دری کْوزہ گیر پہ مُدامی وتی چیردست ءُ گُلام داشت کُت نہ کنت۔۔۔
من وتی نبشتانک ءَ گوں واجہ بابُل لتیپ بلوچ ءِ اے لبزاں ھلاس کن آں کہ واجہ بابُل لتیپ شھید ناجد جان ءِ مکھیں مات زیبا بلوچ ءِ بابت ءَ نبشتہ کُرتگ اَنت ۔
شیر زال۔۔۔۔۔!!
منی ڈیھ ءَ
کارِستانی امبارے ، بس کماھگ لوٹ اَنت ۔۔۔
ھمے داب ءَ ۔۔۔۔
مات زیبا ، بلوچ راجدپتر ءِ ھما زیبائیں کارِست اِنت کہ آئی ءِ اے شیرزالی ءِ گْواچنیں کِسّو ، گوں ماتیں سر ڈگار ءَ مُھکمیں مھر ، داں بلوچ مان اِیت ابدمان اِنت ءُ راستی ءِ دگ ءَ ڈسّ ایِت ۔۔۔۔
منی کِرّ ءَ پہ اے دابیں ماتانی سِپت ءُ ستا ءَ لبزانی امبار ھُورک ءُ ھالیگ اِنت۔۔۔۔
بس ھمے گْوش آں!
اے کارِست کہ زِندگ مان اَنت گُڑا من ءَ زندگ بُوّگ ءِ شُبینگ بیت۔۔۔۔۔
